دۆمینیکا پێدانی پاسپۆرتی بە هاووڵاتیانی هەرێم ڕاگرت

ناس کورد- 

وڵاتی دۆمینیکا پێدانی پاسپۆرتی بە هاووڵاتیانی هەرێمی کوردستان و ڕۆژئاوای کوردستان بۆ ماوەیەکی کاتی قەدەغەکرد و دەڵێت، ڕێکاری نوێ دەگرنەبەر. 

 

کەناڵی ناس کورد لە تێلیگرام جۆین بکە   

 

لە ڕاگەیەنراوێکدا وەزارەتی دارایی کۆماری دۆمینیکا لە ناوچەی کاریبیان (پێنجشەممە 12-5-2022) ڕایگەیاند، " لە بەشی پێدانی وڵاتینامەی کۆماری دۆمینیکا هەندێک نیگەرانی هەیە لەبارەی ئەو فایلانەی کە لە هەندێک ناوچەی باکووری عێراق (هەرێمی کوردستان) و سووریاوە دەنێردرێن، لەوانەش هەولێر، ئامێدی، دهۆک، کەرکووک، لالش، رانیە، سۆران، سلێمانی و زاخۆ."

 

ئاماژەی بەوەشکردووە، چاو بە ڕێکارەکانی وەرگرتنی ئەو فایلانەدا دەخشێننەوە و لەو ماوەیەدا وەرگرتنی فایلی نوێ دەوەستێنن، دوای چاوپێداخشاندنەوەکەش ڕێکاری نوێ ڕادەگەیەنن. 

 

هاوکات کۆمپانیایەکی تایبەت بە ڕەگەزنامە و پاسپۆرتی دووەم لە هەرێمی کوردستان بڵاویکردووەتەوە، "بەڕێزان، " بۆ ماوەی 1 مانگ هیچ فایلێكی كوردستان پێشكەش ناكرێت بۆ بوون بە خاوەنی پاسپۆرتی دۆمینیكا، ئەویش بەهۆی گۆڕانكاری لە نرخی ئەم پاسپۆرتە و زیادبوونی داواكاریەكان بۆ بەدەستهێنانی." 

 

هەوڵدان بۆ وەرگرتنی پاسپۆرتی دۆمینیکا ماوەی چەند ساڵێکە بووەتە دیاردە لە هەرێمی کوردستان کە تێچووەکەی نزیکەی 100 هەزار دۆلارە.