ناس کورد-
قایمقامی ھەولێر رایگەیاند، بڕیاری ھاوردەکردنی سووتەمەنی و غاز بۆ ئەوەیە کە بتوانن نرخەکەی دابەزێنن، بۆیە پێویستە ئەو سووتەمەنی و غازەی ھاوردە دەکرێت نرخی لەوەی ئێستا ھەیە هەرزانتر بێت.
کەناڵی ناس کورد لە تێلیگرام جۆین بکە
نەبەز عەبدولحەمید، قایمقامی ھەولێر (سێشەممە 8-2-2022) بە ماڵپەڕی فەرمی حزبەکەی ڕاگەیاند، "بڕیار دراوە کە سووتەمەنی و غاز لە عێراق بۆ ھەرێمی کوردستان ھاوردە بکرێت، ئەمەش ڕێگایەکە بۆ ئەوەی نرخی سووتەمەنی و غاز لە ھەرێمی کوردستان لەوەی ئێستا ھەیە هەرزانتر بێت، بۆ ئەوەی ڕێککەوتن بکرێت و بەغدا ڕێگە بدات، پێویستە وەزارەتی سامانە سروشتییەکان ڕێککەوتن لەگەڵ بەغدا بکات ''.
ئاماژەی بەوەشکردووە، "نرخی سووتەمەنی لە ھەولێر ئێستا دیارە و بەنزین لە 690 دەست پێ دەکات، لەکاتێکدا لە عێراق نرخی یەک لیتر بە 450 دینارە و نەوت و غازیش گرانە، بۆیە پێشبینی دەکەین کە سووتەمەنی و غاز ھاوردە بکرێت و نرخەکەی ھەر ھیچ نەبێت بۆ ھەر لیترێک سووتەمەنی 200 دینار کەمتر بێت و غازیش هەرزانتر بێت، ئەوەش کارێکی باشە و لە قازانجی ھاووڵاتییاندایە، ھەر بۆیەش ئەو بڕیارە دراوە.''
