گه‌ڕان

Shadow Shadow

ناس کورد بەدواداچون بۆ پرسی هەڵدانەوەی کەیسەکەى ئامانج بابانى و هاوسەر و منداڵەکەی دەکات

2020.02.08 - 21:15
App store icon Play store icon Play store icon
ناس کورد بەدواداچون بۆ پرسی هەڵدانەوەی کەیسەکەى ئامانج بابانى و هاوسەر و منداڵەکەی دەکات

کەناڵی ناس کورد لە تێلیگرام جۆین بکە   

ناس کورد- دواى ئەوەى بەڕێوەبەری بەڵگەی تاوانی هەرێم رایگەیاند، گومان لەسەر كەیسی گیان لەدەستدانی ئامانج بابانی و هاوسەر و منداڵەكەی هەیەو ئەگەرى هەیە ڕووداوەکە خۆکوژی نەبوبێت، باوکى ئامانج بابانى دەڵێت، هیچ شتێک ناکەن لەو بارەیەوەو بە بڕیارەکەى پێشوى دادگا رازین، پارێزەرێکیش دەڵێت، ئەو کەیسە وەک هەر کەیسێکى ترى لەو شێوەیە ئەگەر بەڵگەى نوێ هەبێت پێویستە داواکارى گشتى بیجوڵێنێت. ،

"باوکی ئامانج بابانی داوای پێداچوونەوە بە بڕیاری دادگادا ناکەین"

، محەمە نورى باوکى ئامانج بابانى لەبارەى قسەکانى بەڕێوەبەرى بەڵگەى تاوانى هەرێمى کوردستان بۆ ناس کورد وتى: "ئێمە هیچ شتێکمان نەکردوە لەو بارەیەوەو هیچیش ناکەین، ئەو بڕیارەى پێشتر دەرچوە بڕیارى دادگایەو دادگاش کەیسەکەى داخستوە و ئێمە پێى رازین". ، وتیشى: "ئێمە چاوەڕێى دادگاین و دادگا هەر بڕیارێکى دا ئێمە لەگەڵیداین و دەبێت حکومەت خۆى بەدەم ئەو کەیسەوە بچێت". ،

"هەرکاتێک شتێکی نوێ لە ڕووداوەکە بدۆزرێتەوە دەکرێت دۆسییەکە دووبارە بکرێتەوە"

، لەلایەکى ترەوە کارزان فازڵ، پارێزەر سەبارەت بە قسەکانى بەڕێوەبەری بەڵگەی تاوانی هەرێمی كوردستان و داهاتوى کەیسەکەوە بە ناس کوردی ڕاگەیاند: "ئەو کەیسە دەبێت داواکارى گشتی یاخود کەسوکارى کوژراوەکان بیجوڵێنن، پێویستە داواکارى گشتى بەدواى ئەو بەڵگە تازەیەدا بچێت و بیجوڵێنێت، چونکە ئەو کەیسە مافى گشیی تێدایە. ، وتیىش: "لەروى یاساییەوە هەر کەیسێک لە قۆناغى لێکۆڵینەوە داخرا چەند رێگەیەکى هەیە، یەکیان ئەوەیە تۆمەتبار دیار نییەو دادگا دەتوانێت کەیسەکەش دابخات بە کاتیی و هەرکات تۆمەتبار دەرکەوت کەیسەکە دەجوڵێنێتەوە، رێگەیەکى تریان وەک ئەم کەیسەى ئامانج و هاوسەرەکەى و منداڵەى وایە کەیسەکە بەشێوەیەکى کاتى دادەخرێت و هەرکاتێک بەڵگەیەکى تازە دەرکەوت کەسوکارى قوربانى یاخود داواکارى گشتى سکاڵاکە دەجوڵێنێتەوە ئەوەش بۆ هەموو دۆسیەیەک کە لە قۆناغى لێکۆڵینەوە دادەخرێت راستە". ، ئەو پارێزەرە ئەوەشى بۆ ناس کورد رونکردەوە: "بەڵام قسەکە لەسەر ئەوەیە کە بەڵگە هەیە چەند وەختە چى کراوەو  لە کوێ بوەو بۆچى ئێستا دەرکەوتوەو لەکەیەوە ئەم بەڵگانەیان لایە؟". ،

"چوار لە قەوانەکان لە دەمانچەیەکی دیکەوە تەقێنراوە"

، پاش چەند رۆژێك لە داخستنی كەیسی گیان لەدەستدانی میدیاكاران ئامانج بابانی و لانە محەمەدی هاوسەری و منداڵەكەیان لەلایەن دادگای سلێمانییەوە و یەكلاكردنەوەی ئەوەی كردەوەكە خۆكوژی بووە، عەمید عەبدولجەبار ئەحمەد بەڕێوەبەری بەڵگەی تاوانی هەرێم رۆژى پێنجشەممەی ڕابردوو 6ی شوباتی 2020، لە کۆنفرانسێکی ڕۆژنامەوانیدا وتی: "دوای بەدواداچوونێكی تەواو بۆ بەڵگە ماددییەكان و پشكنینەكان هەستمانكرد حەوت قەوانی فیشەك لە جۆری نمرە 9 لەكاتی روداوەكە هەڵگیراوەتەوە كە گولـەكان لەیەك دەمانچە تەقیون كە دەگەڕێتەوە بۆ "ئامانج بابانی"، ئێمە لە تاقیگەكانی بەڵگەی سلێمانی پشكنینمان بۆ ئەم حەوت قەوانەكرد و بۆمان دەركەوت سێ لەو قەوانانە بەڵێ بەدڵنیاییەوە دەگەڕێتەوە بۆ ئەو دەمانچەیەی كە دەستیبەسەردا گیراوە، بەڵام چوار لە قەوانەكان بە دەمانچەیەكی دیكە تەقێنراوە كە ئەو دەمانچەیە دەستی بەسەردانەگیراوە و دیارنییە". ، تەئکیدیشى کردەوە: "لەو كەیسە نەدەبوایە پەلەبكرایە و گومان دەكرێت ئەم كردارە خۆكوژی نەبێت و كوشتن بێت، چونكە دەبێت رونكردنەوەی تەواو بدرێت و لەلایەن دادوەر و داواكاری گشتی بەدواداچونی زیاتر بكرێت و زیاتر پشت بە بەڵگەكان ببەستێرت، ئەمەش بۆ ئەوەی بۆ كەسوكاری هەردولا و هاووڵاتیانیش پشتڕاست ببێتەوە، كە راستی روداوەكە چۆنە، داواش دەكات لەلایەن داواكاری مافی كەسییەوە تانە لەو بڕیارە بدرێت لە سەرۆكایەتیی داواكاری گشتی چاو بە بەڵگەكاندا بخشێنێتەوە و كەیسەكە بە كراوەیی بمێنێتەوە تا دەگەینە راستی كێشەكە"   ،

وتەبێژی دادگای سلێمانی: هیچ لایەنێکیتر بۆی نییە لەسەر ئەو دۆسیەیە قسە بکات

، هەر سەبارەت بەو بابەتە، عومەر ئەحمەد، وتەبێژی دادگای سلێمانی بە ناس کوردى وت: "بەپێى مادەى 249 لەیاساى بنەماى دادگەرییە سزاییەکان ئەو لایەنانەى بۆیان هەیە قسە لەسەر بڕیارى دادگا بکەن دیارى کراوە ئەوانیش داواکارانى مافى کەسى و کەسوکارى ئەو لایەنانەى بەشێکن لەو دۆسیەیەو لایەنەکان خۆیان و تاوان لێکراو و تۆمەتبار و داواکارى گشتى و ئەو کەسانەى زەرەرمەند بوون، جگە لەوە هیچ کەس و لایەنێکى تر بۆى نییە قسە لەسەر ئەو دۆسیەیە بکات". ، وتیشى: "دادگاى پێداچونەوەش بەپێى یاسا لەهەر کات و ساتێکدا بیەوێت لەدەرەوەى ماوەى یاسایى هەر دۆسیەیەکى بوێت بیهێنێت و وردبینى و پێداچونەوەى پێدا بکات و هەر هەڵەیەکى یاسایى هەبێت هەڵیبوەشێنێتەوە، ئەوانەى ئەو دەسەڵاتەیان هەیە دادگاى تاوانەکان و دادگاى پێداچونەوەى هەرێمن، ئەوەى ئەو بەڕێزە باسى کردوە هیچ خزمەتێک بە دۆسیەکە ناکات و هیچ تازەگەرییەکیشى تێدا نییە، جگە لەوە کە سەرۆکایەتى دادگاى تێهەڵچونەوە واى دەبینێت کە ئەوە کار دەکاتە سەر بیرو هزرى هاوڵاتیان کە متمانەیان بەبڕیارەکانى داد و  پۆلیس نەمێنێت یان گومانیان لێى هەبێت". ، وتەبێژی دادگای سلێمانی رونیشیکردەوە: "هەموو بڕیارێکى دادوەر کە دەردەچێت بەپێى یاسا دەبێت لەماوەى سێ رۆژدا بخرێتە بەردەم ئەندامى داواکارى گشتى بۆ ئەوەى ئەگەر یاسایى نەبوو تانەى لێبدات و ئەگەر یاسایى بوو واژووى لەسەر بکات کە یاساییە، من وردبینیم بۆ دۆسیەکە کردوەو لەدواى دەرچونى بڕیارەکە راستەوخۆ ئەندامى داواکارى گشتى واژوى لەسەر بڕیارەکەى دادوەرى لێکۆڵینەوە کردوە بەوەى کە پابەندى یاسایە". ، "ئێمە سوپاسى هەر لایەنێک دەکەین کە بتوانێت بەشێوازێک لە شێوازەکان یارمەتى دۆسیەیەک یان زەرەرمەندێک بدات کە بیگەیەنینە مافى خۆى، بەڵام ئەوە ئیشى ئەو کەسە نییە و لەدەرەوەى سنورى دەسەڵاتى ئەوە، خۆى دەبێتە فەرمانەکانى دادگا جێبەجێ بکات چۆن هەڵدەستێت بەم شێوازە قسە لەسەر بڕیارى دادگا بکات و سەرمان سوڕماوە لەو قسانە"، وتەبێژی دادگای سلێمانی وادەڵێت. ، سەبارەت بەوەى کە بەڵگەی تاوانی هەرێمی كوردستان رێگەیان پێدراوە بێنە سلێمانى بۆ لێکۆڵینەوە لەو بابەتە وتى: "هەر هەنگاوێک بنێرێت لەهەر دۆسیەیەکدا دەبێت بە ئاگادارى و فەرمانى دادوەرى لێکۆڵینەوە بێت، جگە لە داواکارى گشتى کە بۆى هەیە لە هەر کاتێک بێت سەیرى بکات، چونکە ئەوە نهێنى پەڕاوى لێکۆڵینەوەیە و پێویستە پارێزراو بێت، هەر کەسیک نهێنیەکانى دۆسیەى لێکۆلێنەوەى دەرهێنا و باسى کرد ئەوا لێپرسینەوەى یاسایى لەگەڵدا دەکرێت، ئەگەر یاسا خۆى وابێت ئەى خەڵکى تر ئەبێت چۆن بێت، ئەوە مافى کەسانى ترەو لەوانەیە کەسوکارى تاوانلێکراو پێیان خۆش نەبێت". ،

چوار قەوانەکەی دەوترێت هی دەمانچەکەی ئامانج بابانی نەبووە، هی کێیە؟

، سەبارەت بە ژمارەى قەوانى گولەکان کە باس دەکرێت گوایە چوار گولەیان لە دەمانچەیەکى ترەو دیار نییە، وتەبێژی دادگای سلێمانی ئاماژەی بەوەکرد: " من وردبینیم لە دۆسیەکە کردوەو لەناو دۆسیەکە نوسراوێکى ئاسایشى تێدایە کە ئاراستەى بنکەى پۆلیس و دادگاى کردوەو تێیدا هاتوە کە ئەم چوار قەوانە لەلایەن ئاسایشەوە تەقێنراوە  بۆ بڵاوەپێکردنى خەڵک کە رێگەیان نەداوە لێکۆڵینەوە لە روداوەکە بکەن هەروەها بەڕێوەبەرى بەڵگەى تاوانیش ئاماژەى پێداوە کە هەر لەکاتى لێکۆڵینەوەکاندا بەدەستیان گەیشتوە، زۆر بە ئاشکرا لەدۆسیەکەدا هەیەو هیچ گومانێکى تێدا نییە بۆ دادگا". ، باسی لەوەشکرد: "دادگا بە چاوى گومانەوە سەیرى ئەوانە ناکات کە لێکۆڵینەوە دەکەن، قەوانەکان و مۆبایلێکى هاوڵاتیەکیشیان پێبوە کە لەشوێنى روداوەکە پاڵپێوەنان رویداوەو کەوتوە ئەویش هەڵگیراوەتەوە رادەستى پۆلیس کراوەو دواتر هاوڵاتیەکە مۆبایلەکەى وەرگرتوەتەوەو هیچ شتێکى شاراوە نییە لەم کەیسەدا". ، شەوى چوارشەممە بەروارى 16/10/2019 لە نزیك تێرمیناڵی شارەزور، ئامانج بابانی و لانە محەمەدی هاوژینی و منداڵەكەیان لە روداوێكدا گیانیان لەدەستدا، كە دواتر پۆلیسی سلێمانی روداوەكەی بە خۆكوژی ناوبردو رۆژی 29ی مانگی رابردوش دادگای سلێمانی بەشێوەیەكی كۆتایی دۆسیەکەى داخست.