کەناڵی ناس کورد لە تێلیگرام جۆین بکە
ناس کورد- دادوەرێکى پێشووى هەرێمى کوردستان ڕایگەیاند، ئەنجومەنى دادوەرى هەرێم "بەنهێنى" ناوى چەند دادوەرێکى ڕەوانەى بەغدا کردووە تا تیروپشکیان بۆ بکرێت بەمەبەستى دیاریکردنى دوانیان بۆ ئەندامێتى ئەنجومەنى باڵاى کۆمسیۆنى هەڵبژاردنەکان. . بڕیارە سبەینێ پرۆسەى ئەنجامدانى تیروپشک بۆ دیاریکردنى دوو نوێنەرەکەى هەرێم بۆ ئەندامێتى ئەنجومەنى باڵاى کۆمسیۆنى هەڵبژاردنەکان لە ئەنجومەنى باڵاى دادوەرى عێراق بەڕێوەبچێت و تا ئێستا هەرێم ناوى دادوەرە بەربژێرەکانى ئاشکرانەکردووە. . لەتیف مستەفا ئەندامى پێشووى دادگاى تێهەڵچوونەوەى سلێمانى بە ناس کوردى ڕاگەیاند "لەلایەن ھەندێ دادوەر کە مەرجیشیان تێدایە و پلەیەکن ئاگادارکرامەوە بەھیچ شێوەیەک دادوەران ئاگادار نەکراونەتەوە، تەنھا چەند ناوێک بەنھێنی بەرزکراونەتەوە و نێردراون بۆ ئەنجومەنی فیدراڵی". . وتیشى "ئەمەش پێچەوانەی یاساکە و مادەی 16ى دەستوری عێراقە، ھەقوایە رێکخراوەکانی کۆمەڵگای مەدەنی و حیزبەکانی دەرەوەى دەسەڵات بەوە ڕازی نەبن و بەیانی بچنە بەردەم ئەنجومەنی دادوەری لە ناوچەی سەوز و ناڕەزایی دەرببڕن و داوای وەستاندنی پڕۆسەکە بکەن، تا ھەموو ئەو دادوەرانەی کە مەرجی یاساییان تێدایە ئاگادار دەکرێنەوە بۆ ئەوەی مافی ھەلی یەکسانیان بۆ بڕەخسێت نەک تەنھا چەند دادوەرێک بە نھێنی ناویان بەرز بکرێتەوە". . لەتیف مستەفا ئاماژەى بەوەشکردووە، ئەگەر پڕۆسەکە ڕانەگیرا پێویستە لەدادگای فیدراڵی تانەی لێ بدرێت "ئەگەر حیزبەکانی دەرەوەی دوو حیزبەکە بێ دەنگیان ھەڵبژاردوو ھیچیان نەکرد و لەکاتی ھەڵبژاردنیش باسی تەزویریان کرد ھەقە ئیتر کەس گوێیان بۆ نەگرێت و باوەڕ بە مزایەدەکانیان نەکات". . بەپێی یاساى نوێی کۆمسیۆنى سەربەخۆى هەڵبژاردنەکانى عێراق، دەبێت ئەو دادوەرانەى بۆ ئەندامێتى ئەنجومەنى کۆمسیاران دیاریدەکرێن، سەربەخۆ بن و سەر بەهیچ حزبێک نەبن. . شەهرام میرحاد وتەبێژى ئەنجومەنى دادوەرى هەرێم بە ناس کوردى ڕاگەیاند "سبەینێ تیروپشک بۆ ناوەکان دەکرێت، دواتر بەفەرمى ناوەکان ڕادەگەیەنین". . بەپێی یاساى نوێی کۆمسیۆن، سەربارى دیاریکردنى ئەو دادوەرانە بۆ کۆمسیۆن، سەرجەم بەرپرسەکانى دیکەى کۆمسیۆنیش دەگۆڕدرێن، جگە لە کارمەندانى کۆمسیۆن لە نوسینگە جیاجیاکان لە سەرتاسەرى عێراق و هەرێمى کوردستان. . ئامانج لە دروستکردنى کۆمسیۆنێکى نوێی هەڵبژاردن لە عێراق، بەڕێوەبردنى هەڵبژاردنێکى شەفاف و دوور لە ساختەکارییە کە داواکارییەکى سەرەکى خۆپیشاندەرانە.
