لە کۆشکی سەلامەوە بۆ لای عەبدولمەهدی و حەلبوسی.. واشنتن بەدوای حکومەتێکی نیشتمانیدا دەگەڕێت

کەناڵی ناس کورد لە تێلیگرام جۆین بکە   

ناس کورد- وەک ئەوەى پەیامێکی "بەپەلە و ڕوون و ئاشکرا"ـی واشنتنی پێبێت لەبارەى خۆپیشاندان و ڕووداوەکانى لوبنان و عێراقەوە، دەیڤد هیڵ، یاریدەدەری وەزیری دەرەوەى ئەمریکا بۆ کاروباری سیاسی گەیشتە لوبنان و لەگەڵ بەرپرسانی ئەو وڵاتە کۆبووەوە، دواتر لە بەغدا دابەزی و پەیامەکەى گەیاندە هەرسێ سەرۆکایەتییەکەی عێراق. . لەدوای دابەزینی لە بەغدا، دوێنێ پێنجشەممە، 19ی کانونی یەکەمی 2019، دەیڤد هیڵ، یاریدەدەری وەزیری دەرەوەی ئەمریکا گەیشتە لای عادل عەبدولمەهدی، سەرۆکوەزیرانی کاربەڕێکەری عێراق و کۆبوونەوە. لەدوای کۆبوونەوەکە، نوسینگەى عەبدولمەهدی ڕاگەیاندراوێکی بڵاوکردەوە و ڕایگەیاند، "لە کۆبوونەوەکەیدا لەگەڵ دەیڤد هیڵ، عادل عەبدولمەهدی جەختی کردووەتەوە لە بەردەوامبوونی هاوپەیمانێتی ستراتیژی لە نێوان ئەمریکا و عێراقدا". . هەر بەپێی ڕاگەیەنراوەکە، عەبدولمەهدی داوای لە ئەمریکا کردووە بەردەوام بێت لە پاڵپشتیکردنی دامەزراوە دەستورییەکانی عێراق. . دواتر دەیڤد هیڵ لەگەڵ محەمەد حەلبوسی، سەرۆکى پەرلەمانی عێراقدا کۆبوونەوە و نوسینگەکەشی دەڵێت، "هەردوولا جەختیان لە گرنگی پەیوەندییەکان نێوان هەردوو وڵات کردووەتەوە". . بەپێی ڕاگەیەنراوەکە، دەیڤد هیڵ داوای لە حەلبوسی کردووە "بەربژێرکردنی کەسێک بۆ پۆستی سەرۆکوەزیرانی عێراق دەبێت بە بڕیارێکی نیشتیمانی بێت و پێویستە دوور بێت لە دەستێوەردانی دەرەکی، ئەو کەسەش کە بەربژێردەکرێت دەبێت لە ئاست داواکاری و ئامانجی گەلی عێراقدا بێت". دواتر دەیڤد هیڵ خۆی گەیاندە کۆشی سەلامی سەرۆکایەتی و لەگەڵ بەرهەم ساڵح، سەرۆککۆماری عێراق کۆبووەوە. . لە ڕاگەیەنراوی نوسینگەی سەرۆککۆماردا هاتووە، "هیڵ لە دیدارەکەیدا لەگەڵ سەرۆککۆمار، جەختی لەوە کردووەتەوە کە ئەمریکا بەردەوام دەبێت لە پاڵپشتیکردنی عێراق تا ئەوکاتەی عێراقییەکان دەتوانن لە وڵاتی خۆیاندا بە ئازادی و بە ئاشتی و سەربەستی بژین". . بەرهەم ساڵح داواشی لە هیڵ کردووە "ئەم دۆخەی ئێستا عێراقی تێدا دەگوزەرێت بە بڕیاری نیشتیمانی عێراقییەکان چارەسەربکرێت و دور بێت لە هەموو دەستێوەردانێکی دەرەکی".