گه‌ڕان

Shadow Shadow

بۆچوونى لەسەر مافەکانى کورد ئەرێنییە

محه‌مه‌د عه‌لاوی لەگەڵ فراکسیۆنە کوردییەکان کۆدەبێتەوە

2020.02.04 - 15:50
محه‌مه‌د عه‌لاوی لەگەڵ فراکسیۆنە کوردییەکان کۆدەبێتەوە
ناس کورد- هەڤاڵ فەتاح پەرلەمانتارێکی کورد لە پەرلەمانی عێراق ڕایگەیاند، سەرۆکوەزیرانی ڕاسپێردراو بۆ پێکهێنانی  کابینەی نویێ حکومەت لە ڕۆژانی داهاتوودا لەگەڵ فراکسیۆنە کوردییەکان کۆدەبێتەوە، کابینەکەشی لە کەسانی بێلایەن پێکدەهێنێت. . بەهار مەحمود، ئەندامى پەرلەمانی عێراق لە فراکسیۆنی گۆڕان، بەناس کوردی ڕاگەیاند "بەمنزیکانە وتووێژەکانی محەمەد تۆفیق عەلاوی لەگەڵ فراکسیۆنە کوردییەکانی عێراق دەستپێدەکات". . مانگێک لەمەوبەر و پێش ڕاسپاردنى بۆ سەرۆکوەزیران، عەلاوى لەگەڵ بەشێک لە پەرلەمانتارە کوردەکان کۆبووەتەوە و پەرلەمانتارەکان چەند داواکارییەکیان ئاڕاستە کردووە. . بەهار مەحمود کە یەکێک بووە لەو پەرلەمانتارانە وتى"بودجە و شایستە داراییەکانی فەرمانبەرانی کوردستان، شایستە داراییەکانی جوتیاران، مامەڵەکردن لەگەڵ هێزی پێشمەرگە وەک بەشێک لە سیستمی بەرگریی عێراق، گرنگترین داواکارییەکانمان بوو، ئەویش بەئەرێنی وەڵامی داینەوە". . وتیشى "عەلاوی سەرەتا لەگەڵ فراکسیۆنە شیعەکان کۆدەبێتەوە پاشان لەگەڵ سوننەکان، لە کۆتایشدا لەگەڵ فراکسیۆنە کوردییەکان کۆدەبێتەوە". . محەمەد تۆفیق عەلاوی، لە ئێستادا سەرقاڵی داڕشتنی بەرنامەی کابینەکەیەتی و بۆ سەرجەم لایەنە سیاسییەکان ناردووە، دەیەوێت لەماوەى دەستوریدا کە 27 ڕۆژى ماوە پێکیبهێنێت. . عەلاوى بەڵێنیداوە کابینەکەى لە کەسانى پسپۆڕ و شارەزا و سەربەخۆ پێکبهێنێت و جەختیکردووەتەوە کە دەستوەردان لەو بارەیەوە قبوڵ ناکات. . "عەلاوی هیچ وەزیرێکی حزبی بۆ کابینەکەی بەربژێر ناکات، بۆیە دەبێت لەسەر کەسانی ئەکادیمی و سەربەخۆ لە هەرێمی کوردستان سیڤی خۆیان پێشکەش بکەن بۆ ئەوەی کورد ئامادەبوونێکی باشی هەبێت لە کابینەی نوێی حکومەتی عێراق". بەهار مەحمود وایوت. .