گه‌ڕان

Shadow Shadow
سیاسه‌تی

زیاتر بزانە

بەرپرسێکی ئێرانی لەبارەى هێرشی زەمینی بۆسەر هەرێمی کوردستان لێدوانی دا

2022.11.22 - 13:34
App store icon Play store icon Play store icon
بەرپرسێکی ئێرانی لەبارەى هێرشی زەمینی بۆسەر هەرێمی کوردستان لێدوانی دا

ناس کورد-

محەمەد کازم ئال سادق، باڵیۆزی ئێران لە عێراق ڕەتی کردەوە وڵاتەکەی هیچ نیازێکی هەبێت بۆ ئەنجامدانی هێرشی وشکانیی بۆسەر ناوچە سنوورییەکان لە هەرێمی کوردستان.

کەناڵی ناس کورد لە تێلیگرام جۆین بکە   

 

محەمەد کازم ئال سادق لە بەشێکی هەڤپەڤینێکدا لەگەڵ کەناڵی "ئەلعالم-ی ئێرانی کە بە زمانی عەرەبی هەواڵ و بەرنامەکانی بەخش دەکات باسی لە ئەگەری هێرشی وشکانیی لەلایەن ئێرانەوە بۆسەرناوچە سنوورییەکان لە هەرێمی کوردستان، هەروەها سەردانەکەی چەند رۆژی رابردووی فەرماندی فەیلەقی قودس سەربە سوپای پاسداران، ئیسماعیل قائانی بۆ بەغدا و پەیوەندییەکانی ئێران لەگەڵ رەوتی سەدر كرد.

 

باڵیۆزی ئێران لە عێراق لەبارەی ئەگەری هێرشی وشکانیی لەلایەن ئێرانەوە بۆسەرناوچە سنوورییەکان لە هەرێمی کوردستان گوتی: "پرسی جموجۆڵی وشکانیی نەخراوەتە بەر باس و لەسەر ئاستی باڵادا، باسی لێوە نەکراوە، ئێمە رێز لە سەروەری عێراق دەگرین و زۆرمان بۆ سەقامگیری عێراق و یەکپارچەیی و گەلی عێراق و لە پێناو خۆشگوزەرانی عێراقدا کردووە، عێراق وڵاتێکی دراوسێی گەورەیە کە ئێمە پەیوەندی مێژوو، جوگرافیا، ئایدیۆلۆجیا و سیاسییمان لەگەڵدا هەیە، جگە لەوەیش هێڵێکی دوور و درێژی سنووریی لەنێوانماندا هەیە، هەروەها پەیوەندیی کۆمەڵایەتیی پێکەوە دەمان بەستێتەوە، وەک ئەوەی لەنێوان هۆزەکاندا هەیە، چی لەنێوان هۆزەکانی ناوچەی کوردستان یان لە باشووری عێراق و باشووری ئێران، هۆزەکان نیوەیان لە ئێرانن و نیوەی دیکەیشیان لە عێراقن، پەیوەندییەکی زۆر پتەو لەنێوان گەلانی عێراق و ئێراندا هەیە، بۆیە ئەوە لەئارادا نییە کە کۆماری ئیسلامی نیازی ئەنجامدانی هێرشی وشکانیی هەبێت، ئێمە زۆر لەگەڵ براکانمان لە ناوچەی کوردستانین، پێشتر لیژنەیەکی ئەمنی هاوبەش لەنێوان هەرێمی کوردستان و بەرپرسانی کۆماری ئیسلامی پێکهێنراوە، بۆ ئەوەی چارەسەر بدۆزرێتەوە".

 

محەمەد کازم ئال سادق لەبارەی سەردانەکەی چەند رۆژی رابردووی فەرماندی فەیلەقی قودس، ئیسماعیل قائانی بۆ بەغدا ئاشکرای کردووە کە ئیسماعیل قائانی بەرپرسی دۆسیەی عێراقە لە کۆماری ئیسلامی ئێران و زۆر ئاساییە ناوە ناوە سەردانی عێراق دەکات و گوتی: "سەرجەم سەردانەکانی فەرماندی فەیلەقی قودس، ئیسماعیل قائانی بۆ بەغدا بەشێوەیەکی فەرمی و بەهەماهەنگیی لەگەڵ بەرپرسانی عێراق ئەنجام دەدرێت کە لە میانیدا لەگەڵ هەرسێ سەرۆکایەتییەکەی عێراق و سەرکردەی لایەنە سیاسییەکان کۆدەبێتەوە".

 

باڵیۆزی ئێران لە عێراق، محەمەد کازم ئال سادق پەیوەندییەکانی ئێران لەگەڵ رەوتی سەدر بەرز نرخاند و ئاماژەی بەوەداوە، تاران لەگەڵ ئەودا نەبووە کە رەوتی سەدر لە حکوومەتی عێراق بکشێتەوە و هیوای خواست کە رەوتی سەدر لە پێناو خزمەتکردنی گەلی عێراق، دووبار بگەڕێتەوە نێو پڕۆسەی سیاسیی لە عێراق.