گه‌ڕان

Shadow Shadow
سیاسه‌تی

سکرتێری ئەنجومەنی وەزیران: هەنگاوى یەکەم نراو ئەرکى وەزارەتەکانە دەستبەکاربن

2022.10.06 - 15:44
App store icon Play store icon Play store icon
سکرتێری ئەنجومەنی وەزیران: هەنگاوى یەکەم نراو ئەرکى وەزارەتەکانە دەستبەکاربن

ناس کورد-

سکرتێری ئەنجومەنی وەزیرانى هەرێم رایگەیاند، بۆ رەخساندنى دەرفەتى کار بۆ هاوڵاتیانى هەرێم لەکەرتى تایبەت هەنگاوى یەکەم نراوە و ئەرکى وەزارەتە پەیوەندیدارەکانە دەستبەکاربن.

کەناڵی ناس کورد لە تێلیگرام جۆین بکە   

 

بەپێی بڕیارێکى حکومەتى هەرێمى کوردستان %75ی دەرفەتەکانی کار لە هەر پڕۆژە و پیشەیەک لە هەرێم دەبێت بۆ هاوڵاتیانی هەرێمی کوردستان بێت و نابێت بەکارخستنی کرێکاری بیانیی لە رێژەی %25 تێپەڕبکات.  

 

ئامانج رەحیم سکرتێری ئەنجومەنی وەزیران لە بڵاوکراوەیەکدا لەبارەى ئەو بڕیارەوە رایگەیاند "ئامانجی سەرەکی لە بڕیارەکە ئەوەیە کە ئەگەر دەرفەتێکی کار لەبار بوو بۆ دوو کەسی خۆماڵیی وبیانی دەبێت ئەولەویەت بۆ هاوڵاتیانی هەرێمی کوردستان بێت بێگومان دەبێت ئەو هاوڵاتیە ئامادەیی کارکردنی هەبێت وئەو توانستانەشی هەبێت کە دەرفەتی کارەکە دەیخوازێت".

 

دەقى بڵاوکراوەکە:

 

١- لە بڕگەی ٤ی ئەم بڕیارە هاتووە کە بەڕێز وەزیری کاروکاروباری کۆمەڵایەتی ڕێنمایی وورد ودرشت بۆ ئاسانکاریی جێبەجێکردنی ئەم بڕیارە دەردەکات بەجۆرێک میکانیزمی جێبەجێکردن و ئەرک ودەسەڵاتەکانی سەنتەری کار وپرۆسەی پێشکەشکردنی داواکانی کار و دەرفەتەکانی کار و هەروەها ڕێکارە یاسایی وسزاییەکانیش لە خۆ دەگرێت پاڵپشت بە یاسای کار و میکانیزمی ئەوەش ئەگەر خوازیاری کار لە ناو هاوڵاتیانی هەرێم نەبوو چۆن دەرفەتەکە پڕبکرێتەوە تا پڕۆژەکان ڕانەوەستن.

 

٢- سەرەڕای ئەوە، ڕێنماییەکی تریش کاری لەسەرکراوە بە ناوی (ڕێنمایی کارکردنی کرێکاری بیانی لە هەرێمی کوردستان) بە هاوکاری ڕێکخراوی کاری نێودەوڵەتی کە دوا ڕەشنووسی گەڵاڵەکراوە و وا بڕیارە بەو زووانە پەسەند بکرێت و بکەوێتە بواری جێبەجێکردن.

 

٣-ئامانجی سەرەکی لە بڕیارەکە ئەوەیە کە ئەگەر دەرفەتێکی کار لەبار بوو بۆ دوو کەسی خۆماڵیی وبیانی دەبێت ئەولەویەت بۆ هاوڵاتیانی هەرێمی کوردستان بێت بێگومان دەبێت ئەو هاوڵاتیە ئامادەیی کارکردنی هەبێت وئەو توانستانەشی هەبێت کە دەرفەتی کارەکە دەیخوازێت، بۆیە ئەمە هاندەرە کە هاوڵاتیان پەرە بە توانستەکانی خۆیان بدەن و وەزارەتی کاریش پابەندکراوە کە خولی ڕاهێنان وشیاندن بکاتەوە و خاوەن کاریش لە ڕێگای کارمەندە بیانیەکانیەوە پابەندە ئەو ڕاهێنانە پیشەیی ئەنجام بدات وەک پابەندییەکی قانونی کە ووردەکاریی ئەم بابەتە چاپتەرێکە لە ڕێنمایی ئاماژەپێدراو.

 

٤-من دڵنیام گەنجانی خۆمان هیچیان کەمتر نیە لە گەنجانی بیانی ئەگەر دەرفەتیان بۆ بڕەخسێت و ڕابهێنرێن و پەرە بە تواناکانیان بدرێت کە ئەمەیان بەرپرسیارێتی حکومەتە کە بە یاسا وڕێنمایی ئەم بابەتە ڕێکبخات وکاری وەزارەتی پەروەردە و خوێندنی باڵاشە پڕۆگرامەکانی خوێندن بە گوێرەی پێداویستی بازاڕ بێت وپەرە بە خوێندنی پیشەیی بدرێت بەتایبەتی لە  بواری بیناسازیی (کارەبایی، بینا، بۆریچی)، خزمەتگوزاریی ڕێستۆرانت وهۆتێل و……)

 

٥- پڕۆژە یاسای نوێی کار کە چەندین ساڵ بوو کاری لەسەر ئەکرا بە هەماهەنگی ڕێکخراوی کاری جیهانی و لە ئەنجومەنی وەزیران پەسەندکرا و ڕەوانەی پەرلەمان کراوە بۆ تەشریع کردنی کە چواچێوەیەکی نوێ لە خۆ دەگرێ بۆ ڕێکخستنەوەی پەیوەندی نێوان خاوەن کار و کرێکار و زۆر ماددە وبڕگە لە خۆ دەگرێت بەجۆرێک زەمانەت ببەخشێ بە هاوڵاتیان کە لە کەرتی تایبەت کاربکەن ودڵنیابن وەک کەرتی گشتی مافەکانیان پارێزراو دەبێت نەک خاوەن کار هەر کات وویستی بە میزاجی خۆی ئیزنی بدات، وبە تایبەتیش مافی خانەنشینیان.

٦- زۆر بواری پیشەیی هەیە کە کاری خزمەتگوزاریی ئاساییە و شارەزایی و کارامەیی پیشەیی تایبەتی ناوێ کە بڵێین تەنها لە بیانیەکان هەن، بێگومان ئەم جۆرە دەرفەتانە پێویستی بە هێنانی بیانی نیە تا هاوڵاتی خۆمان ڕاوەستابێت. 

 

٧- لە کاتێکدا چەندیین ساڵە دامەزراندنی هەمیشەیی لە دامەزراوەکانی حکومەتی هەرێم بە شێوەیەکی گشتی ڕاوەستاوە ئەرکی حکومەتە کە هێزی کار و دەرفەتی کار لە دەرەوەی کەرتی گشتی وحکومەت ڕێکبخاتەوە بەجۆرێک گەنجەکانمان دەرفەتی یەکسانیان بۆ فەراهەم بکرێ دوور لە هەر جیاکارییەک بەهەر بیانوویەک ئەم بڕیارەی ئەنجومەنی وەزیرانیش هەنگاوێکە بەو ئاڕاستەیە. 

 

٨- گرنگترین خاڵیش پابەند کردنی بیانییەکانە کە دەبێت ڕاهێنان بکەن بە هاوڵاتیانی هەرێم و تواناکانیان پەرەپێبدەن.

 

هاوڕای هەمووتانم کە عیبرەت بە جێبەجێکردنە بەڵام ئەکید هەنگاوی یەکەم بڕیار و هەبوونی ئیرادە و جدیەتە، هەنگاوی یەکەم نرا، و ئیتر کاری وەزارەتە پەیوەندیدارەکانە دەستبەکاربن.

 

ئامانج ڕەحیم 

 

سکرتێری ئەنجومەنی وەزیران