گه‌ڕان

Shadow Shadow
سیاسه‌تی

وردەکاریی

’’ناس’’ بژاردەى یەکێتى بۆ رۆژى هەڵبژاردنى سەرۆک کۆمار ئاشکرادەکات

2022.03.15 - 22:54
App store icon Play store icon Play store icon
’’ناس’’ بژاردەى یەکێتى بۆ رۆژى هەڵبژاردنى سەرۆک کۆمار ئاشکرادەکات

ناس کورد-

 

راوێژکارى مەکتەبی سیاسی یەکێتى رایگەیاند، حزبەکەى هەوڵى ئەوە دەدات کۆبوونەوەى پەرلەمانى عێراق بۆ هەڵبژاردنى سەرۆک کۆمار ئەنجام نەدرێت، ئەگەر هاوپەیمانى سێ قۆڵى بەردەوام بێت و نەتوانن دەنگى پێویست بۆ سەرکەوتنى کاندیدەکەیان مسۆگەر بکەن.

کەناڵی ناس کورد لە تێلیگرام جۆین بکە   

 

بڕیارە 26-3-2022 پەرلەمانى عێراق بۆ هەڵبژاردنى سەرۆک کۆمار کۆبێتەوە و یەکێتى و پارتى بە دوو کاندیدى جیاکە پێکهاتوون لە بەرهەم ساڵح و رێبەر ئەحمەد کێبڕکێی توندى وەرگرتنى پۆستەکە دەکەن.

 

رێزان شێخ دلێر راوێژکارى مەکتەبی سیاسی یەکێتى (15-3-2022) بە "ناس کورد" ى وت "هێشتا دوو هەفتە ماوە، هیوادارین جارێکى تر بیر لە رێککەوتن بکرێتەوە بۆ دیاریکردنى کاندیدى یەکێتى بۆ پۆستى سەرۆک کۆمار".

 

پارتى کە چوار ساڵ لەمەوبەر لە کێبڕکێی بەدەستهێنانى پۆستى سەرۆک کۆمار بەرانبەر یەکێتى شکستى هێنا، ئەمجارەیان ململانێیەکى سەختى بۆ وەرگرتنى ئەو پۆستە دەستپێکردووە، لەکاتێکدا یەکێتى جەخت لەوە دەکاتەوە کە ئەو پۆستە مافى ئەوە و بەهیچ شێوەیەک دەستبەرداریی نابێت.

 

لەبارەى ئەگەرى رێککەوتنى پارتى و یەکێتى پێش کۆبوونەوەى پەرلەمان رێزان شێخ دلێر وتى "یەکێتى دەرگا لەسەر هیچ کەسێک داناخات، بەتایبەتى پارتى کە پێکەوە لەهەرێم لە زۆرشت هاوبەشن و حکومڕانن".

 

لەگەڵ هەوڵەکانى بۆ دەستهێنانى پۆستى سەرۆک کۆمار، یەکێتى بژاردەیەکیشى دیکەشى ئامادەکردووە لە ئەگەرى پشتیوانى هاوپەیمانى سێ قۆڵى بۆ کاندیدەکەى پارتى، ئەویش هەوڵدانە بۆ ئەوەى کۆبوونەوەى پەرلەمان ئەنجام نەدرێت.

 

"هەوڵى رێککەوتن دەدەین، بەڵام ئەگەر وەکو ئێستا مایەوە و هاوپەیمانى سێ قۆڵى جێگیر بوو، یەکێتى دەچێتە پاڵ ئەو لایەنانەى پشتیوانى ئەوەن پۆستەکە بۆ یەکێتى بێت، ئەگەریش نەتوانرا دەنگى پێویست کۆبکرێتەوە، ئەوکات ئەو لایەنە هەڵدەبژێرین کە هەوڵى ئەوەدەدات نەتوانرێت کۆبوونەوەى پەرلەمان بکرێت"، رێزان شێخ دلێر وایوت.

 

وتیشى "ئەوە یەکێکە لە بژاردەکانمان، هەموو رێگەیەک دەگرینەبەر بۆ ئەوەى ئەو پۆستەمان لەدەست نەچێت".

 

لەگەڵ نەبوونى هیچ ئاماژەیەک لەئێستادا بۆ رێکنەکەوتنى پارتى و یەکێتى لەسەر ئەو پرسە، ئەگەر هەیە سیناریۆى ساڵى 2018 لەپەرلەمان دووبارە بێتەوە کاتێک هەردوو حزب بەکاندیدى جیا چوونە پڕۆسەکەوە.

 

رێزان شێخ دلێر دەڵێت "ئەگەر پرسەکە  بدرێتە دەست پەرلەمانتاران سیناریۆى 2018 دووبارە دەبێتەوە و کاندیدى یەکێتى دەردەچێت، بەڵام ئەگەر هاوپەیمانى سێ قۆڵى بەردەوام بێت ئەوکاتە سیناریۆکە دوبارە نابێتەوە و یەکێتى هەوڵدەدات کۆبوونەوەکە نەکرێت".

 

بۆ هەڵبژاردنى سەرۆک کۆمار پارتى چاوى لە کورسییەکانى هاوپەیمانى سێ قۆڵییە لەگەڵ سەدر و سوننەکان بۆ ئەوەش بەرپرسەکانى باس لە 200 دەنگى مسۆگەر دەکەن، یەکێتیش چاوى لە کورسییەکانى لایەنەکانى دەرەوەى ئەو هاوپەیمانێتییە بەتایبەتى لایەنەکانى چوارچێوەى هەماهەنگى شیعەکان.

 

سوبحی مەندەلاوی، پەرلەمانتاری پارتی لە بەغدا لە لێدوانێکیدا بۆ ئاژانسی فەرمیی عێراقییە (15-3-2022) ڕایگەیاند "ڕێبەر ئەحمەد کاندیدی هاوپەیمانیی زۆرینەیە" کە مەبەستی لێی هاوپەیمانیی سێ قۆڵی سەرد و پارتی و سوننەیە.  

  

دەشڵێت "پۆستی سەرۆککۆمار پشکی کوردە، هەروەها پشکی پارتی دیموکراتی کوردستانیشە چونکە زۆرترین دەنگی هێناوە لە هەرێمی کوردستان، بۆیە مافی خۆیەتی ئەو پۆستە وەربگرێت."  

  

سوبحی مەندەلاوی جەختیکردەوە کە "لە ئێستادا هیچ کۆبوونەوە و دانوستانێک لەگەڵ یەکێتی نییە لەسەر ئەو بابەتە، هەرچەندە چەند پێشنیاز و دەستپێشخەرییەکیش هەبووە."