گه‌ڕان

Shadow Shadow
سیاسه‌تی

وردەکاریی

کۆمەڵ هەڵوێستى خۆى لەسەر دواکەوتنى هەڵبژاردن و یاسای توندوتیژیی خێزانى راگەیاند

2022.09.24 - 16:55
App store icon Play store icon Play store icon
کۆمەڵ هەڵوێستى خۆى لەسەر دواکەوتنى هەڵبژاردن و یاسای توندوتیژیی خێزانى راگەیاند

ناس کورد-

 

کۆمەڵى دادگەرى کوردستان نەبوونی هیچ جۆرە ئامادەکارییەک بۆ ئەنجامدانی هەڵبژاردن لە کاتی خۆی، دەخاتە ئەستۆى سەرۆکایەتیی هەرێم‌ و حکومەت‌ و پەرلەمان و دەڵێت، هەرجۆرە هەنگاوێک بۆ بێ هیواکردنی هاوڵاتییان‌و دواخستنی هەڵبژاردنەکان ڕەت دەکەنەوە.

کەناڵی ناس کورد لە تێلیگرام جۆین بکە   

 

 ئەنجوومەنی سەرکردایەتیی كۆمه‌ڵ لە بەیاننامەیەکدا (24-9-2022) کە دەست "ناس کورد" کەوتووە ئاماژەى بەوەکردووە، دژی هەر پڕۆژە یاسایەک دەوەستینەوە کە پێچەوانەی بنەما نەگۆڕەکانی ئیسلام بێت‌و، هەموو ڕێگایەکی مەدەنیی‌و یاسایی دەگرینەبەر بۆ ڕێگەگرتن لەوجۆرە یاسایانە بە تایبەت یاسای توندوتیژیی خێزان، کە چەند بڕگەو مادەیەکی تێدایە پێچەوانەی بنەما نەگۆڕەکانی ئیسلام‌و ڕێساو یاسا کارپێکراوەکانی هەرێمی کوردستان.

 

دەقى راگەیەنراوەکە:



ئه‌مڕۆ شه‌ممه‌ 24/9/2022 بە سەرپەرشتیی مامۆستا عەلی باپـیر سەرۆکی کۆمەڵی دادگەریی كوردستان، ئەنجوومەنی سەرکردایەتیی كۆمه‌ل کۆبوونەوەی ئاسایی خۆی له‌شاری هه‌ولێر ئه‌نجامدا.

 

ئەنجوومەنی سەرکردایەتیی کۆمەڵ لە کۆبوونەوەی خۆیدا گفتوگۆی لەسەر چەند پرس‌و بابەتێک کردو، دیدو تێڕوانین‌و هەڵوێستی کۆمەڵی دادگەریی لەبارەیانەوە خرایەڕوو.

 

یەکەم: دژی هەر پڕۆژە یاسایەک دەوەستینەوە کە پێچەوانەی بنەما نەگۆڕەکانی ئیسلام بێت‌و، هەموو ڕێگایەکی مەدەنیی‌و یاسایی دەگرینەبەر بۆ ڕێگەگرتن لەوجۆرە یاسایانە بە تایبەت یاسای توندوتیژیی خێزان، کە چەند بڕگەو مادەیەکی تێدایە پێچەوانەی بنەما نەگۆڕەکانی ئیسلام‌و ڕێساو یاسا کارپێکراوەکانی هەرێمی کوردستانە.

 

هەر لەو بارەیەوە، ئەنجوومەنی سەرکردایەتیی سوپاسی تەواوی ئەو فڕاکسیۆن‌و پەرلەمانتارو حیزب‌و لایەنە سیاسیی‌و ڕێکخراوی زانایانی ئیسلامیی‌و کەسایەتییە ئەکادیمییانە دەکات کە بە هۆشیاریی تەواوەوە ڕووبەڕوی ئەو پرۆژەیاسایە بوونەتەوەو هەڵوێستی ئاینیی‌و نیشتیمانی خۆیانیان دەربڕیوە.

 

دووەم: تایبەت بە بارودۆخی عێڕاق‌و دواکەوتنی هەڵبژاردنی سەرۆک کۆمارو پێکنەهێنانی حکوومەتی ناوەندیی، کۆمەڵی دادگەریی پێیوایە ناوچەکەو جیهان به‌گشتیی بەرەو قەیرانی زیاتر دەڕوات، لەو بارودۆخە ئاڵۆزەدا ناکرێت عێڕاق لە بۆشایی یاسایی‌و دەستورییدا بێت، ئەوەی لە عێڕاقدا دەگوزەرێت لە ناتەبایی نێوان لایەنە سیاسییەکان‌و ڕێکنەکەوتنیان لەسەر هەڵبژاردنی سەرۆک کۆمارو، پێکنەهێنانی حکوومەتی نوێ دەرئەنجامی هەڵبژاردنە پڕ لە ساختەکارییەکەی ساڵی ڕابردووەو، بەشێک لە لایەنە سیاسییەکانە لەسەر دەستکەوتی شەخصیی‌و حیزبیی زیاتر بێ گوێدانە بەرژەوەندیی گشتیی هاوڵاتییانی عێڕاق .

 

بۆیە ئەنجوومەنی سەرکردایەتیی کۆمەڵ داوا دەکات لایەنە سیاسییەکان ناکۆکییەکانیان وەلا بنێن‌و لە خەمی هاوڵاتییاندابن‌و لەسەر پرسە جیاوازەکان ڕێکبکەون، چیتر عێڕاق لە بۆشایی دەستووریی‌و یاساییدا نەمێنێتەوە.

 

سێیەم: ئەنجوومەنی سەرکردایەتیی کۆمەڵی دادگەریی، نزیک بوونەوەی وادەی هەڵبژاردنی پەرلەمانی کوردستان‌و نەبوونی هیچ جۆرە ئامادەکارییەک بۆ ئەنجامدانی لە کاتی خۆی، ئۆباڵی دەخاتە سەر ئەو لایەنە حوکمڕانانەی کە پێکهاتوە لە سەرۆکایەتیی هەرێم‌و حکوومەت‌و پەرلەمان، هەرجۆرە هەنگاوێک بۆ بێ هیواکردنی هاوڵاتییان‌و دواخستنی هەڵبژاردنەکان ڕەت دەکەینەوە.

 

چوارەم: تایبەت بە ڕووداوەکانی ئەم دواییەی ئێران بەهۆی گیان لەدەستدانی خاتوو ژینای سەقزیی دەستیپێکردوە، لە چەند شارو شارۆچکەیەک ناڕەزایی هاوڵاتییانی لێکەوتەوەو لەسەر ئه‌و ڕووداوە، پێویست دەکات بەرپرسانی دەوڵەتی ئێران لە زووترین کاتدا دۆسییەی هۆکاری گیان لەدەستدانی ئەو خاتوونە بەڕوونیی‌و ڕاشکاویی بخەنە بەردەست گەلانی ئێران‌و دەستەبەردکرنی مافی مرۆڤ‌و ئازادییەکان ئەرکی سەرشانی هەر دەوڵەتێکە .

دیارە بێ سەرپۆشیی گوناهە لە ئیسلامدا، بەڵام تاوانێک نیە کە مرۆڤ لەسەری بگیرێت یان بکوژرێت، بەڵام ناکرێت ئەو ڕووداوە بکرێتە هۆکاری سووکایەتیی بە پیرۆزییەکانی ئیسلام‌و مسوڵمانان .

داواکارین هەموولایەک بە هەستکردن بە بەرپرسیارێتییەوە لەگەڵ ڕووداوەکان هەڵسوکەوت بکەن.

 

ئەنجوومەنی سەرکردایەتیی

 

کۆمەڵی دادگەریی کوردستان