ناس کورد-
رێککەوتن لەسەر یاساى نەوت و گاز و پێداچوونەوە بە سیاسەتى نەوتى هەرێم کراوتە مەرجى رێککەوتنى هەرێم و بەغدا لەسەر نه‌وت و بودجه، بەو پێیە چاوەڕواندەکرێت تا یەکلاکردنەوەى ئەو دۆسیەیە بەغدا پارە بۆ هەرێم نەنێرێت.
کەناڵی ناس کورد لە تێلیگرام جۆین بکە
به‌گوێره‌ی خاڵی 23ى کارنامەکەى محەمەد شیاع سودانى کە دەست "ناس کورد" کەوتووە، به پاڵپشتی ئه‌و هێزه سیاسییانه‌ی له‌سه‌ر ئه‌و كارنامه‌یە رێككه‌وتوون، حكومه‌تی هه‌رێم و حكومه‌تی عێراق رادەسپێردرێن بۆ گفتوگۆكردن له‌سه‌ر دۆسیه‌ی نه‌وت و بودجه تا ده‌ركردنی پرۆژه یاسای نه‌وت و غاز به‌گوێره‌ی ده‌ستوور له‌ماوه‌ی شه‌ش مانگدا.
ئاماژە بەوەشکراوە، بۆ دارشتنی پرۆژه یاسای نه‌وت و غاز، لیژنه‌یه‌كی تایبه‌تمه‌ند به كاروباری یاسایی، دارایی و سووته‌مه‌نی له‌لایه‌ن حكومه‌تی هه‌رێمی كوردستان و عێراق پێكده‌هێندرێت.
هەر بەپێی کارنامەکە، کابینەى سودانى خۆى بەدور دەگرێت لەگرتنەبەرى هەر رێوشوێنێک دژى هەرێمى کوردستان کۆمپانیا نەوتییەکان و دواخستنى رێوشوێنەکان لەو بارەیەوە، ئەوەش بۆ دورخستنەوەى مەترسی لەسەر ئابورى وڵات.
ئاماژە بەوەشکراوە، هەردوولا بە شەفافى کاردەکەن بۆ داڕشتنى پڕۆژە یاساى نەوت و غاز لەماوەى شەش مانگدا.
هەر لە کارنامەکەیدا سودانى بەڵێنیداوە کاربکات بۆ هەموارکردنەوەى یاساى هەڵبژاردنى پەرلەمان لەماوەى سێ مانگدا و ئەنجامدانى هەڵبژاردن لەماوەى ساڵێکدا.
