گه‌ڕان

Shadow Shadow
سیاسه‌تی

هادی عامری قسەی یەکلاکەرەوەی کرد: یان دەچینە حکومەت یاخود بایکۆت

2022.02.05 - 15:49
App store icon Play store icon Play store icon
هادی عامری قسەی یەکلاکەرەوەی کرد: یان دەچینە حکومەت یاخود بایکۆت

ناس کورد-

هادی عامری، سەرۆکى هاوپەیمانی فەتح ڕایگەیاند، ئەوان وەک چوارچێوەی هەماهەنگی شیعەکان یان پێکەوە دەچنە حکومەت، یاخود پێکەوە بایکۆتی پرۆسەی سیاسی دەکەن.

کەناڵی ناس کورد لە تێلیگرام جۆین بکە   

 

هادی عامری لە لێدوانێکیدا بۆ کەناڵی "التغیر" کە ناس کورد بینیویەتی (5-2-2022) دەڵێت، "چوارچیوەی هەماهەنگی هەرگیز دابەش نابێت، یان هەموومان دەچینە حکومەت، یاخود بایکۆت دەکەین."

 

وتیشی، "ئێمەی عێراقی بەڵێنمان داوە کە لە دواین ساتەکاندا چارەسەر بدۆزینەوە، بە دڵنیاییەوە کێشەکان چارەسەر دەبن بەوشێوەیەی کە لە بەرژەوەندی عێراقدایە."

 

هاوکات مشعان جبوری هەڵوێستی هاوپەیمانی سونەکان و پارتی ئاشکرا دەکات لەدوای بڕیاری لەناکاوی ڕەوتی سەدر بۆ بایکۆتکردنی دانیشتنی 7ی شوباتی پەرلەمانی عێراق بۆ هەڵبژاردنی سەرۆککۆمار و هەڵپەساردنی سەرجەم دانوستانەکان.

 

مشعان جبوری، سەرکردە لە هاوپەیمانی سونەکان لە تویتێکیدا (5-2-2022) وتی، "بە ئەگەری زۆرەوە هەردوو هاوپەیمانی "سیادة"ی سونەکان و فراکسیۆنی پارتی ئامادەی دانیشتنەکە نابن و بەوەش ڕێژەی یاسایی دانیشتنەکە تەواو نابێت."

 

جەختیکردووەتەوە کە "عێراق دەکەوێتە بۆشایی دەستورییەوە کە پێشتر ڕووی نەداوە."

 

ئەمڕۆ فراكسیۆنی سەدرییەكان بایكۆتی دانیشتنی ڕۆژی دووشەممەی پەرلەمانی عێراقیان كرد كە بڕیارە سەرۆككۆماری تێدا هەڵببژێردرێت.

 

حەسەن عەزاری، سەرۆکی فراکسیۆنەکە لە كۆنگرەیەكی ڕۆژنامەوانیدا لەناو پەرلەمانی عێراق (5-2-2022) ڕایگەیاند، ”بە فەرمانی سەماحەتی فەرماندە سەدربڕیارمان دا لە سڕكردنی سەرجەم دانوستانەكان لەگەڵ لایەنە سیاسییەكان سەبارەت بە پێكهێنانی حكومەتی داهاتوو تا كاتێكی نادیار.”

 


هەروەها ”پێویستە ئەندامانی فراكسیۆنی سەدری ئامادەی دانیشتنی دەنگدان نەبن بە هەڵبژاردنی سەرۆككۆمار جگە لە جێگری یەكەم.”

 

دوێنێ موقتەدا سەدر، ڕێبەری ڕەوتی سەدر مەرجێکی بۆ دەنگدان بە هۆشیار زێباری دانا و داوای لە پەرلەمانتارانی سەر بە ڕەوتەکەی کرد، ئەگەر مەرجەکانی کاندیدبوونی تێدانییە دەنگی پێنەدەن.

 

سەدڕ لە تویتێکدا (4-2-2022) ڕایگەیاندووە، "ئەگەر هۆشیار زێباری، کاندیدی پارتی یاخود هەر کاندیدێکی دیکە بۆ پۆستی سەرۆک کۆمار مەرجەکانی کاندیدبوونی تێدانییە، ئەوە پەرلەمانتارانی چاکسازیخواز دەنگی پێنەدەن، چونکە ئێمە لە خەمی چاکسازیداین، نەک خوازیاری دەسەڵات."

 

مەرجەکەی سەدر لەکاتێکدایە کە هۆشیار زێباری لە کابینەی پێشووتری حکومەتی عێراق کاتێک بریکاری وەزیری دارایی عێراق بوو لە پەرلەمانی عێراق لێپرسینەوەی لێکرا و لە پۆستەکەی دوورخرایەوە.