گه‌ڕان

Shadow Shadow
چیرۆكه‌كانمان

لایتی زینونی ئۆتۆمبێل لە کارگەوە ڕێگەپێدراوە بەڵام دەستکرد قەدەغەیە.. هۆکار چییە؟

2019.08.07 - 21:03
App store icon Play store icon Play store icon
لایتی زینونی ئۆتۆمبێل لە کارگەوە ڕێگەپێدراوە بەڵام دەستکرد قەدەغەیە.. هۆکار چییە؟

کەناڵی ناس کورد لە تێلیگرام جۆین بکە   

ناس کورد- شەهرام عەزیز بەپێی یاساکانی هاتوچۆ لە هەرێم، هەر کەسێک لایتی "زینۆن" بۆ ئۆتۆمبیلەکەی دابنێت، بەبڕی 30 بۆ 50 هەزار دینار سزادەدرێت و پێویستە لایتەکەش لێبکاتەوە، بەڵام ئەو یاسایە ئەو کەسانە ناگرێتەوە کە ئۆتۆمبێلی مۆدێل بەرزیان پێیە و ئۆتۆمبێلەکانیان لە کارگەوە ئەو جۆرە لایتەیان پێوەیە. لایتی "زینۆن" کە جۆرێک لە لایتی زۆر بەهێزی ئۆتۆمبێلە و ڕەنگی سپییە، ڕووناکییەکەی هێندە بەهێزە کاتێک بەر چاوی شۆفێری بەرامبەر دەکەوێت یاخود لەڕێگەی ئاوێنەکانەوە لە دواوە بەر چاوی شۆفێر دەکەوێت، "شەوارە"ی دەکات و چاوی تێک دەدات، ئەوەش هۆکارێکە بۆ دروستبوونی ڕووداوی هاتوچۆ. . بەرپرسێکی هاتوچۆ پێیوایە، پێویستە ئەو یاسایە بۆ هەموو شۆفێران بێت و حکومەتی هەرێم چارەسەرێکی بۆ بدۆزێتەوە، نەوەک بەشێک بگرێتەوە و بەشێکیش بە ئازادی بەکاری بهێنێت. فەرەیدون عومەر، بەڕێوەبەری هاتوچۆی سلێمانی بە ناس کوردی ڕاگەیاند: "ئێمە وەک هاتوچۆ ڕێگریمان لەوە کردووە کە هاوڵاتیان ئەو جۆرە لایتە بۆ ئۆتۆمبێلەکانیان دابنێن و سزایان دەدەین، چونکە چاوی شۆفێرانی دیکە تێکدەدات و بەهۆیەوە بەباشی شەقامەکە نابینن، ئەوەش دەبێتەهۆی کەوتنەوەی ڕووداوە". . بەڕێوەبەری هاتوچۆی سلێمانی ئاماژەی بەوەشکرد، "کێشەکە لەوەدایە، ڕۆژانە چەندین ئۆتۆمبێل داخڵی هەرێم دەکرێت و لە شەریکەوە ئەو جۆرە لایتەی بۆ دانراوە، هیچ ڕێگرییەکیشیان لێناکرێت و هیچ یاسایەک نییە، ڕێگە نەدات ئەو ئۆتۆمبێلە بێتە ناوەوە لە گومرگ." سەبارەت بەوەی ئەوان وەک بەڕێوەبەرایەتی هاتوچۆ بۆ ڕێگە لەو ئۆتۆمبێلانەش ناگرن، بەرێوەبەری هاتوچۆی سلێمانی ڕوونیکردەوە: "ناتوانین لایتەکە بە شۆفیری ئەو ئۆتۆمبێلانە بگۆڕین کە لە شەریکەوە بەوشێوەیەن، چونکە نرخەکەی دادەبەزێت و شۆفێرەکە زیانی زۆر دەکات". . فەرەیدون عومەر ئاماژەی بەوەشكرد، چارەسەری ئەو کێشەیە، بەوە دەکرێت، کە پێویستە ئەنجومەنی وەزیران و وەزارەتی بازرگانی بڕیارێک دەربکەن، کە هەر ئۆتۆمبێلێک ئەو جۆرە لایتەی هەبوو، ڕێگەی نەدرێت بێتە ناو هەرێم و هەر لە گومرگ ئەو لایتەی لیبکرێتەوە، بۆ ئەوەی قەدەغەکردنەکە هەموو هاوڵاتیان بگرێتەوە. ئەو بەرپرسەی هاتوچۆ باسی لەوەشکرد، پێویستە ساڵانە گۆڕانکاری و نوێکردنەوە لە یاساکانی هاتوچۆەدا بکرێت، چونکە ئەگەر لە ڕابردوودا، درک بەوە نەکرابێت کە دەتوانرێت بە یاسایەک کێشەیەک چارەسەربکرێت، بەڵام ئێستا هەستی پێکراوە و پێویستە کاری لەسەر بکرێت.