گه‌ڕان

Shadow Shadow
سیاسه‌تی

هۆکاری سەیر!

عێراق؛ لە ماوەی دوو ساڵدا چوار هەزار ژنی خوار 15 ساڵ تەڵاق دراون

2022.08.31 - 13:44
App store icon Play store icon Play store icon
عێراق؛ لە ماوەی دوو ساڵدا چوار هەزار ژنی خوار 15 ساڵ تەڵاق دراون

ناس کورد-

بەپێی ئامارێکی فەرمی، لە ماوەی دوو ساڵدا، واتە 2020 و 2021، چوار هەزار و 92 حاڵەتی جیابوونەوەی ژنانی خوار تەمەن 15 ساڵ لە دادگاکانی عێراق تۆمار کراوە و دادوەرانی تایبەتمەند هۆشداری دەدەن کە هاوسەرگیری پێشوەختە ڕێژەی جیابوونەوەی هاوسەرانی دوو هێندە زیاد کردووە.

کەناڵی ناس کورد لە تێلیگرام جۆین بکە   

 

بەپێی ئەو ئامارە فەرمییانە کە ڕۆژنامە "داد"ی سەر بە حکومەتی عێراق بڵاویکردووەتەوە، "لە ساڵی 2020دا هەزار و 498 حاڵەتی تۆمار كردووە، لە كاتێكدا ژمارەكە لە ساڵی 2021دا بۆ دوو هەزار و 594 حاڵەت بەرزبووەتەوە کە پارێزگای نەینەوا ریزبەندی یەکەمی گرتووە بە تۆمارکردنی هەزار و 155 حاڵەت."

 

حەسەن گڵۆب، دادوەری باری کەسی لە موسڵ دەڵێت؛ "سەرباری گەشەسەندنی کۆمەڵگاکان، عێراق هێشتا بە هۆی داب و نەریتە بۆماوەییەکانەوە، بەدەست بوونی هاوسەرگیریی پێشوەختەوە دەناڵێنێت، بەوپێیەی زۆر کەس پێیان وایە هاوسەرگیری پەردەیەکە بۆ ژنان و داهاتوویان دەپارێزێت، بەڵام ئەمە هەڵەیەکی باوی کۆمەڵگایە."

 

سەبارەت بەو هۆکارانەی کە زۆرترین کاریگەرییان هەیە بۆ جیابوونەوە، دادوەر حەسەن گڵۆب ئاماژە بەوەدەکات کە “دۆخی ئابووری کاریگەری ڕاستەوخۆی هەیە لە ژیانی هاوسەراندا، هەروەها ئاستی کولتووری و ناتەبایی هزری نێوان هاوسەرەکان بەهۆی تەمەنی بچووکیانەوە، هاوکات چەند هۆکارێکی تر کە ئەوانیش ڕاستەوخۆن، لەوانەش گەشەسەندنی کۆمەڵگا، تۆڕە کۆمەڵایەتییەکان و ناپاکی هاوسەری”.

 

ئاماژەی بەوەشکرد کە "پەیوەندی هاوسەرگیری چیتر نەماوە، سادەترین هۆکارەکان دەبنەهۆی جیابوونەوە، زۆرێک لە هۆکارەکانی جیابوونەوە زۆر سەیرن، بۆ نموونە، کە مامۆستایەکی زانکۆ پەیوەندی سۆزداری لەگەڵ شۆفێرێکی تاکسی دروستکردووە و وازی لە هاوسەرەکەی خۆی هێناوە کە ئەویش مامۆستای هەمان زانکۆ بووە".