گه‌ڕان

Shadow Shadow
سیاسه‌تی

شەوى لافاوەکەى هەولێر

رەمزییە لەهەوڵى رزگارکردنى دایک و داپیرەیدا خنکا

2021.12.20 - 00:49
App store icon Play store icon Play store icon
رەمزییە لەهەوڵى رزگارکردنى دایک و داپیرەیدا خنکا

ناس کورد-

 

کاتێک لافاو گەیشتە ماڵەکەیان لەدارەتووى هەولێر مامۆستا رەمزییە خۆى گەیاندە سەربانى ماڵەکەیان تا خۆى رزگار بکات، بەڵام نەیتوانى لەبەردەم دیمەنى گیرخواردنى دایک و داپیرەیدا خۆى بگرێت و گەڕایەوە بۆ رزگارکردنیان هەرچەندە لافاوەکە تادەهات بەهێزتر دەبوو، ئەوە دوایین ساتەکانى ژیانى رەمزییە و ئەو دوو کەسە نزیکەى بوو کە پێکەوە بەهۆى لافاوەکەوە خنکان.

 

کەناڵی ناس کورد لە تێلیگرام جۆین بکە   

 

رەمزییە کە دواى کۆچى دوایی باوکى لەگەڵ دایکیدا پێکەوە دەژیان، چەند کاتژمێرێک پێش روودانى لافاوەکە داپیرى سەردانى کردن و لەلایان مایەوە، بەڵام ئەوە بووە دوایین ساتەکانى پێکەوە بونیان و هەر لەو ماڵەدا شەوی هەینی 17-12-2021  پێکەوە گیانیان لەدەستدا، ئەوەش بەپێی گێڕانەوەى غازى عەلى ئەندامى ئەنجومەنى پارێزگاى هەولێر.

 

غازى عەلى لە بڵاوکراوەیەکدا کە دەست "اس کورد" کەوتووە نوسیویەتى "رەمزییە لەکاتى بەهاناوەچوونى دایک و داپیرەى شەپۆلێكی ئاو لێی دەدا و، لەگەڵ دایكی و داپیری پێکەوە خنکان".

دەشڵێت، رەمزییە چەند منداڵێکى بێ باوکى کەفالەت کردووە، بۆیە دواى خنکانى کەسە نزیکەکانى و هاوڕێیانی بەدوای ئەوەدا دەگەڕێن، ئەو منداڵانەی كەفالەتی كردوون بدۆزنەوە تا بەردەوام بن لە کەفالەتکردنیان.

 

رەمزییە  لە قوتابخانەی (چواس) لەدارەتوو، مامۆستای زمانی كوردی بوو، دوایین کارى لە قوتابخانە پێش گیان لەدەستدانى کڕینى کەباب بووە بە خوێندکارەکانى کاتێک لە ئەلفوبێی کوردى گەیشتونەتە پیتى "ک"، ئەوەش بەوتەى غازى عەلى.

 

شەوی هەینی 17-12-2021  بەهۆى روودانى لافاوەوە لە هەولێر 12 کەس بوونە قوربانی، تا ئێستا تەرمی 10 کەس دۆزراونەتەوە و دوو کەسی دیکەش کە دانەری تەمەن 10 مانگ و شوانێکە بەناوی ئومێد شامل بێسەروشوێنن.