گه‌ڕان

Shadow Shadow
سیاسه‌تی

زانیاریی زیاتر

ئەمریکا لەبارەی ئازادیی رادەربڕین پەیامێک ئاڕاستەی حکومەتی هەرێم دەکات

2022.04.08 - 20:17
App store icon Play store icon Play store icon
ئەمریکا لەبارەی ئازادیی رادەربڕین پەیامێک ئاڕاستەی حکومەتی هەرێم دەکات

 

ناس کورد- 

جێگری یاریدەدەری وەزیری دەرەوەی ئەمریکا بۆ کاروباری عێراق و ئێران رایگەیاند، هانی حکومەتی هەرێمی کوردستان دەدەن کاری زیاتر بکات بۆ پشتیوانیکردن لە ئازادیی ڕادەربڕین بۆ ڕۆژنامەنوسان و خەڵک بە گشتی و بەردەوام لە پێشەنگدا بمێنێتەوە وەک نمونەیەک بۆ ئازادییە مەدەنییەکان لە ڕۆژهەڵاتی ناوەڕاست.

کەناڵی ناس کورد لە تێلیگرام جۆین بکە   

 

لە ڕاگەیەنراوێکدا کونسوڵخانەی ئەمریکا لە هەولێر (هەینی 8-4-2022) ڕایگەیاند، ئەمڕۆ جێنیفەر گەڤیتۆ، جێگری یاریدەدەری وەزیری دەرەوەی ئەمەریکا بۆ کاروباری عێراق و ئێران لە ڕێی ئۆنلاینەوە لە گەڵ ژمارەیەک ڕۆژنامەنووسی هەرێمی کوردستاندا کۆبووەوە.

 

بەگوێرەی ڕاگەیەنراوەکە، جێگری یاریدەدەری وەزیری دەرەوەی ئەمەریکا بۆ کاروباری عێراق و ئێران ئەم پەیامەی ڕاگەیاند:

 

"هەروەک سەرۆک بایدن لە نامەکەی ئەم دواییەیدا بۆ نێچیرڤان بارزانی سەرۆکی هەرێمی کوردستانی عێراق ئاماژەی پێدا، ویلایەتە یەکگرتوەکانی ئەمەریکا بە توندترین شێوە هێرشی ئێران بە موشەکی بالیستی بۆسەر هەولێر سەرکۆنە دەکات.  ویلایەتە یەکگرتوەکانی ئەمەریکا شان بەشانی حکومەتی عێراق و حکومەتی هەرێمی کوردستان دەوەستێت و پشتیوانی لە سەروەریی عێراق دەکات، بە سەروەریی هەرێمی کوردستانی عێراقیشەوە.

 

حکومەتی هەرێمی کوردستان هاوبەشێکی گرنگە بۆ ویلایەتە یەکگرتووەکانی ئەمەریکا و سوپاسگوزارین بۆ بە لە نزیکەوە کارکردنمان بە درێژایی ساڵانی ڕابردوو، لەوانەش هەماهەنگیمان لە شەڕی دژ بە داعشدا. دۆستایەتی دێرینی نێوان ئەمەریکا و هەرێمی کوردستان لە بەها دیموکراسیە هاوبەشەکانمانەوە سەرچاوەی گرتووە، لە ناویشیاندا ئازادیی ڕادەربڕین. هانی حکومەتی هەرێمی کوردستان دەدەین کاری زیاتر بکات بۆ پشتیوانیکردن لە ئازادیی ڕادەربڕین بۆ ڕۆژنامەنووسان و خەڵک بە گشتی لە هەرێمی کوردساندا و بەردەوام لە پێشەنگدا بمێنێتەوە وەک نمونەیەک بۆ ئازادیە مەدەنیەکان لە ڕۆژهەڵاتی ناوەڕاستدا. ویلایەتە یەکگرتووەکانی ئەمەریکا بەردەوام دەبێت لە پشتیوانیکردنی هێزە ئەمنیەکانی عێراق بە پێشمەرگەشەوە، بۆ کارکردن لە پێناو هەرێمی کوردستانێکی سەلامەت و ئارام و گەشەسەندوو کە ویلایەتە یەکگرتووەکانی ئەمەریکا وەک پێکهێنەرێکی بنەڕەتیی عێراقێکی سەقامگیر و گەشەسەندوو دەیبینێت.

 

لە مانگی ڕەمەزانی پیرۆزدا موسوڵمانان لەسەرانسەری دنیادا بە ڕۆژوو دەبن و نزا دەکەن هەروەها لەگەڵ هاوڕێ و دراوسێکانیان هەوڵی ئاشتەوایی دەدەن. ئەم مانگی تێڕامانە دەرفەتێکی لەبارە بۆ کەمکردنەوەی گرژیەکان و خاوکردنەوەی ململانێ بەردەوامەکان لە عێراق و ناوچەکانی دەوروبەری. ویلایەتە یەکگرتووەکانی ئەمەریکا هیوادارە کە ئەم مانگە پیرۆزەی ڕەمەزان ئارامی و ئاشتی بۆ گەلانی عێراق و هەرێمی کوردستان دەهێنێت.