کەناڵی ناس کورد لە تێلیگرام جۆین بکە
ناس کورد- پارتى دیموکراتى کوردستان لەگەڵ هاوپه‌یمانییه‌تییه‌كه‌ی محه‌مه‌د حه‌لبوسی هەڵوێستەکانیان بەرانبەر حکومەتى داهاتوى عێراق بەسەرۆکایەتى محەمەد عەلاوى یەکخست، دواى ناڕەزاییە هاوبەشەکانى هەردوولا لەبارەى هەنگاوەکانى عەلاوییەوە بۆ دیاریکردنى وەزیرەکان لەدەرەوەى حزبەکان. . یەکخستنى هەڵوێستى پارتى و هاوپه‌یمانییه‌تییه‌كه‌ی حه‌لبوسی لەکۆبونەوەیەکدا هات کە ئەمڕۆ لە سەڵاحەدین بەڕێوەچوو، دواى ئەوەى محەمەد حەلبوسى سه‌رۆكى هاوپه‌يمانى هێزه عێراقييه‌كان و سەرۆکى پەرلەمانى عێراق بە سەرۆکایەتى شاندێک گەیشتە هەولێر و لەگەڵ مەسعود بارزانى سەرۆکى پارتى کۆبووەوە، بەمەبەستى تاوتوێکردنى پرسی پێکهێنانى حکومەتى داهاتوو. . بەگوێره‌ی ڕاگەیەنراوى کۆتایی کۆبوونەوەکە، بارزانى و حەلبوسى گفتوگۆیان کردووە ده‌رباره‌ى ره‌هه‌نده‌كانى ره‌وشى ئێستاى عێراق و ناوچه‌كه و پێكهێنانى حكومه‌تى نوێى عێراق و له‌سه‌ر شەش خاڵ رێككه‌وتن. . ئاماژە بەوەشکراوە، بارزانى و حەلبوسى جەختیانکردووەتەوە لەسەر پێویستى كاركردن له‌گه‌ڵ هه‌موو هێزه سياسييه‌كان له‌پێناو ده‌ربازبوون لەو ته‌نگژه‌يه‌ى ئێستا و به‌شداريكردن له گێڕانه‌وه‌ى سه‌قامگيرى بۆ به‌غدا و پارێزگاكانی ديكه‌ى خوارووى عێراق. . هەروەها بە پێویستیان زانیوە حكومه‌تى داهاتووى عێراق نوێنه‌رايه‌تى هه‌موو پێكهاته‌كانی عێراق بكات، له‌سه‌ر بنه‌ماى شه‌راكه‌تى نيشتمانيى بێت. به‌رنامه‌ى حكومه‌ت به ڕوونى ئاماژه به ئاماده‌كاریی بكات بۆ ئه‌نجامدانى هه‌ڵبژاردنى پێشوه‌خته به‌زووترين كات، وه‌ك جێبه‌جێكردنی خواستى خۆپيشانده‌ران و ئه‌م بابه‌ته دەبێ ببێته كارى لە پێشينه‌ى حكوومه‌تى داهاتوو. . بارزانى و حەلبوسى لەسەر ئەوەش ڕێککەوتوون کە به‌رنامه‌ى حكومه‌تى داهاتوو پلانێكى ڕوون و ئاشكرا له‌خۆ بگرێت بۆ گێڕانه‌وه‌ى شكۆ بۆ داموده‌زگه‌كانى ده‌وڵه‌ت و پاراستنى ئاشتیی كۆمه‌ڵايه‌تى، كۆتاییهێنان بە ده‌ستوه‌ردانى ده‌ره‌كى و هێشتنه‌وه‌ى چه‌ك ته‌نها به‌ده‌ست ده‌وڵه‌ت، نەهێشتنی دیاردەی چەكدارە نافەرمییەكان.
.
هەروەها جەختیانکردووەتەوە لەسەر به‌رده‌وامیی كاری هاوبەش له‌گه‌ڵ هێزەکانی هاوپەیمانیی نێودەوڵەتی له پێناو يارمه‌تيدانى عێراق له ڕووبه‌ڕووبوونه‌وه‌ى هه‌ڕه‌شه‌كانى تيرۆر و زاڵبوون به‌سه‌ر پاشماوەی تيرۆريستانى داعش، كاركردن له پێناو به‌رده‌وامبوونى په‌يوه‌ندیى دوولایەنە لەپێناو هه‌ماهه‌نگكردنی هەڵوێستەكانی هەردوولا و هاوبه‌شه‌كانی تر.
.
کۆبوونەوەکەى بارزانى و حەلبوسى دواى ڕۆژێک هات لە قسەکانى محەمەد تۆفیق عەلاوى لەبارەى تەواوکردنى کابینە وەزارییەکەى و ئامادەکردنى بۆ ئەوەى لەم هەفتەیەدا لە پەرلەمان دەنگى لەسەر بدرێت.
.
بەوتەى سەرچاوەیەک بۆ ناس کورد، ئامانج لەکۆبوونەوەکەى بارزانى و حەلبوسى بۆ دیاریکردنى هەڵوێستى پارتى و هاوپەیمانى سوننەکان بووە لەبارەى کابینەکەى عەلاوییەوە.
.
بەپێی لێدوانى بەرپرسانى هەردوولا (پارتى و هاوپه‌یمانێتییه‌كه‌ی حه‌لبوسی) وادەردەکەوێت هەردولایان ناڕازین لە هەنگاوەکانى عەلاوى، بۆ دیاریکردنى وەزیرەکان لەسەر بنەماى نا حزبى.
.
پێشتر هۆشیار زێبارى ئەندامى مەکتەبی سیاسی پارتى جەختیکردبووەوە کە ڕازى نابن بەناوى سەربەخۆوە عەلاوى کەسیان بەسەردا بسەپێنێت.
.
لاى خۆیەوە، محەمەد کەربولى سەرکردە لەهاوپەیمانى هێزە عێراقییەکان ڕایگەیاند، هێزە سوننیەکان و کوردییەکان دەیانەوێت بەشداربن لە پێکهێنانى حکومەتدا، هاوشێوەى بەشداریکردنیان لە سەرۆکایەتى پەرلەمان و کۆماردا".
.
وتیشى "حەلبوسى هیچ ناوێکى بەسەر عەلاویدا نەسەپاندووە بۆ دیاریکردنى کابینەکەى، بەڵام داواى لێکردووە بچێتە ناوچە سونییەکان بۆ دیاریکردنى وەزیرەکان لەو دادوەر و مامۆستا و شارەزایانەى کە لەو ناوچانەن".
.
بەوتەى کەربولى، عەلاوى وەڵامى داواکەى حەلبوسى نەداوەتەوە، بەڵکو چووە کەسایەتییەکى لە ئەڵمانیا بانگهێشتکردووە، بۆ پێدانى پشکێکى وەزارى وەکو نوێنەرى سوننه.
.
