گه‌ڕان

Shadow Shadow
سیاسه‌تی

دواى بڕیارەکەى دادگاى فیدراڵى

حکومەتى هەرێم کۆمپانیا نەوتییەکان ’’دڵنیا دەکاتەوە’’

2022.02.16 - 22:03
App store icon Play store icon Play store icon
حکومەتى هەرێم کۆمپانیا نەوتییەکان ’’دڵنیا دەکاتەوە’’

ناس کورد-

 

حکومەتى هەرێمى کوردستان دڵنیایی دەداتە کۆمپانیا نەوتییەکان کە پابەندە بە رێککەوتن و گرێبەستەکان، ئەوەش دواى بڕیارەکەى دادگاى فیدراڵى دژى کەرتى نەوت و غازى هەرێم.

کەناڵی ناس کورد لە تێلیگرام جۆین بکە   

 

جوتیار عادل وتەبێژى حکومەتى هەرێم لە چاوپێکەوتنێکدا لەگەڵ تەلەفزیۆنى زمانحاڵى پارتى وتى "کۆمپانیا نەوتییەکان دڵنیادەکەینەوە کە پابەندین بەرێککەوتنەکانمان بەرانبەریان و گومان لەهیچ رەفتار و بریارێکى خۆمان ناکەین لەکەرتى نەوتدا، ئەو بڕیارانەى داومانە دەستورى و یاسایین و ئێستاش لەگەڵ بەغدا بەردەوامین لە گفتوگۆ".

 

وتیشى "ئێمە ئامادەبووین بەهاى 250 هەزار بەرمیل نەوت و نیوەى داهاتە فیدراڵییەکان رادەستى بەغدا بکەین، دواتر چاودێرى دارایی هاتە هەرێم و وردبینى کرد لەو بارەیەوە، بەڵام بڕیارەکەى ئێستا هەموو ئەو هەوڵانە دەخاتە ژێر پرسیارەوە و کۆسپ لەبەردەم هەردوو حکومەت دروستدەکات".

 

"پابەندین بە رێککەوتنەکانمان لەگەڵ بەغدا، هەموو رێکارە دەستوریی و یاساییەکان دەگرینەبەر بۆ بەرگریکردن لە مافە دەستورییەکان و پاراستنى رێککەوتنەکان و گرێبەستەکان لەگەڵ کۆمپانیا نەوتییەکان"، جوتیار عادل وایوت.

 

دوێنێ دادگای فیدڕاڵی عێراق بڕیاری دا بە نادەستوریبوونی یاسای نەوت و گاز لە هەرێمی کوردستان و ڕایگەیاند کە پێویستە هەرێم پابەند بێت بە ڕادەستکردنی نەوت بە حکومەتی فیدڕاڵ.        

  

هەر دوای بڕیارەکە، حکومەتى هەرێم رایگەیاند، بڕیارەکەى دادگاى فیدراڵى دژى دۆسیەى نەوت و غازى هەرێم دەبێتە هۆکاری زیاتر ئاڵۆزکردنی بابەتەکە و چارەسەرنەکردنی کێشەکە و هەرێم دەستبەرداری مافەکانی نابێت کە لە دەستوری عێراقدا جێگیرکراون.    

  

حکومەتى هەرێم لە راگەیەنراوێکدا کە دەست "ناس کورد" کەوتووە ئاماژەى بەوەکردووە، "ئەم بڕیارە نادادپەروەرانە و نادەستورییە و دژ بە ماف و دەسەڵاتە دەستورییەکانی هەرێمی کوردستانە و قبوڵکراو نییە و پێویست بوو دادگا لێکۆڵینەوەکانی فراوانتر بکات و رەچاوی داواکارییەکانی هەرێمی کوردستانی بکردایە".    

 

لاى خۆیەوە، حکومەتى عێراق 16-2-2022

وەزیری نەوتی ڕاسپارد پەیوەندی و هەماهەنگی لەگەڵ هەرێمی کوردستان و کۆمپانیا نێودەوڵەتییە پەیوەندیدارەکان بکات بۆ دانانی ڕێکار و هەنگاوی جێگرەوە بۆ ئیدارەدانی  دۆسیەی نەوت بەپێی دەستور و بەرژەوەندی گشتی، ئەوەش دوای بڕیاری دادگای فیدڕاڵی بەوەی یاسای نەوت و غازی ساڵی 2007ی هەرێم نادەستورییە.  

  

ئەمڕۆ چوارشەممە، 16-2-2022، مستەفا کازمی، فەرماندەی هێزە چەکدارەکانی عێراق سەرپەرشتی ئه‌نجومه‌نی وزاری بۆ ئاسایشی نیشتمانی کرد بۆ تاوتوێکردنی چەند پرسێکی ئەمنی، ئابوری و سیاسی.    

  

لە ڕاگەیەنراوی کۆبوونەوەکەدا هاتووە، میوانداری وەزیری نەوتی عێراقی کراوە بۆ تاوتوێکردنی بڕیاری دادگای فیدڕاڵی لەبارەى ئیدارەدانی نەوت لە هەرێمی کوردستان.    

  

هاوکات وەزارەتی نەوت سەرپشک کراوە لە پشتبەستن بە ڕاوێژکار و شارەزایان لە ناوخۆ و دەرەوەی وڵات بۆ دانانی نەخشەڕێگایەکی هونەری لەو بارەیەوە.    

  

بەپێى بڕیارەکان، وه‌زیری نه‌وتی عێراق راسپێردراوە په‌یوه‌ندی و هه‌ماهه‌نگی له‌گه‌ڵ هه‌رێم و كۆمپانیا نه‌وتییه‌كان و وڵاتانی په‌یوه‌ندیدار بكات بەمەبەستى دانانى رێوشوێن و هه‌نگاوی پێویست بۆ بەڕێوەبردنى دۆسیه‌ی نه‌وتی هه‌رێم، بەپێی ده‌ستورو به‌رژه‌وه‌ندییه‌ باڵاکان.