گه‌ڕان

Shadow Shadow
سیاسه‌تی

لە هەرێم و رۆژئاواى کوردستان

تورکیا ئەنجامى رۆژى یەکەمى ئۆپراسیۆنەکەى راگەیاند

2022.11.20 - 21:43
App store icon Play store icon Play store icon
تورکیا ئەنجامى رۆژى یەکەمى ئۆپراسیۆنەکەى راگەیاند

ناس کورد-

 

وەزارەتی بەرگری تورکیا ڕایگەیاند، لەیەکەم رۆژى ئۆپراسیۆنەکەیاندا لە رۆژئاواى کوردستان و هەرێمى کوردستان، 89 ئامانجیان خاپورکردووە، ئەمەش لە کاردانەوەی تەقینەوەکەى هەفتەیەک لەمەوبەرى ئەستەنبوڵ کە بووە هۆی کوژرانی شەش کەس.

کەناڵی ناس کورد لە تێلیگرام جۆین بکە   

 

وەزارەتەکە لە بەیاننامەیەکدا ئاماژەی بەوەکردووە، هێرشەکان بنکەکانی پارتی کرێکارانی کوردستان (پەکەکە) و یەکینەکانی پاراستنی گەل (یەپەگە)ی کردووەتە ئامانج.

 

حکوومەتی تورکیا گروپە کوردەکانی بە بەرپرسیار زانی لە تەقینەوەکەى 13ی ئەم مانگەى ئەستەنبوڵ کە بەهۆیەوە 6 کەس کوژران و زیاتر لە 80 کەسیش برینداربوون، هیچ کەس بەرپرسیارێتی خۆی لە تەقینەوەکە ڕانەگەیاند و پەکەکە و یەپەگەش رەتیانکردەوە ئەوان ئەنجامیان دابێت.

 

وەزارەتی بەرگری تورکیا دەڵێت، هێرشەکان قەندیل، ئاسۆس و خواکورک لە عێراق،  کۆبانی و تەلرەفعەت، جەزیرە و دێریکیان لە باکووری سوریایان کردووەتە ئامانج.

 

ئاماژەی بەوەشکردووە، 89 ئامانج لەناوبراون، لەوانە پەناگە و تونێل و کۆگای تەقەمەنی.

 

وتەبێژی هێزەکانی سوریای دیموکرات ڕایگەیاند، بەهۆی هێرشەکانی تورکیا ژێرخانی چەند ناوچەیەک خاپوور بوون، لەوانە سایلۆی دانەوێڵە و وێستگەیەکی کارەبا و نەخۆشخانەیەک.

 

فەرهاد شامی، بەرپرسی ناوەندی ڕاگەیاندنی هەسەدە  لە تۆڕی کۆمەڵایەتیی (تویتەر) نووسیویەتی، 11 هاوڵاتی مەدەنی کە لە نێویاندا ڕۆژنامەنووسێک هەیە کوژراون.

 

لە بەیاننامەیەکدا، هێزەکانی سوریای دیموکرات بەڵێنیدا وەڵامی هێرشەکانی تورکیا بداتەوە، جەختیشیکردەوە هێرشەکە بێ وەڵام نابێت.

 

دوای چەند کاتژمێرێک، ئاژانسی هەواڵی ئەنادۆڵی سەر بە دەوڵەتی تورکیا بڵاویکردەوە، لە هێرشێکی مووشەکیدا بۆ سەر پارێزگای کیلیسی تورکیا کە هاوسنوورە لەگەڵ سوریا، سەربازێک و دوو پۆلیس برینداربوون.

 

ئاژانسەکە ڕایگەیاندووە کە مووشەکەکە بەر ناوچەیەکی نزیک دەروازەیەکی سنووری کەوتووە.