سۆمۆ هەڕەشەى تۆمارکردنى سکاڵا لە کڕیارانى نەوتى هەرێم دەکات

ناس کورد-

كۆمپانیای بەبازاڕكردنی نەوتی عێراق هەڕەشەی رێكاری یاسایی نوێ دەكات لەدژی كڕیارانی نەوتی خاوی هەرێمی كوردستان.

کەناڵی ناس کورد لە تێلیگرام جۆین بکە   

ئاژانسى رۆیتەرز (25-8-2022) بڵاویکردەوە، لە نوسراوێكدا رۆژی 23ی ئاب کۆمپانیاى سۆمۆ جەختیکردووەتەوە "رێوشوێنی یاسایی توند بەرامبەر سەرجەم لایەنە پەیوەندیدارەكان دەگیرێتەبەر، بەمەبەستی رێگریكردن لە باركردنی ئەو بارە نایاساییانەی لە عێراقەوە دێن".

ئاماژەی بەوەشکردووە، “وەزارەتی نەوتی فیدراڵی عێراق و کۆمپانیای سۆمۆ مافی خۆیەتی هەموو رێوشوێنێکی یاسایی لە دژی هەر بریکارێک یان کڕیارێکی نەوتی خاوی قاچاخ بگرێتەبەر کە سەلمێنراوە بە تایبەتی نەوتی عێراقی لە تێرمیناڵی نەوتی جەیهانی تورکیا بارکردووە، بەبێ ئەوەی پشتگیرییەکی راشکاوانە لەلایەن کۆمپانیای سۆمۆوە بکرێت”.

ئەم هۆشدارییە دوایین هەنگاوە لە زنجیرە هەنگاوەکانی وەزارەتی نەوتی عێراق بۆ هەوڵدان بۆ کۆنترۆڵکردنی داهاتی نەوتی هەرێمی کوردستان.

بڕیارێکی دادگای باڵای فیدراڵی عێراق کە لە مانگی شوباتدا دەرچووە، بنەما یاساییەکانی کەرتی نەوت و غازی هەرێمی کوردستان بە نادەستووری زانیوە. حکومەتی هەرێمی کوردستان چەندین جار ئەو بڕیارەی رەتکردووەتەوە.