گه‌ڕان

Shadow Shadow
سیاسه‌تی

ڕوانگەی عێراقی: بەشێک لە باندەکانی بازرگانی بە ئەندامانەی جەستەی مرۆڤ لە هەرێمن

2019.07.28 - 12:06
ڕوانگەی عێراقی: بەشێک لە باندەکانی بازرگانی بە ئەندامانەی جەستەی مرۆڤ لە هەرێمن
ناس کورد به‌پێى ئامارى ڕێكخراوێك، 27 باندى كڕین و فرۆشتن به‌ئه‌ندامانى جه‌سته‌ى مرۆڤه‌وه‌ له‌ عێراقدا بوونیان هەیە و به‌شێكیان لە هه‌رێمى كوردستانن. . ئەمڕۆ، یەکشەممە 28ی تەمموزی 2019، ڕوانگه‌ى عێراقى بۆ به‌رگرییكردن له‌قوربانیانى بازرگانى كردن به‌مرۆڤ،لە ڕاپۆرتێکدا ئامارى شەش مانگى ڕابردووى بارزگانى كردنى به‌ئه‌ندامانى جه‌سته ‌و له‌شفرۆشیه‌وه‌ بڵاوكرده‌وه‌. . بەپێی ڕاپۆرتەکە، 27 تۆڕى بازرگانى كردن به‌ئه‌ندامانى جه‌سته‌ى مرۆڤ له‌سه‌رجه‌م پارێزگاكانى عێراق دا كارده‌كه‌ن و به‌شێك له‌و گروپانه‌ش ژنان و منداڵان په‌لێكشى كارى له‌شفرۆشى ده‌كه‌ن، ئامارەکە له‌مانگى شوباته‌وه‌ تا وه‌كو 1ى ته‌مموزى ساڵى 2019  ده‌گرێته‌وه‌. . یه‌كێك له‌و قوربانیانه‌ى كه‌ كڕین و فرۆشتن به‌ئه‌ندامانى جه‌سته‌یه‌وه‌ كراوه‌ به‌ ڕوانگه‌كه‌ى ڕاگه‌یاندووه‌، له‌نێو یه‌كێك له‌نه‌خۆشخانه‌ تایبه‌تیه‌كانى شارى دهۆكدا نه‌شته‌رگه‌رى فرۆشتنى گورچیله‌كه‌ى بۆ كراوه‌. . بەپێی زانیارییەکانی ڕاپۆرتەکە، له‌ڕێگه‌ى په‌یجێكى ساخته‌وه‌ له‌تۆڕى كۆمه‌ڵایه‌تى فه‌یسبوك، كه‌سێكیان قایل كردووه‌ به‌فرۆشتنى گورچیله‌كه‌ى به ‌چوار ملیۆن دینار و له‌به‌غداده‌وه‌ به‌ره‌و دهۆك بردوویانه‌ و دواى ئه‌وه‌ى نه‌شته‌رگه‌رى گورچیله‌كه‌ى بۆكراوه‌ ته‌نها 400 هه‌زار دیناریان پێداوه‌ و دواتر له‌و ئۆتیله‌ى بۆیان به‌كرێ گرتووه‌ به‌جێیانهێشتووه‌. . هه‌ر له‌ڕاپۆرته‌كه‌ى ڕوانگه‌ى عێراقىدا هاتووه‌، حەوت تۆڕى ترى بازرگانى كردن به‌ئه‌ندامانى جه‌سته‌وه‌ له‌شارى سلێمانیدا كار ده‌كه‌ن و له‌ڕێگه‌ى په‌یجى فه‌یسبوكه‌وه‌ په‌یوندى به‌ناوچه‌كانى ترى عێراقه‌وه‌ ده‌كه‌ن و فرۆشیارى كاره‌كه‌یان په‌یدا ده‌كه‌ن. . جگەلەوە نۆ باندى تریش كه‌په‌یوه‌ندیان به‌یه‌كه‌وه‌ هه‌یه‌ كار له‌سه‌ر گه‌نجانى ئاواره‌ و بێ جێگه‌و ڕێگه‌ ده‌كه‌ن له‌شاره‌كانى هه‌ولێر و دهۆك و كه‌ركوك بۆ ئه‌وه‌ى بازرگانى به‌ ئه‌ندامانى جه‌سته‌یانه‌وه‌ بكه‌ن. . به‌وته‌ى ڕێكخراوه‌كه‌ ، سه‌ره‌ڕاى بازرگانیكردن به‌ئه‌ندامانى جه‌سته‌وه‌ به‌شێك له‌و گروپانه‌ كارى له‌شفرۆشیش ده‌كه‌ن  بۆ ئه‌و مه‌به‌سته‌ هه‌وڵى هه‌ڵخه‌ڵه‌تاندنى ژنان و منداڵان ده‌ده‌ن و له‌ڕێگه‌ى فریودانیانه‌وه‌ چه‌ندین منداڵ و ژنیان گیرۆده‌ى ئه‌و كاره‌ كردووه‌. . ڕوانگه‌ى عێراقى ئه‌وه‌شى ئاشكرا كردووه‌ پێنج باند له‌به‌غداد هه‌ن كاره‌كانیان تایبه‌ته‌ به‌ له‌شفرۆشى و كار له‌سه‌ر منداڵان ده‌كه‌ن،  له‌چه‌ند ڕێگه‌یه‌كى په‌یوه‌ندى كردنه‌وه‌ ده‌یانه‌خله‌تێنن و ده‌یانبه‌نه‌ نێو ئه‌و گروپانه‌وه‌ و قایلیان ده‌كه‌ن به‌و كاره‌. . ئه‌و ڕێكخراوه‌ هۆشدارى ئه‌وه‌ش ده‌دات نابێت به‌هه‌ر پاساوێكه‌وه‌ منداڵان به‌ته‌نها بچنه‌ ده‌ره‌وه‌ و نزیك بینا گه‌وره‌ و شه‌قامه‌ و كۆڵانه‌كان بكه‌ون بۆ ئه‌وه‌ى ده‌ستى ئه‌وباندانه‌یان پێى نه‌گات. . ڕێكخراوه‌كه‌ ئه‌وه‌شى ئاشكرا كردووه‌ سێ باندى تر سه‌رپه‌رشتى ژماره‌یه‌ك له‌مناڵان و ژنان ده‌كه‌ن و بۆ سواڵكردن له ‌شاره‌كانى كه‌ركوك و دێوانیه‌ و بابل به‌كاریانده‌هێنن. . هه‌ر له‌درێژه‌ى ڕاپۆرته‌كه‌دا ڕوانگه‌ى عێراقى ئه‌وه‌شى ئاشكرا كردووه‌، چاوپێكه‌وتنى له‌گه‌ڵ شەش كارمه‌ندى ژنى بیانى كه‌ زۆربه‌یان ئه‌فریقین ئه‌نجامداوه‌ و باسی ئه‌وه‌یان كردووه‌ ڕوبه‌ڕووى گێچه‌ڵپێكردنى سێكسى و زۆرجار توند و تیژى سێكسى بونه‌ته‌وه‌ جگه‌ له‌وه‌ى له‌كاركردنیشدا مافیان پێشیل كراوه‌.