سیستەمى دابەشکردنى کارەباى هەرێم بە تەواوى دەگۆڕدرێت

کەناڵی ناس کورد لە تێلیگرام جۆین بکە   

ناس کورد-   بە دانانى پێوەرى زیرەکى کارەبا و خستنەگەڕى سیستەمەکە، شێوازى دابەشکردنى کارەبا لە هەرێمى کوردستان بەتەواوى گۆڕانى بەسەردا دێت و هەر بەکارهێنەرێک کارەباى زیاد بەکاربهێنێت بە بڕینى کارەبا سزا دەدرێت. . کارکردنى سیستەمەکە بەجۆرێکە، بۆ رێگریکردن لە زیاد بەکارهێنانى کارەبا لەلایەن هاوڵاتییانەوە جۆزەیەک لەناو ماڵەکان دادەنرێت و لەکاتی زۆر بەکارهێناندا هەڵدەستێتەوە. . سیستەکە بەشێوەى ئۆتۆماتێکى و بۆ ماوەى جیاواز کارەبا لەهەر بەکارهێنەرێک دەکوژێنێتەوە، کە زیاد لە ئاستى خۆى کارەبا بەکاربهێنێت، بەجۆرێک لە ئەگەرى زیاد بەکارهێنانى کارەبا بۆ ماوەى 45 چرکە، ماوەى 150 چرکە کارەبا لەو بەکارهێنەرە دەبڕدرێت. . هەروەها ئەگەر لەماوەى 30 خولەکدا چەند جارێک کارەبا زیادبەکاربهێنرێت و تێکڕاى ماوەى زیادبەکارهێنانى کارەبا بگاتە 45 چرکە، بۆ ماوەى 150 چرکە کارەباى بەکارهێنەر دەبڕدرێت. ئەگەر بەهۆى زیادبەکارهێنانى کارەباوە لە 30 خولەکدا پێنج جار لەسەریەک کارەبا ببڕێت، کارەباى بەکارهێنەر بۆ ماوەى 45 خولەک دەبڕدرێت ئومێد محەمەد وتەبێژى وەزارەتى کارەبا بە ناس کوردى ڕاگەیاند، پێوەرەکە ئەمپێرى بۆ دانەنراوە، بەڵکو ئاستى بەکارهێنانى کارەبا پەیوەندى بە زۆرى و کەمى بڕى بەهەمهێنانى ئەو وزەیەوە هەیە. . ڕونیشیکردەوە " بۆ نمونە ئەگەر بەرهەمهێنانى کارەبا بگاتە 3500 مێگاوات، هەر ماڵێک 10 ئەمپێرى پێدەدرێت، ئەگەر بڕەکە زیاتر بوو، ئەمپێرى زیاترین پێدەدرێت، بە پێچەوانەوە ئەگەر بەرهەم کەمبووەوە، پێدانى ئەمپێر کەمدەکات". . ئومێد محەمەد جەختیکردەوە، دیاریکردنى ئەمپێرەکان لە ڕێگەى سیستەمێکى ناوەندییەوە دەبێت کە کۆنتڕۆڵى کارەباى هەرێم دەکات، ئەوەش بە مەبەستى هاوسەنگى ڕاگرتن لە دابەشکردنى کارەبادا، تا هەموو هاوڵاتییان وەک یەک ئەو وزەیەیان پێبگات. . پێوەرەکە بە پڕۆگرامی سۆفت وێر کاردەکات و چەندین تایبەتمەندی تێدایە و توانای وێنەگرتنیشی هەیە، حکومەت بە بێبەرامبەر بە سەر هاوبەشەکانیدا دابەشیدەکات.