گه‌ڕان

Shadow Shadow

پەرلەمانى ئەوروپا پڕۆژە بڕیارێکى دژى حکومەتى ئێران پەسەند کرد

2019.12.19 - 22:03
App store icon Play store icon Play store icon
پەرلەمانى ئەوروپا پڕۆژە بڕیارێکى دژى حکومەتى ئێران پەسەند کرد

کەناڵی ناس کورد لە تێلیگرام جۆین بکە   

ناس کورد- کاردانەوەکان لەدژى سەرکوتکردنى خۆپیشاندانەکانى ئێران بەردەوامە و ئەمڕۆش پەرلەمانى ئەوروپا پڕۆژە بڕیارێکى دژى بەرپرسانى ئەو وڵاتە پەسەند کرد و داواشى لەحکومەتى ئێران کرد دەستبەجێ زیندانى کراوەکان ئازاد بکات و ژمارەى قوربانییەکانیش ئاشکرا بکات. . ئەمڕۆ (پێنجشەممە، 19ى کانونی یەکەمی 2019)، پەرلەمانى ئەوروپا لە دانیشتنى ئاسایى خۆیدا پڕۆژە بڕیارێکى بەناونیشیانى (بەکارهێنانى توندوتیژى بەرپرسانى ئێران لەدژى خۆپیشاندەرانى ئاشتیخواز) پەسەند کرد و تیایدا ئیدانەى سەرجەم ئەو ڕێوشوێنانە کرا  کە ئەو وڵاتە بۆ سەرکوتکردنى خۆپیشاندانەکانى ئەم دواییە گرتویەتیە بەر. . لەپڕۆژە بڕیارەکەدا پەرلەمانى ئەوروپا داوای لە بەرپرسانى ئێرانکردووە، ژمارەى کوژراوانى نێو خۆپیشاندانەکان ئاشکرا بکەن و سەرجەم ئەو کەسانەشی  بەهۆی بەشداریکردن لە خۆپیشاندانەکان دەستگیرکراوون، بەزووترین کات ئازاد بکرێن. . هەر لە پڕۆژ بڕیارەکەى پەرلەمانى ئەوروپادا کە بەدەنگى زۆرینەى ئەندامانى پەسەندکرا، داوا کرا بەپەلە تاران لێکۆڵینەوەى خێرا و بێلایەنانە و شەفاف لەو ڕووداوانە دەستپێبکات و سەرجەم ئەو هێز و بەرپرسانەى بەتوندوتیژى و کوشتنى خەڵک تۆمەتبارن، بداتە دادگا. . هاوکات پەرلەمانى ئەوروپا داواشى لە ڕێکخراوى مافى مرۆڤى سەر بەنەتەوە یەکگرتووەکان کردووە، بێ دواکەوتن دەستبکات بە لێکۆڵینەوە لە بارودۆخى ڕووداوەکانى خۆپیشاندانەکانى ئێران. . لە سەرەتای مانگی ڕابردووەوە، بەهۆى گرانکردنى نرخى بەنزینەوە بۆ سێ بەرامبەر لە نرخی پێشوتری، شەپۆلێکى خۆپیشاندان زۆربەى شارەکانى ئێرانى گرتەوە و بەهۆی توندوتیژی هێزە ئەمنییەکانیش بەرامبەر خۆپیشاندەران بە سەدان کەس کوژران، بەڵام تا ئێستا بەرپرسانى ئێران ژمارەى کوژراوەکانیان بەفەرمى ڕانەگەیاندووە و تەنها ئاماژەیان بەژمارەیەک سەربازى کوژراوى ئێران لەو ڕوداوانەدا کردووە. .