ناس کورد-
ئەندامێکى مەکتەبی سیاسی یەکێتى جەختدەکاتەوە، حزبەکەى چاوى لە دوو وەزارەتى کابینەکەى سودانییە و بۆ ئەوەش روویان لە سەرۆک وەزیرانى راسپێردراوە نەک پارتی، چونکە ئەوە حکومەتی پارتی نییە تا داوای وەزارەتی لێ بکەن.
کەناڵی ناس کورد لە تێلیگرام جۆین بکە
ستران عەبدوڵلا (24-10-2022) بە میدیاى حزبەکەى وت "بەشێکی زۆری پرۆسەی سیاسی لە عیراقدا لەسەر دوو بنەمایە، ھەم لەسەر دەنگ و ھەم لەسەر سەنگ، واتە ھەم لەسەر ژمارەی کورسییەکان و ھەم لەسەر سەنگی سیاسی لایەنە سیاسییەکانیش".
وتیشی "بەگوێرەی ئەو بەرکەوتنانە بێگومان چوار وەزارەت بەر کورد دەکەوێت و لەناو کوردیشدا وەکو یەکێتیی پێمان وایە دوو وەزارەت شایستەی یەکێتییە".
ستران عەبدوڵڵا ئاماژەی بۆ ئەوەش کرد کە قسە و قسەڵۆک زۆرە "وەکو چۆن لە مەسەلەی سەرۆکایەتی کۆماردا ھەمان ئەو گەڤکردن و خۆگیڤکردنەوە ھەبوو، بەڵام سەرەنجام پۆستەکە بۆ یەکێتیی یەکلایی بووەوە، پێمان وایە بۆ مەسەلەی بەرکەوتەی یەکێتیی لە وەزارەتەکانیشدا سەرکەوتوو دەبین".
