گه‌ڕان

Shadow Shadow
سیاسه‌تی

’’یەکێتی بەڵێنی چارەسەری داوە’’

عەلی حەمەساڵح: 45 هەزار پارچە زەوی لە سلێمانی داگیرکراوە

2022.08.16 - 13:38
App store icon Play store icon Play store icon
عەلی حەمەساڵح: 45 هەزار پارچە زەوی لە سلێمانی داگیرکراوە

ناس کورد-

عەلی حەمەساڵح، ئەندامی پەرلەمانی کوردستان لەبارەی داگیرکردنی هەزاران پارچە زەوی و شوێنی خزمەتگوزاری لە سلێمانی رایگەیاند، "45 هەزار پارچەزەوی لە سلێمانی داگیرکراوە و دۆسیەکەم خستووەتە بەردەم سەرۆکی یەکێتی و جێگری سەرۆکی حکومەت و بەڵێنی چارەسەر کردنیاندا".

کەناڵی ناس کورد لە تێلیگرام جۆین بکە   

عەلی حەمە ساڵح لە ڕوونکردنەوەیەکدا (16ی ئابی 2022) دەڵێت، لە ماوەی ڕابردوودا چەندین جار یاداشت و بەدواداچونمان کرد بۆ داگیرکردنی نزیکەی 45 هەزار پارچە زەوی لەلایەن فەرماندەی گشتی هێزی پێشمەرگە و هێزە ئەمنیەکانی دیکە لە سلێمانی.


دەشڵێت، "لە چەند ڕۆژی ڕابردوودا جارێکی دیکە دۆسیەکەم خستەوە بەردەم سەرۆکی یەکێتی و جێگری سەرۆکی حکومەت و بەڵێنی چارەسەر کردنیان دا".


جەختیکردەوە کە "ئێستا کە ئەم پرۆسە ڕاگیراوە کارێکی باشە، دەبێت ئەوەشی داگیرکراوە بگەڕێتەوە، ئەوەشی دەستدرێژیە بۆ سەر ماستەر پلان و شوێنە خزمەتگوزاریەکان لاببرێت و بگەڕێتەوە، وەک چۆن بۆ داگیرکاری ڕەخنەمان هەبووە،  گەڕاندنەوەش بە کارێکی باش دەزانین."


عەلی حەمە ساڵح جەختیکردەوە کە "ناکرێت دەیان هەزار فەرمانبەر چەندین ساڵە چاوەڕێی پارچەیەک زەویەک بن پێیان نەدرێت و چەند بەرپرسێکیش بەبەهای سەدان ملیۆن دۆلار زەوی بفرۆشن."

 

لەیلا عومەر، سەرۆکی شارەوانی سلێمانی ڕایگەیاند، ئەو هێزەی ئەمڕۆ لە بینای شارەوانی جێگیرکرا لەسەر داوای ئەوان بووە بۆ ڕێگریکردن لە هەندێک گەندەڵ و مافیا کە دەیانەوێت زەوی داگیربکەن و دەست بۆ موڵک و ماڵ و ڕزقی هاوڵاتیان و دەوڵەت ببەن.  

  

لەیلا عومەر لە کۆنگرەیەکی ڕۆژنامەوانیدا (16ی ئابی 2022) وتی، "کۆمەڵێک خەڵک پەیدابوون بوونەتە مافیا بۆ سەر کۆشک و زەوی و ماڵەکانی شارەوانی".  

  

وتیشی، "هەرکەسێک زەوی بەبێ مۆڵەت خەت خەت بکات و بیفرۆشێت رووبەڕووی یاسا دەبێتەوە".  

  

هاوکات فەرماندەیی ھێزەکانی کۆماندۆی کوردستان کە سەر بە یەکێتیی نیشتمانیی کوردستانە دەڵێت، دوای ئەوەی لەماوەی ڕابردوو لەلایەن چەند بەرپرسێکی نابەرپرسی حزبی و حکومی لە ژێر فشاری هەڕەشە هەستان بە ئیفرازکردنی چەندین پارچە زەوی و داگیرکردنی بۆ مەرامی تایبەتی خۆیان و ڕێگریکردن لەئەنجامدانی چەند پڕۆژەیەکی ستراتیجی کە بۆ خزمەتی شارەکە ئەنجام ئەدران.  

  

فەرماندەییەکە لە ڕوونکردنەوەیکدا (16ی ئابی 2022) دەڵێت، "ئەمڕۆ بەفەرمانی سەرۆک بافڵ جەلال تاڵەبانی بۆ ڕێگریکردن لەو داگیرکارییە جوڵە بەهێزەکانی کۆماندۆی کوردستان کرا بەرەو بەڕێوبەرایەتی شارەوانی سلیمانی بۆ پاکتاوکردنی گەندەڵکاران و دەستگیرکرنی ئەو کەسانەی ڕێگربوون لە ئەنجامدانی پڕۆژە خزمەتگوزارییەکانی ناو شاری سلیمانی."