گه‌ڕان

Shadow Shadow
سیاسه‌تی

هاووڵاتییەكی سلێمانی 19 ساڵە سكی برسی ئاوارە عێراقی و ئێرانیەكان تێردەكات

2019.03.29 - 15:23
App store icon Play store icon Play store icon
هاووڵاتییەكی سلێمانی 19 ساڵە سكی برسی ئاوارە عێراقی و ئێرانیەكان تێردەكات

کەناڵی ناس کورد لە تێلیگرام جۆین بکە   

ناس كورد-

بازرگانێكی كوردی دانیشتووی شاری سلێمانی، ماوەی 19 ساڵە نان بە هەژاران دەدات، ئەمەش تەنها لەپێناو ڕازیكردنی خودا و وەسێتی بۆ منداڵەكانیشی كردووە لەدوای خۆی لەسەر ئەو كارە خێرخوازییە، بەردەوام بن.
شێخ نامیق فایەق لە گفتوگۆیەكدا لەگەڵ ئاژانسی هەواڵی (رۆیتەرز) ئاماژە بەوە دەكات یەكێك لە خانووە كۆنەكانی خۆی كردوە بە چێشتخانەیەكی بچوك و بەدرێژایی رۆژ كاری تێدا دەكات بۆ دروستكردنی ژەمە خۆراكێك بۆ هەژاران و كەمدەرامەتان.

دەشڵێت "هەموو هاوكارییەكی حكومەتم رەتكردەوە و تەنها خۆم تێچوی ئەم كارەم لە ئەستۆ گرت".

شێخ نامیق لەساڵی 2000ەوە دەستیداوەتە ئەم كارە و هەتا ئێستاش بەردەوامە، "خوای گەورەش ساڵ لەدوای ساڵ ڕزق و ڕۆزی زیاترم پێدەبەخشێت و ماڵەكەم هیوایەكە بۆ هەژاران و دەمەوێت هیوا بڕاو نەبن" شێخ نامیق وای وت.
ماڵەكەی شێخ نامیق لەگەڵ ئەوەی ماڵێكی بچووكە بەڵام بۆتە لانەیەك بۆ هەژاران و ڕۆژانە زیاتر لە 50كەس سەردانی دەكەن و رۆژانە شێخ 120 هەزار دینار واتا (100$)ی ئەمریكی خەرج دەكات لەم كارەدا و لە ڕۆژانی هەینیدا گۆشت و مریشك پێشكەش دەكات كە تێچووەكەی دەگاتە280 هەزار دینار واتە(230$)ی ئەمریكی و چێشتلێنەرێكی بە مووچەی مانگانەی 500 هەزار دینار دامەزراندووە.

ئەوەی جێی سەرنجە چێشتخانەكەی شێخ نامیق پێشوازی لە هەمووان دەكات، بەتایبەت ئاوارە عەرەب و ئێرانییەكان هەمووان لە خواردنە بەتامەكانی ئەم چێشتخانە بچوكە دەخۆن.
یەكێك لەو كەسانەی كە ڕۆژانە لەم چێشتخانەیە نان دەخوات دەڵێت"ئێمە كۆمەڵێك هەژار و كەم دەرامەت و كرێكارین لە هەموو چین و توێژەكان،ڕۆژانە دێین بۆ ماڵی شێخ نامیق كە ناسراوە بە ماڵی هەژاران بۆ ئەوەی بەخۆڕایی نان بخۆین، هەندێك جاریش مەنجەڵێكی بچوك ئەهێنین و خواردنی زیادە بۆ ئێوارە یان بەیانی ڕۆژی دوایی وەردەگرین، ئەم ماڵە زۆر لە حكومەت باشترە بۆ ئێمە".


كەسێكیتر لەو كەسانەی كە سودمەندە لەم پڕۆژەیە، دەڵێت "كاتێك برسیمان دەبێت دێین بۆ ماڵی هەژاران بۆ ئەوەی بەخۆڕایی نانی نیوەڕۆ لێرە بخۆین، ئێمە ئەو كەسانەین كە كەمدەرامەتین، لەتواناماندا نیە بچین بۆ چێشتخانەكان، لەبەر ئەوە دێین بۆ ئێرە بۆ نانخواردن، ئێمە ڕۆژانەی كاركردنمان زۆر كەمە تەنها 15 بۆ 20 هەزار وەر دەگرین ئەمە لەكاتێكدا ئەگەر كار هەبێت، ئەم بڕە پارەیەش تەنها بەشی بەڕێوەبردنی ماڵ و منداڵ دەكات".

لەڕاپۆرتێكی بانكی نێودەوڵەتی لەساڵی 2015دا هاتووە كە هاتنی ئاوارە سورییەكان و ئاوارەكانی ناوچەكانی دیكە كوردستانی خستۆتە ژێر بارێكی ئابوری ناجێگیرەوە، كە پێویستی بە بڕی 1.4ملیار دۆلار هەیە بۆ پاڵپشتیكردنیان.