گه‌ڕان

Shadow Shadow
سیاسه‌تی

چەرخی شەڕی ئیدلیب بە هەوای ئۆردوغان ناگەڕێت 

تورکیای توڕە بۆردومانی فراوانی ناوچەکانی یه‌په‌گه‌ و سوپای ئەسەد دەکات

2020.02.28 - 18:54
App store icon Play store icon Play store icon
تورکیای توڕە بۆردومانی فراوانی ناوچەکانی یه‌په‌گه‌ و سوپای ئەسەد دەکات

کەناڵی ناس کورد لە تێلیگرام جۆین بکە   

ناس كورد-    دوێنێ 27/2 گۆڕانکارییەکی گەورە لە بەرەکانی جەنگی ئیدلیب لەنێوان سوپای حکومەتی سوریا و هاوپەیمانانی لە لایەک و  ئۆپۆزسیۆنی هەواداری تورکیا و سوپای تورکیا لە لایەکی دیکە روویدا. . پاش ئەوەی رۆژی پێشوتر سوپای تورکیا و ئۆپۆزسیۆنی هەواداری شاری سەراقیبی ستراتیژییان کۆنترۆڵ کرده‌وە و دەستیانکرد بە بۆردومانکردنی باکوری شاری میعەررەت ئەل نوعمان، دوێنێ شەو سوپای حکومەتی سوریا هێرشەکانی بۆ گرتنی ئەلبارە و جەبەل زاویە لە خوارووی جادەی خێرای M4 راگرت و دژە هێرشی بۆ گرتنەوەی سەراقیب دەستپێکرد.  . گورزێکی سەخت لە سوپای تورکیا وەشێندرا . لە هەمان کاتدا فڕۆکە جەنگییەکانی سوپای ئەسەد لە نزیک شاری پڕ ئاسەواری مێژوویی ئەلبارەوە رەتلێکی سەربازیی گەورەی تورکیایان کردە ئامانج و بە پێی هەواڵە رەسمییەکانی تورکیا 33 سەربازی تورک لەو بۆردومانە ئاسمانییەدا کوژران و ئائێستە بە پێی بەرپرسی پارێزگای هەطای هاوسنووری ئیدلیب 35 برینداریش گواسترانەوە بۆ ناو تورکیا.  . لە ئەنجامی ئەم بۆردومانە پەیوەندیی راستەوخۆی باڵا لە نێوان تورکیا و رووسیا دەستیپێکرد و لە گفتوگۆیەکی تەلەفۆنیی نێوان ئۆردوگان و پوتین دا تورکیا ئەوەندەی لە روسیا دەستکەوت کە ئەوان راستەوخۆ بەرپرس نین لەو هێرشە و لەسەر ئەوە رێککەوتن کە رێوشوێنی نوێی کاری هاوبەش پێویستە بۆ کەمکردنەوەی بارگرژی لە ئیدلیب، بەڵام روسیا بەردەوامە لەسەر داوای کەنارگیرکردن و جیاکردنەوەی ئەو هێزانەی بە تیرۆریستیان لە قەڵەم دەدات وەک بەرەی نوسرە و گروپی چەکدارە تورکمانستانییەکان کە پێکەوە بڕبڕەی پشتی شەڕکەرانی "ئۆپۆزیسیۆنی سوری" ن لە ئیدلیب. بەپێی راپۆرتی وەزارەتی دەرەوەی روسیا لەبارەی گفتوگۆکەی ئۆردوگان و پوتین، تورکیا (بەشێوەیەکی گشتی) هاوڕایە لەگەڵ روسیا لەسەر کەنارگیرکردنی تێرۆریستان. . تورکیای تووڕە تۆڵە لە ئەسەد و یەپەگەش دەکاتەوە . لە هەمان کاتدا تورکیای تووڕە بۆ تۆڵەی شکاندنی شکۆی سوپاکەی لە نزیک ئەلبارە، پێگەیەکی سەربازیی سوریا، لە نزیک شاری حەمای باکووری دیمەشق، لە ناوجەرگەی ناوچەکانی ژێر کۆنترۆڵی حکومەتی سوریای بۆردومان کرد. . هەروەها پێگەی سەربازیی دیکەی لە نوببول و زەهرا ی سەرووی شاری حەلەب و لاذقیە ی نزیک بە بنکە سەربازییەکەی روسیا لە سوریای مووشەکبارانکرد.  . لەپاڵ هێرشی بۆردومان بۆ سەر ناوچەکانی کۆنترۆڵی ئەسەد، سوپای تورکیا لە دوێنێ شەوەوە هەڵمەتی بۆردومانی ناوچەکانی ژێر کۆنترۆڵی هەسەدە و یەپەگە دەستپێکردوە و بە خەستی بۆردومانی ناوچەکانی تەل ریفعەتی خوارووی عفرینی داگیرکراو دەکات. بە تایبەتی دەوروبەری فڕۆکەخانەی میننەغ-ی سەربازی و مەرعەناز و مالکیە و شێخ عیسی و خودی تەل ریفعەت و دێر جیمال و حەربل و کەفر نایا و شەتل زیارە. . لە بەرەکانی مینبج-ی ژێر کۆنترۆڵی یەپەگەش دوو گوندی دەوروبەری عەریمەی خۆرئاوای مینبیج یان بۆردومان کرد. لە بەرەکانی دیکەی کۆنترۆڵی یەپەگە و هەسەدە یش، بۆردومانی عەین عیسا-ی خوارووی گرێسپیی داگیرکراو و تەل تەمری خوارووی سەرێکانیی داگیرکراویان بۆردومان کرد. . کاری دیبلۆماسی وەک قۆڵێکی دیکەی جەنگی ئیدلیب . لەسەر ئاستی دیبلۆماسیش تورکیا هەوڵیدا کە رێکخراوی پەیمانی باکووری ئەتڵەسی (ناتۆ) بگلێنێتە شەڕە خواستراوەکەی لە ئیدلیب، و پاش راوێژکاری بۆی دەرکەوت کە تەنها لە چوارچێوەی بەندی چواری رێکەوتننامەی ناتۆ پشتگیریی بکەن، هەر بۆیە لەو چوارچێوەیەدا داوای کۆبوونەوەی کرد.  . بەندی چوارەمی رێکەوتننامەکە ئەندامانی رێکخراوەکە بە جۆرێک هاوکاری پابەند دەکات کە ناگاتە ئاستی هاوکاریی سەربازی. خودی داوای ئەنقەرە لە هاوپەیمانەکانی بۆ کۆبوونەوەیەکی لەو جۆرە سنووردارە، بەڵگەی بێهیوابوونێتی لە پەیمانی ناتۆ لە کێشەکەیدا لەگەڵ رووسیادا. . بۆ فشاری زیاتر لەسەر ئەنقه‌رە و هۆشداریدان بە ناتۆ، دوو کەشتی جەنگیی نوێی رووسی بەڕێکەوتن بۆ کەنارەکانی سوریا. . تورکیا پەنابەران وەک کارتی فشار بەکاردێنێت . لەئەنجامی ئەم تووڕەیی و بێ هیواییەی ئۆردوغان، حکومەتەکەی بڕیاریدا دەرگای کۆچی نایاسایی لە بەرامبەر ملیۆنەها پەنابەری گیر خواردوو لە ناو تورکیادا بکاتەوە. هەندێک لە راپۆرتەکان رایدەگەیەنن کە تەنانەت تورکیا خۆی بە پاس و بە ئاشکرا پەنابەران تا سنووری یۆنان رەوانە دەکات و لەسەر سنوور هەڵیاندەڕێژێت. ئامانجی تورکیاش لەم کارەی بەرزکردنەوەی ئاستی فشار و هەڵمەتی تۆقاندنی پارتە راستڕەوە رەگەزپەرستەکانی ئەورووپایە لە دژی پەنابەران تا حکومەتەکانیان ناچاری گرتنەبەری رێگای یارمەتیدانی سەربازیی تورکیا بگرنەبەر. . رۆژانی داهاتوو، هەموو لایەنەکانی کێشەکەی ئیدلیب دەخاتە بەر تاقیکردنەوەیەکی سەختی شەڕی ئیرادەی سیاسییان. لەم ناوەشدا دەنگی تۆپ و فڕۆکە و زرێپۆشەکان لە دەنگی هاووڵاتیانی تۆقیوو و برسی و سەرماسڕکردووی ئیدلیب زۆر دلێرترە.    .