گه‌ڕان

Shadow Shadow
سیاسه‌تی

کتێبێکى سەدام لە پێشانگاى کتێب لە سلێمانى مشتومڕ دەنێتەوە

2022.11.18 - 22:07
App store icon Play store icon Play store icon
کتێبێکى سەدام لە پێشانگاى کتێب لە سلێمانى مشتومڕ دەنێتەوە

ناس کورد-

 

کتێبێکى سەدام لە پێشانگاى نێودەوڵەتى کتێب لە سلێمانى مشتومڕ دەنێتەوە و وەزارەتى رۆشنبیریش دەڵێت قەدەغەی کردووە.

کەناڵی ناس کورد لە تێلیگرام جۆین بکە   

 

 گۆڤاری تۆپزاوە و رێکخراوی کوردستان بێ جینۆساید لە راگەیەنراوێکى هاوبەشدا رایانگەیاند "بە داخەوە بۆ ساڵی دووەم، لە پێشانگای نێودەوڵەتی کتێب لە شاری سلێمانی، کتێبێکی تاوانبارانی جینۆسایدی گەلی کورد نمایش دەکرێت و لەئێستادا کتێبێکی دیکتاتۆر و تاوانباری جینۆساید (سەدام حوسێن) نمایشکراوە بە ناوی (زبیبة و الملك)، کە لە نووسینی تاوانبارە خۆیەتی".

 

دواى ئەو مشتومڕانەى لەسەرکتێبەکە سەریانهەڵدا، وەزارەتى رۆشنبیرى نمایشکردنى کتێبەکەى لە پێشانگاکە قەدەغەکرد.

 

شیروان عەبدوڵڵا بەڕێوەبەری گشتیی راگەیاندن و چاپی وەزارەتی رۆشنبیریی لە لێدوانێکى تەلەفزیۆنیدا وتى "دوێنێ ئاگادارکراونەتەوە لەو کتێبە و ئەوانیش کتێبەکەیان لە پێشانگەکە لابردووە".

 

دەقى راگەیەنراوەکە:

 

راگەیاندراوێکی هاوبەشی گۆڤاری تۆپزاوە و رێکخراوی کوردستان بێ جینۆساید

لە پێشانگای نێودەڵەتی کتێب لە سلێمانی چ دەگوزەرێت؟

 

بە داخەوە بۆ ساڵی دووەم، لە پێشانگای نێودەوڵەتی کتێب لە شاری سلێمانی، کتێبێکی تاوانبارانی جینۆسایدی گەلی کورد نمایش دەکرێت و لەئێستادا کتێبێکی دیکتاتۆر و تاوانباری جینۆساید (سەدام حوسێن) نمایشکراوە بە ناوی (زبیبة و الملك)، کە لە نووسینی تاوانبارە خۆیەتی.

وەك لە بەرگی کتێبەکە ئاماژەی بۆ کراوە، راسپاردەی سیاسی تاوانبارە و بە شێوەی رۆمان نووسیوویەتی.. هاوکات بەپێی کورتەیەك لە بەرگی پشتەوەی کتێبەکە نوسراوە، ئەم کتێبە پیاهەڵدان بە سەدام حوسێنی تاوانبار و سیاسەتەکانی.

ئێمە لە گۆڤاری (تۆپزاوە) تایبەت بە پرسی جینۆساید و ئەنفال و رێکخراوی کوردستان بێ جینوساید، داوا لە وەزارەتی ڕۆشنبیری و لاوان و بەڕێوبەرایەتی گشتی ڕۆشنبیری سلێمانی دەکەین، رێکاری پێویست دژ بەو ناوەندانە بگرنەبەر، کە کتێب و بڵاوکراوەی پیاهەڵدان بە ڕژێمی بەعس و تاوانبارانی جینۆسایدی گەلەگەمان لە پێشانگای کتێب نمایش دەکەن.

بە داخەوە ئەمە جاری یەکەم نییە و ساڵی رابردووش، لە پێشانگای نێودەوڵەتی کتێب لە سلێمانی، کتێبێکی تاوانباری ئەنفال (سوڵتان هاشم) نمایش کرابوو.. کە تێیدا نکۆڵی لە تاوانی ئەنفال دەکرد.

ئەم جۆرە کارانە، جیا لەوەی دەچێتە خانەی پیاهەڵدان بە ڕژێمی بەعس، هاوکات سوکایەتیە بە قوربانیانی جینۆسایدی گەلەکەمان.

ئەم جۆرە لە پێشیلکارییانە بەرانبەر بە قوربانیانی جینۆساید لە کاتێکدایە، ماوەی ساڵێکە لەگەڵ هاوبەشەکانمان لە رێکخراوەکانی بواری جینۆساید، کار بۆ بە تاوانناساندنی پیاهەڵدان بە ڕژێمی بەعس دەکەین.

هە بۆ ئەو مەبەستە، دوو مانگ لەمەوبەر لە (2022/9/6)، وەك گۆڤاری تۆپزاوە بە هاوبەشی رێکخراوی کوردستانی بێ جینۆساید، کۆنفڕانسێکی تایبەت بە تاوانناساندی پیاهەڵدان بە ڕژێمی بەعس لە شاری کەرکوک سازکرد و یەکێک لە پانێڵەکانی کۆنفڕانس تایبەت بە نوێنەرانی وەزارەتەکانی ڕۆشنبیری و شەهیدان و کاروباری ئەنفالکراوان بوو.

بۆیە داوا له وەزارەتی ڕۆشنبیری ولاوان وبەڕێوبەرایەتی ڕۆشنبیری سلێمانی دەکەین، بە زووترین کات ئەو کتێبانەی دەچنە خانەی پیاهەڵدان بە تاوانبارانی جینۆساید گەلەکەمان و سوکایەتی بە قوربانیانی جینۆساید لە پێشانگای کتێب قەدەغە بکەن و رێکاری توند بەرانبەر بەو ناوەندانە بگرنەبەر، کە ئەم جۆرە کتێبانە نمایش دەکەن.

گۆڤاری تۆپزاوە .. تایبەت بە پرسی جینۆساید و ئەنفال

رێکخراوی کوردستان بێ جینۆساید

2022/11/18