گه‌ڕان

Shadow Shadow
سیاسه‌تی

زانیارى زیاتر

پزیشکى دادى ئێران ’’هۆکارى گیان لەدەستدانى’’ ژینا ئەمینى دیاریکرد

2022.10.07 - 13:44
App store icon Play store icon Play store icon
پزیشکى دادى ئێران ’’هۆکارى گیان لەدەستدانى’’ ژینا ئەمینى دیاریکرد

ناس کورد-

 

پزیشکى دادى ئێران راپۆرتى خۆى لەبارەى هۆکارى گیان لەدەستدانى ژینا ئەمینى راگەیاند.

کەناڵی ناس کورد لە تێلیگرام جۆین بکە   

 

بەپێی راپۆرتەکە، ژینا ئەمینی لە رۆژی 13-09-2022 تووشی بوورانەوە بووە، سی تی سکانی مێشک و سییەکانى دەریدەخات کە هۆکاری گیانلەدەستدانەکەی بەهۆی بەرکەوتنی زەبر بەر سەر و جەستەی نەبووە.

 

ئاماژە بەوەشکراوە، ژینا لە هەشت ساڵیدا و دواى نەشتەرگەرییەک تووشى کێشە بووە لە کۆئەندامى دەمارى و لەکاتى دەستگیرکردنى جەستەى بەرگەى ئەو دۆخەى نەگرتووە و بەهۆیەوە گیانى لەدەستداوە.

 

پێشتر ساڵح نیکبەخت، پارێزەری خانەوادەی ژینا ئەمینی (مەهسا ئەمینی) رایگەیاندبوو، بەپێی ڕای پزیشکە بەناوبانگ و تایبەتمەندەکان و ئەو کەسانەی کە ڕاوێژی پێکراوە، ژینا "بەدڵنیاییەوە" لێیدراوە و ئەوەش هۆکاری مردنی بووە.  

 

نیکبەخت بە ڕۆژنامەی "اعتماد"ی ڕاگەیاندووە، "بە ڕای من و هەمیش پزیشکە بەناوبانگ و کەسانی شارەزا کە ڕاوێژیان پێکراوە، بەدڵنیاییەوە ژینا پێش ئەوەی بگاتە ناوەندی ڕێنمایی تایبەت بە پۆلیس ئەخلاق لێی دراوە، هەروەها ئەگەر زۆرە لەناو ناوەندەکەشدا لێی درابێت”.  


نیکبەخت ئاماژەی بە بوونی "ئاسەواری خوێن لە پشت مل و خوارەوەی کەلـلەی سەری ژینا هەیە" و جەختیکردەوە کە "خوێنی ئەو شوێنانە لەلایەن دایک و باوک و کەسوکاری ژیناوە بینراوە.  


ئەو پارێزەرە داوایەکی بنەماڵەی ژینای ئاشکراکرد بۆ ئامادەبوونی لیژنەیەکی تایبەتمەندی شارەزای نەشتەرگەری دەمار و دڵ بن تاوەکو هۆکاری سەرەکییەکەی ئاشکرا بکرێت.  

 

رێکخراوى مافى مرۆڤى هەنگاو (16-9-2022) بڵاویکردەوە، ژینا ئەمینی (مەهسا ئەمینی) تەمەن ٢٢ ساڵ و خەڵکی سەقز کە ئێوارەی ڕۆژی سێشەممە (١٣ی سێپتەمبەری ٢٠٢٢) لەلایەن هێزەکانی ئیرشادی تاران درایە بەر لێدان و چووبووە دۆخى بێهۆشى، نیوەڕۆی هەینی لە نەخۆشخانەی کەسرای شاری تاران بە هۆی قورسی برینەکانییەوە گیانی لە دەستدا.      

  

بنەماڵەی ئەمینی هەواڵی گیان لەدەستدانی کچەکەیان  پشتڕاست کردەوە.      

  

ژینا ئەمینی لە نزیک شاڕێی حەقانی تاران لەلایەن گەشتی ئێرشاد دراوەتە بەر لێدان و دوای دەستبەسەرکراو گوازرایەوە بۆ زیندانى وزەرای ئەو شارە.      

  

یەکێک لە نزیکەکانی بنەماڵەی ئەمینی لەمبارەوە بە هەنگاوی ڕاگەیاند، ژینا ئەمینی لە کاتی دەستبەسەرکران دراوەتە بەر لێدان و سەری بە سەختی بریندار بووە دوای گواستنەوە بۆ زیندان باری تەندروستی تێک دەچێت و بە ئەمبوڵانس دەیگوازنەوە بۆ نەخۆشخانەی کەسرا.      

  

ئەو سەرچاوەیە ڕایگەیاند، پزیشکەکان بە بنەماڵەی ئەمینییان ڕاگەیاندووە ژینا تووشی جەڵتەی مێشک بووە هیوایەک بۆ باشبوونەوەی نییە.