گه‌ڕان

Shadow Shadow
چیرۆكه‌كانمان

لە حاڵەتی ئامادەباشیدان

هاتوچۆی سلێمانی لە ڕێی ناس کورد-ەوە شۆفێران ئاگادار دەکاتەوە

2019.03.31 - 10:09
App store icon Play store icon Play store icon
هاتوچۆی سلێمانی لە ڕێی ناس کورد-ەوە شۆفێران ئاگادار دەکاتەوە

کەناڵی ناس کورد لە تێلیگرام جۆین بکە   

 

ناس کورد- شەهرام عەزیز

بەڕێوەبەرایەتی هاتوچۆی سلێمانی کارمەندەکانی دەخاتە حاڵەتی ئامادەباشییەوە و ڕێنمایی تایبەتیش لە کەشوهەوای نالەباردا بە شۆفێران دەدات.

ڕائید کاروان محەمەد، وتەبێژی هاتوچۆی سلێمانی تایبەت بە ناس کورد-ی ڕاگەیاند: "بەو پێیەی بۆ ئەمڕؤ هۆشداری دراوە لە باران بارینێکی زۆر و دروستبوونی لافاو، ئێمەش وەک بەڕێوەبەرایەتی هاتوچۆی سلێمانی تیمەکانمان لە حاڵەتی ئامادەباشیدان بۆ هاوکاریکردنی شۆفێران".

 

ڕائید کاروان محەمەد ڕێنمایی بە شۆفێران دا لە چۆنێتی شۆفێریکردن لە کەشوهەوایەکی نالەباردا و ئاماژەی بەوەکرد: "گرنگترین شت ئەوەیە شۆفێران خێرایی کەم بکەنەوە، هەروەها دووری مەودای نێوان خۆیان و ئۆتۆمبێلی پێشەوەیان زیاد بکەن و زۆر نزیک نەبنەوە لێی و دڵنیاش ببنەوە لە کارپێکردنی لایتی پێشەوە و دواوەی ئۆتۆمبێلەکەیان".

 

وتەبێژی هاتوچۆی سلێمانی لە ڕێی ناس کورد-ەوە ڕایگەیاند، لە هەر حاڵەتێکی گۆڕینی ئاڕاستەی شەقامێک یاخود داخستنی شەقامێک بەهۆی لافاوەوە، لە ماڵپەڕی هاتوچۆی سلێمانی-ەوە شۆفێران ئاگادار دەکرێنەوە.

ئەوەش لە کاتێکدایە دوێنێ شەممە لەراگەیەندراوێكی بەشی پێشبینی لەبەڕێوەبەرایەتی گشتی كەشناسی و بوومەلەرزەزانی هەرێمی كوردستانەوە، ئاماژە بەوە كرا، لە ئەنجامی چالاكبوونەوەی هەردوو نزمە پاڵەپەستۆی دەریای ناوەڕاست و دەریای سوور، پێشبینی دەكرێت بارانبارینی بەلێزمە و هەورە بروسکە ڕوو بكاتە هەرێمی كوردستان.

بەپێی راگەیەندراوەكە پێشبینی کراوە ناوچەكانی شەنگال و سەنتەری شاری دهۆك و زاخۆ و ئامێدی و سەرسەنگ و سەنتەری شاری سلێمانی و چەمچەماڵ و رانیە و سەنتەری پارێزگای هەولێر و ناوچە شاخاوییەكان، بارانێكی زۆر و بەلێزمە بیانگرێتەوە و پێشبینی دەكرێت لەماوەی ئەم چالاكبوونەوە لەسەرووی 40 ملیمەوە باران ببارێت.