گه‌ڕان

Shadow Shadow
سیاسه‌تی

ڤیدیۆ

لە رۆژى جیهانى مامۆستادا هێرشدەکرێتە سەر بەڕێوەبەرى قوتابخانەیەک 

2022.10.06 - 11:41
App store icon Play store icon Play store icon
لە رۆژى جیهانى مامۆستادا هێرشدەکرێتە سەر بەڕێوەبەرى قوتابخانەیەک 

ناس کورد-كەركوك ناو

 

بەڕێوەبەری قوتابخانەیەک لە قەزای داقوق لەلایەن دوو كەسەوە هێرشى کرایە سەر و بریندارکرا هاوکات لەگەڵ رۆژى جیهانى مامۆستایان، لەکاتێکدا دواى پاككردنەوەی خوێندنگەکەى بە مەبەستی دەستپێكردنی ساڵی نوێی خوێندن دەگەڕایەوە بۆ ماڵ.

کەناڵی ناس کورد لە تێلیگرام جۆین بکە   

 

زێدان عەلی محەمەد بەڕێوەبەری دواناوەندی شەهیدان لە قەزای داقوق لە نەخۆشخانەی گشتی داقوق، دوای وەرگرتنی چارەسەر، بە (كەركوك ناو)ی وت "دوو رۆژ بوو لەگەڵ چەند مامۆستایەكی خوێندنگەكەمان، سەرقاڵی چاككردنەوەی بۆری و هەندێك پێداویستی تری خوێندنگەكە بوین و ئامادەمان دەكرد بۆ ساڵی نوێی خوێندن، كاتژمێر یەكی دواینوەڕۆ دوای ئەوەی مامۆستاكان رۆیشتن، منیش دەرگای خوێندنگەكەم داخست و بە پاسكیل بەرەو ماڵەوە بەڕێكەوتم، كەمێك لە خوێندنگەكە  دوركەوتمەوە، دوو كەس لەدواوە لە پاسكیلەكەمیاندا و كەوتم بەزەویدا".

 

وتیشی "دواتر هەردوكیان بەدار بەربونە گیانم و ئازاریاندام".

 

بەپێی راپۆرتی پزیشكی مامۆستا زێدان سەری شكاوە و دەست و قاچیشی برینداربووە.

 

ئەو بە (كەركوك ناو)ی وت كە سكاڵای تۆماركردووە و دەیەوێت لەڕێی دادگاوە سزای ئەو كەسانە بدرێت كە هێرشیانكردۆتە سەری. هەرچەندە بۆ دەزگاكانی راگەیاندن هیچ كەسێكی تۆمەتبار نەكرد.

 

بەڵام بەپێی زانیارییەكانی (كەركوك ناو) كە لەسەرچاوەیەكی پۆلیسی داقوقەوە وەریگرتووە، گوماندەكرێت دوو لە خوێندكارەكانی پێشوی ئەو خوێندنگەیە هێرشەكەیان ئەنجامدابێت، ئەوەش بەهۆی ئەوەی ساڵی رابردوو دەرنەچون.

 

سەرچاوەكە جەختیكردەوە "ئەو دوو كەسە ماتۆڕسكیلێكیان پێبووە و لەدواوە لە مامۆستاكەیانداوە و دوای كەوتنی مامۆستاكە لەسەر زەوی، بەدار لێیانداوە".

بەپێی پۆلیسی داقوق هێشتا تۆمەتبارەكان دەستگیرنەكراون.

 

روداوەكە هاوكات بوو لەگەڵ رۆژی جیهانی مامۆستایان، هەروەها هاوكاتە لەگەڵ نزیكبونەوەی دەستپێكردنی ساڵی نوێی خوێندنی وەزارەتی پەروەردەی حكومەتی عیراق، كە بڕیارە هەفتەی داهاتوو دەستپێبكات.