گه‌ڕان

Shadow Shadow
سیاسه‌تی

چەقۆ، بتڵەغاز و گولـلە

سێ تەرم و سێ ژوور..وردەکاریی رووداوەکەى چیمەن

2022.07.13 - 18:19
App store icon Play store icon Play store icon
سێ تەرم و سێ ژوور..وردەکاریی رووداوەکەى چیمەن

ناس کورد-



سێ کوژراوەکەى چیمەن بە چەقۆ، بتڵەغاز و گولـلە لە سێ ژوری جیاوازدا كوژراون، بەوتەى سەرچاوەیەکى پۆلیس پێدەچێت روداوەكە پەیوەندى هەبێت بە كێشەیەكی كۆمەڵایەتی كۆنی خاوەنی باخەكەوە، ئەوەش بەپێی راپۆرتێکى پێگەى "کەرکوک ناو".

کەناڵی ناس کورد لە تێلیگرام جۆین بکە   

 

تەرمى ئەو سێ کەسە کە لە ژن و مێردێک و برایەکى ژنەکە پێکهاتوون بەرەبەیانی ئەمڕۆ چوارشەممە 13ی تەمموز لە باخێكی گوندی چیمەن لە خۆرهەڵاتی كەركوك دۆزرانەوە و بەپێی وتەی سەرچاوەیەکى پۆلیس دوو كەس زیاتر بەشداربون لەو كردەوەیە.

 

ژنەكە و براكەی عەرەبن و هاوژینی ژنەكەش كە خاوەنی باخەكەیە كوردە.

 

پۆلیسی بنكەی ئازادی كەركوك، لە شوێنی روداوەكە، باسی روداوەكەیان كرد و جەختیانكردەوە لەوەی خاوەنی باخەكە كە یەكێكە لە كوژراوەكان و لە نەتەوەی كوردە تەمەنی 70 ساڵە و هاوژینەكەی كە ژنی دووەمیەتی و لە نەتەوەی عەرەبە 30 ساڵە، برای ژنەكەش تەمەنی 40 ساڵە.

 

 ئەو خوشك و برایە لەو باخە سەرقاڵی ئاژەڵداریی و كاری باخدارین و خاوەنی باخەكەش كە دەكاتە هاوژینی ژنەكە، هەندێك كات لە باخەكەدا ماوەتەوە لەگەڵ ژنی دووەمی.

 

مقەدەم عامر نوری شوانی، وتەبێژی پۆلیسی كەركوك، بە (كەركوك ناو)ی وت "هەرسێكیان لە سێ ژوری جیاوازی خانویەكی ناو باخەكەدا كوژراون، تاوانبارەكان ناسێنراونەتەوە و هەوڵی دەستگیركردنیان دەدەین". لەگەڵ جەختكردنەوە لەوەی كە كردەوەكە بە دوو كەس یان زیاتر ئەنجامدراوە.

 

ئەو باخە تەنیا دوو كیلۆمەتر لە بازگەی سەرەكی كەركوك – سلێمانییەوە دورە، دەكەوێتە ناو دۆڵێكی گوندی چیمەنەوە. جگە لە باخ و شوێنی حەوانەوە، هاوكات شوێنی بەخێوكردنی ئاژەڵیشە و ئەو خوشك و برایە بەردەوام لەو باخەدا كاریان كردووە.

 

ناوچەكە تاڕادەیەك چۆڵە و بە چەند كیلۆمەترێك لەدوریانەوە چەندین باخی تر هەیە.

 

كاتژمێر 9ی ئەمڕۆ هەریەكە لە پۆلیس و سوپای عیراق چونە شوێنی روداوەكە و تەرمەكانیان بۆ پزیشكی دادوەری كەركوك گواستەوە.

 

بەپێی لێكۆڵینەوە سەرەتاییەكانی پۆلیس، هەریەكە لەو سێ كەسە لە سێ ژوری جیاوازدا بە سێ شتی جیاواز كوژراون، خاوەنی باخەكە بە گولـلە كوژراوە، ژنەكەشی بە چەقۆ و براكەی ژنەكەش بە بتڵی غاز لە سەری دراوە تا مردووە.

 

سەرچاوەیەكی پۆلیس لە شوێنی روداوەكە جەختیكردەوە لەوەی بكوژەكان ناسێنراونەتەوە و هەوڵی دەستگیركردنیان دەدەن.

 

لەبارەی هۆكاری روداوەكەوە، سەرچاوەیەك لە پۆلیسی ئازادی بە (كەركوك ناو)ی وت "وای بۆ دەچین روداوەكە بەهۆی كێشەیەكی كۆمەڵایەتی كۆنی خاوەنی باخەكەوە بێت، چەند ساڵێك لەمەوبەر لەگەڵ گروپێكی تردا لە كەركوك بەشەڕ هاتون بەهۆیەوە لە لایەنی بەرامبەر كەسێك كوژراوە، گوماندەكەین پەیوەندی بەو روداوەوە هەبێت".