گه‌ڕان

Shadow Shadow
سیاسه‌تی

یاسا چی دەڵێت؟

ئایا ئەنجومەنی پارێزگا دەتوانێت گرێبەستی کامێراکانی هاتوچۆ هەڵبوەشێنێتەوە؟

2022.08.23 - 17:03
App store icon Play store icon Play store icon
ئایا ئەنجومەنی پارێزگا دەتوانێت گرێبەستی کامێراکانی هاتوچۆ هەڵبوەشێنێتەوە؟

ناس کورد-

ڕاوێژکارێکی یاسایی هەرێمی کوردستان چەند سەرنجێکی لەبارەى بڕیاری ئەنجومەنی پارێزگای سلێمانی بۆ ڕەتکردنەوەی دانانی کامێراکانی هاتوچۆ خستووەتەڕوو و دەڵێت، بەپێی یاسا مافی هەیە ڕەتیبکاتەوە و دەتوانێت کاری جدی بکات.

کەناڵی ناس کورد لە تێلیگرام جۆین بکە   

 

عەبدولقادر ساڵح، ڕاوێژكارى یاسایى و خاوەنی دبلۆمى باڵا لە یاساى گشتى لە نوسینێکیدا (23ی ئابی 2022) دەڵێت، "ئەمرۆ ئەنجومەنى پارێزگاى سلێمانى بە زۆرینەى دەنگى ئەندامانى ئەنجومەنەکە بڕیاریدا بە رەتکردنەوەى دانانى کامێراى چاودێرى تیژرەوى لە سنورى پارێزگاکانى سلێمانى و هەڵەبجە و ئیدارەکانى گەرمیان و راپەڕین، لێرەدا دەپرسین ئایا ئەم بڕیارە تا چەند هێزى یاسایى هەیە؟

عەبدولقادر لەڕووی یاساییەوە چەند سەرنجێکی خستووەتەڕوو؛


یەکەم: بەگوێرەى ئەحکامى ماددەى پێنجەم لە یاساى ژمارە (3)ى ساڵى 2009 ئه‌نجومه‌نی پارێزگا ده‌سته‌ڵاتی چاودێرییه‌ له‌ ناو سنووری كارگیریی پارێزگادا و مافی ئه‌وه‌ی هه‌یه‌ بڕیارو پێڕه‌و و رێنماییه‌كان بۆ رێكخستنی كاروباری كارگیری و دارایی له‌ناو سنووری پارێزگادا ده‌ربچوێنێ...، بە گوێرەى ئەم ماددەیە ئەنجومەنى پارێزگا لەروانگەى دەسەڵاتى چاودێریکردنیەوە دەتوانێت بڕیار و پێرەو دەربکات و لەبەر ئەوەیشى دانانى کامێراى تیژرەوى دەچێتە ناو چێوەى تایبەتمەندى چاودێرى کردنى ئەنجومەنى پارێزگاوە کەواتە مافى هەیە لەم بارەیەوە بڕیار دەربکات و بڕیارەکانیشى هێزى یاسایى هەیە چونکە یاساکە ئەو مافەى پێداوە .

دووەم: بە گوێرەى ماددەى (6/ شەشەم) لە یاساى ئەنجومەنى پارێزگاکان، ئەنجومەن تایبەتمەند بە نه‌خشه‌كێشانی سیاسه‌تی گشتی بۆ پارێزگا به‌هه‌ماهه‌نگی له‌گه‌ل وه‌زاره‌ته‌كان و دانانی پلانی ستراتیژی بۆ گه‌شه‌پێدانی به‌ جۆریك كه‌ له‌گه‌ل گه‌شه‌پێدانی نیشتمانی و هه‌رێمدا بگونجێ ، کەواتە هەر هەنگاوێکى هاوشێوەى دانانى کامێراى تیژرەوەى پێویستە بەهەماهەنگى لەگەڵ ئەنجومەنى پارێزگا کارى لەسەر بکرێت. بەڵام لێرەدا وەزارەتى ناوخۆ بەپێچەوانەى حوکمەکانى یاساکەوە و بێ گەرانەوە بۆ ئەنجومەنى پارێزگاى سلێمانى گرێبەستى دانانى کامێراى تیژرەوەى ئەنجامداوەو بەم پێیەش تایبەتمەندى ئەنجومەنى پارێزگاى لەم بارەدا بەزاندووە .

سێیەم: لەبەر ئەوەى بەگوێرەى ناوەرۆکى گرێبەستەکە بە هەدەردانى سامانى گشتى تێدایە و گرێبەستەکە دەبێتە هۆى دەولەمەندبوون لەسەر بنەماى سامانى گشتى، بۆیە ئەگەرهاتوو پارێزگار یان هەر بەرێوەبەرێکى گشتى کە لەرێگەى ئەنجومەنى پارێزگاوە متمانەى پێدرابێت، پابەندى بڕیارەکەى ئەنجومەن نەبێت ئەوا لەم بارەدا ئەنجومەن بە گوێرەى ئەحکامى ماددەى (6/ دووەم/ب) یان ماددەى (6/دوازدەیەم/3) لە یاساى ئەنجومەنى پارێزگاکان دەتوانێت لە پۆستەکانیان بیان بەخشێت .

 

چوارەم: بەگوێرەى ئەحکامى ماددەى (6/ دەیەم) لە یاساى ئەنجومەى پارێزگاکان، ئەنجومەنى پارێزگا دەسەڵاتى راگرتن یان هەموارکردنەوەى هەر پرۆژەیەکى هەیە کە پەیوەندى بە سنورى جوگرافى کارکردنیەوە هەبێت، ئەم پرۆژەیەش لەبەر ئەوەى بە زۆرینەى دەنگى ئەندامانى ئەنجومەن رەتکراوەتەوە کەواتە ئەنجومەنى پارێزگا مافى خۆیەتى دەسەڵاتەکانى بەکاربهێنێت بۆ راگرتنى ئەو پرۆژەیە.

 

پێنجەم: یاساى ژمارە (6)ى ساڵى 2009 ى یاساى وەزارەتى ناوخۆى هەرێمى کوردستان، ئەنجومەنى پارێزگاکان یەکێک نیە لە پێکهاتەکانى وەزارەتى ناوخۆ و ملکەچ نین بۆ بڕیار و فەرمانەکانى وەزیرى ناوخۆ وەک پێکهاتەیەکەى وەزارەتەکە.

 

لە کۆتاییدا ئەو شارەزایە یاساییە دەڵێت، "لەسەر بنەماى ئەوەى لاى سەرەوە خرایە روو بەبرواى ئێمە ئەنجومەنى پارێزگا مافى راگرتنى ئەو گرێبەستەى هەیە و دەتوانێت کارى جدى بکات لەسەر هەموارکردنەوەى بە جۆرێک کە لەگەڵ بەرژەوەندى گشتیدا بگونجێت و وەزارەتى ناوخۆ بەرپرسیارێتى هەر زیانێکى ماددى دەکەوێتە ئەستۆ کە بە هۆى گرێبەستەکەوە لەلایەن کۆمپانیا داواى بکرێت لەبەر ئەوەى کە لەرووى تایبەتمەندییەوە رەچاوى تایبەتمەندى ئەنجومەنى پارێزگا نەکراوە لەئەنجامدانى گرێبەستەکەدا و لەرووى یاساییەوە رەچاوى دەقى یاسا بەرکارەکانى تێدا نەکراوە و دەبێتە هۆى بەهەدەردانى سامانى گشتى و دروستکردنى تەنگوچەڵەمەى کارگێڕیى و کۆمەڵایەتى لەسەر ئاستى پارێزگاى سلێمانى . ئەوەى لێرەدا گرنگە بۆ ئەنجومەنى پارێزگاى سلێمانى ئەوەیە کە چاودێرى جێبەجێکردنى بڕیارەکەى بکات، چونکە هەموو بڕیار و یاسایەک عیبرەت لێى جێبەجێکردنیەتى نەک دەرکردنى".