گه‌ڕان

Shadow Shadow
سیاسه‌تی

وردەکاریی

قائانى هەڕەشەى هێرشى زەمینى بۆ سەر هەرێم دەکات

2022.11.18 - 23:31
App store icon Play store icon Play store icon
قائانى هەڕەشەى هێرشى زەمینى بۆ سەر هەرێم دەکات

ناس کورد-

 

چەند بەرپرسێکى عێراقی و کوردى دەڵێن، بەرپرسێکی باڵای سەربازی ئێران کە ئەم هەفتەیە سەردانی بەغدای کردووە، هەڕەشەی هێرشى زەمینى کردووە بۆ سەر هەرێمى کوردستان، ئەگەر سوپاى عێراق سنوورەکان نەپارێزێت.

کەناڵی ناس کورد لە تێلیگرام جۆین بکە   

 

ئاژانسى ئەسۆشیەتید پرێس بڵاویکردەوە، هۆشدارییەکە لەم هەفتەیەدا لەلایەن ئیسماعیل قائانى فەرماندەی فەیلەقى قودسی سوپاى پاسدارانەوە گەیەنراوەتە بەرپرسانی عێراقی و کورد لە بەغدا، کە رۆژى دووشەممە بە سەردانێکی دوو ڕۆژە و ڕانەگەیەندراو گەیشتە بەغدا. 

 

ئێران بانگەشەى ئەوە دەکات کە گرووپە کوردییەکانی ئۆپۆزسیۆنى ئێران کە ماوەیەکی زۆرە لە هەرێمى کوردستانن، ناڕەزایەتی دژ بە حکومەت لە ئێران هان دەدەن و چەک بە قاچاخ دەبەنە ناو ئەو وڵاتە. دەسەڵاتدارانی ئێران بەڵگەیان لەسەر ئەو تۆمەتانە نەخستۆتەڕوو کە گروپە کوردییەکان ڕەتى دەکەنەوە.

 

دیار نییە هۆشداری ئێران چەندە جددییە، بەڵام بەغدا دەخاتە دۆخێکی سەختەوە. ئەوە یەکەمجارە بەرپرسانی ئێران بە ئاشکرا هەڕەشەى ئۆپەراسیۆنی زەمینی دەکەن دوای چەند مانگێک لە گرژییەکانی سنوور بەزاندن و داواکردن لە عێراق بۆ چەکداماڵینی گروپە ئۆپۆزسیۆنەکان.

 

بەرپرسانی عێراق ڕایانگەیاندووە کە هیچ بەڵگەیەک نابینن بۆ پشتگیریکردن لە تۆمەتەکانی ئێران دژی گروپە کوردییەکان.

 

"بەرپرسانی ئەمنی عێراق چەندین جار هەوڵیان داوە تاران ڕازی بکەن کە هیچ چەکێک لە عێراقەوە بە قاچاخ نابرێتە ئێران، بەڵام ئێران ئەمە پشتگوێ دەخات"، ئەوەش بەوتەی بەرپرسێکی باڵای کورد کە بە مەرجی ئەوەی ناوی ئاشکرا نەکرێت بۆ ئاژانسەکە قسەى کردووە.