گه‌ڕان

Shadow Shadow
سیاسه‌تی

زیاتر لە 500 دەستگیرکراو

ناڕەزاییەکانى ڕۆژهەڵات لە چوار رۆژدا؛ حەوت کوژراو و 450 بریندار

2022.09.22 - 09:09
App store icon Play store icon Play store icon
ناڕەزاییەکانى ڕۆژهەڵات لە چوار رۆژدا؛ حەوت کوژراو و 450 بریندار

ناس کورد-

 

لە چوار رۆژدا حەوت هاووڵاتیی کورد لە ناڕەزایی و خۆپیشاندانەکانى رۆژهەڵاتى کوردستان کە دواى گیان لەدەستدانى ژینا ئەمینى سەریانهەڵدا کوژراون و و 450 کەسیش بریندار بوون، زیاتر لە 500 کەسیش دەستگیرکراون.

کەناڵی ناس کورد لە تێلیگرام جۆین بکە   

 

بەپێی ئامارەکانى ڕێکخراوى مافى مرۆڤى هەنگاو، لە ناڕەزایی دەربڕینەکانی ڕۆژی سێشەممە، لانی کەم سێ هاووڵاتیی کورد بە تەقەی ڕاستەوخۆی هێزەکانی ئێران کوژران و زیاتر لە ١٦١ هاووڵاتیش هەر بە دەستڕێژی ئەم هێزانە بریندار بوون و دەیان کەسیش دەستبەسەر کران.

 

ئاماژە بەوەشکراوە، دوای گیان لەدەستدانی فواد قەدیمی یەکێک لە بریندارەکانی ناڕەزایەتییەکانی دیواندەرە و هەروەها کوژرانی ژنێک بە ناوی مینوو مەجیدی لە خۆپیشاندانەکانی کرماشان ژمارەی کوژراوانی چەند ڕۆژی ڕابردووی خۆپیشاندانەکانی ڕۆژهەڵاتی کوردستان بۆ ٧ کەس بەرز بووەتەوە.

 

بەپێی ئامارەکە، ڕۆژی سێ شەممە ٢٩ی خەرمانان، لانی کەم لە ١٤ شاری ئاودانان، ئیلام، کرماشان، سنە، مەریوان، ئورمیە، بانە، نەغەدە، قوروە، ڕەبەت، سەردەشت، پیرانشار، ماکۆ و بازرگان، بە مەبەستی ناڕەزایی دەربڕین بەرامبەر بە کوژرانی ژینا ئەمینی، کچی ٢٢ ساڵەی خەڵکی سەقز ڕژانە سەر شەقامەکان و بە دەستوەردانی هێزە ئەمنییەکانی حکومەتی ئێران، خۆپێشاندانەکان بەرەو توندوتیژی چوون و لانی کەم سێ هاووڵاتیی ناڕازی کوژران و ١٦١ کەسیش بریندار بوون.

 

ئەو شارانەی کە تێیاندا خۆپیشاندان بەرەو توندوتیژی چوو:

 

پیرانشار: ١ کوژراو و ٤٨ بریندار

ئورمیە: ١ کوژراو و ٢٠ بریندار

ماکۆ: ٦ بریندار

کرماشان: ١ کوژراو و ٢٦ بریندار

قوروە، ٨ بریندار

مەریوان ٤ بریندار

ئیلام، ١٣ بریندار

نەغەدە: ١٥ بریندار

 

ئاماری گشتیی چوار ڕۆژی ڕابردوو:

 

بە پشت بەستن بە ئاماری تۆمار کراو لە ناوەندی ئامار و بەڵگەنامەکانی ڕێکخراوی مافی مرۆڤی هەنگاو، لە چوار ڕۆژی ڕابردوودا بە گشتی ٧ هاووڵاتیی کورد بە تەقەی ڕاستەوخۆی هێزە چەکدارەکانی ئێران گیانیان لەدەست داوە و ٤٥٠ کەسیش بریندار بوون کە زۆربەی ئەو کەسانە لە ترسی دەستبەسەرکرانیان لە لایەن هێزە ئەمنییەکانەوە، سەردانی بنکە تەندروستییەکانیان نەکردووە بەڵام فیلم و وێنەی بریندار بوونیان کەوتووتە دەست هەنگاو.

 

پۆلێنبەندیی کوژران و بریندار بوونی هاووڵاتییان لە شارەکانی کوردستان

 

دیواندەرە: ٢ کوژراو و ٣٣ بریندار

سەقز: ١ کوژراو و ٧٤ بریندار

بانە: ٤٠ بریندار

مەهاباد: ٢٣ بریندار

بۆکان: ١٧ بریندار

سنە: ٦٦ بریندار

مەریوان: ٩ بریندار

دێولان: ١ کوژراو و ١٦ بریندار

بیجاڕ: ٩ بریندار

قوروە: ١٧ بریندار

تیکاب: ٧ بریندار

ماکۆ: ٦ بریندار

ئورمیە: ١ کوژراو - ٢٠ بریندار

پیرانشار: ١ کوژراو - ٤٨ بریندار

کرماشان: ١ کوژراو و ٣٦ بریندار

ئیلام: ١٣ بریندار

نەغەدە: ١٥ بریندار

کۆی گشتی:

٧کوژراو و ٤٥٠ بریندار

 

دەستبەسەرکردنی زیاتر لە ٥٠٠ هاووڵاتیی کورد

 

بە پێی ئامارەکانى ڕێکخراوەکە، لە چوار ڕۆژی ڕابردوودا زیاتر لە ٥٠٠ هاووڵاتیی کورد لە لایەن هێزە ئەمنییەکانەوە دەستبەسەر کراون کە ناو و شوناسی نزیک بە ١٠٠ کەسیان ئاشکرابووە.