خۆپیشاندان لە بەغدا و چوار پارێزگاى دیکە دەستیپێکردەوە

کەناڵی ناس کورد لە تێلیگرام جۆین بکە   

ناس کورد- خۆپیشاندان لە پارێزگاکانى بەغدا و زیقار و بابل و دوانییە و موسەننا دەستیپێکردەوە و خۆپیشاندانەکان گوڕى ڕۆژانى ڕابردوویان بۆ گەڕاوەتەوە. . گۆڕەپانى تەحریرى بەغدا دواى شەوێکى خوێناوى، ئەمڕۆ ئارامى بۆ گەڕایەوە، خۆپیشاندەران پەیتا پەیتا لە گۆڕەپانەکە کۆبوونەوە. پەیامنێرى ناس لەبەغدا ڕایگەیاند، هێزەکانى بەرەنگاربونەوەى خۆپیشاندەران، بەتەواوى کۆنترۆڵى گۆڕەپانى خلانى و پردى سنکیان لە ناوەڕاستى بەغدا کردووە و بەربەستى کۆنکرێتییان بەکارهێناوە بۆ ئەوەى خۆپیشاندەران تەنها لە گۆڕەپانى تەحریر بمێننەوە. . جگە لە بەغدا، چەند پارێزگایەکى دیکەى ناوەڕاست و باشورى عێراق، ئەمڕۆ خۆپیشاندانیان بەخۆوە بینى و ژمارەى بەشداربووان ڕوویان لەزیادبوون کرد. پەیامنێرى ناس ڕایگەیاند، لە پارێزگاى زیقار هێزە ئەمنییەکان بۆمبى دوکەڵیان بەکارهێناوە لەدژى خۆپیشاندەران لە نزیک پەروەردەى پارێزگاکە بۆ بڵاوەپێکردنى خۆپیشاندەران. . بەپێی چەند سەرچاوەیەکى ڕاگەیاندن، 31 کەس بەهۆى خۆپیشاندانەکانەوە برینداربوون. . هاوکات لەگەڵ ئەو خۆپیشاندانەدا، سەدان خوێندکارى زانکۆ چوونە ڕیزى خۆپیشاندەرانەوە و دروشمیان دژى حکومەت بەرزکردووەتەوە. لە پارێزگاى بابل بەوتەى پەیامنێرى ناس، خۆپیشاندەران ڕێگریان کردووە فەرمانبەران بچنە ناو بەڕێوەبەرایەتى پەروەردەى پارێزگاکەوە و بەڕێوەبەرایەتییەکەیان داخستووە. . هەروەها لە پارێزگاى دیوانییە، خوێندکاران ڕژاونەتە سەر شەقام و پشتیوانیان لە مانگرتنى کراوە کردووە لەناوەڕاستى شارەکە. . لە موسەناش، خوێندکارانى زانکۆى موسەننا خۆپیشاندانیان ئەنجامدا.