کەناڵی ناس کورد لە تێلیگرام جۆین بکە
ناس کورد- وەزارەتى شارەوانى و گەشتوگوزارى حکومەتى هەرێم ڕایگەیاند، بۆ بەرەنگاربوونەوەى کۆرۆنا پشکنینى ورد و زیاتر بۆ سەرچاوەى ئاوى ماڵان دەکرێت و بەكارهێنانی كلۆر "ڕێکخراوەتەوە". . وەزارەتى شارەوانى لە ڕاگەیەنراوێکدا ڕایگەیاند، بەمەبەستی بەدواداچوون و زانینی كوالێتی ئاوی هەولێر بە تایبەتی كە ئێستا ڤایرۆسی كۆرۆنا بووەتە مەترسی و ئەگەری بڵاوبوونەوەی لە رێگەی هۆكارە جیاوازەكانەوە هەیە، ئەمڕۆ ساسان عەونی وەزیری شارەوانی و گەشتوگوزار حبەشێوەیەكی مەیدانی سەردانی بەشی تاقیگەی سەر بە بەڕێوەبەرایەتیی ئاوی هەولێری كرد. . ئاماژە بەوەشکراوە، كارمەندانی بەشی تاقیكردنەوە جەختیان كردەوە بۆ رووبەڕووبوونەوەی پەتای كۆرۆنا بەكارهێنانی كلۆریان بەشێوەیەكی ستاندارد رێكخستووە و تیمەكانیان زیاد كردووە، دڵنیایی تەواویاندایە وەزیری شارەوانی و گەشتوگوزار كە ئاوی هەولێر هیچ كێشەیەكی نییە و بەردەوام پشكنینی بایۆلۆجی و پشكنینی كیمیایی بۆ ئاوی بیرەكان و ئاوی ئیفراز دەكەن. .
بەپێى ڕاگەیەنراوەکە، كارمەندانی بەشی تاقیكردنەوە باسیان لەوەشکردووە، لە ئێستادا بەهۆی مەترسی زیاتر بڵاوبوونەوەی ڤایرۆسی كۆرۆنا جۆرەكانی پشكنینەكانیان زیاتر كردووە وەك پشكنینی بایۆلۆجی و كیمیایی، پشكنینی بایۆلۆجی بۆ دەستنیشانكردن و دۆزینەوەی بەکتریا لە ئاوی ماڵان، ئەوەش دوای ئەوەی نموونەی ئاو لە تۆڕەكانی دابەشكردن وەردەگیرێت و لە دەزگایەكی تایبەتدا پشكنینی بۆ دەكرێت، لە ئێستاشدا ئەو پشكنینە زیاتر و وردتر دەكرێت وەك ئامادەكارییەك بۆ رووبەڕووبوونەوەی كۆرۆنا، كارمەندانی تاقیگەكە جەختیشیان لە خاوێنی ئاوی هەولێر كردەوە.
لاى خۆیەوە، وەزیری شارەوانی و گەشتوگوزار جەختی كردەوە لەسەر ئەوەی پێویستە لە ئێستادا تیمەکان وردتر و جدیتر كار بكەن بە تایبەتی كە ڤایرۆسی كۆرۆنا بووەتە مەترسی، بۆیە دەبێ باشترین كوالێتی ئاو بۆ هاووڵاتییان دابین بكرێت.
