گه‌ڕان

Shadow Shadow
سیاسه‌تی

’’کارەکە لە دەست دەرچووە’’

سەرکردەیەکى یەکێتى: پارتى و یەکێتى داهات لەیەکترى دەشارنەوە

2021.12.15 - 15:36
App store icon Play store icon Play store icon
سەرکردەیەکى یەکێتى: پارتى و یەکێتى داهات لەیەکترى دەشارنەوە

ناس کورد-

 

ئەندامێکى ئەنجومەنى باڵاى سیاسی و بەرژەوەندى یەکێتى رایگەیاند، هاوڵاتیان گەیشتونەتە ئەو بڕوایەى پارتى و یەکێتى قسەکانیان لەسەر یەکتر ڕاستە و هەردوو لا داهاتەکان لە یەکتر دەشارنەوە، خەمى جەماوەریان نییە، هێندەى خەمى خۆیانە.

کەناڵی ناس کورد لە تێلیگرام جۆین بکە   

 

ئەرسەلان بایز  (15ی كانونی یەكەمی 2021) لە بڵاوکراوەیەکدا ئاماژەى بەوەکردووە "هەر لەکاتى دوا هەڵبژاردنى ئەنجومەنى نوێنەرانى عێراقەوە تاکو ئەمڕۆ، هەردوو حیزب لە شاشەى تەلەفزیۆن و لاپەڕەکانى ڕۆژنامەو تۆڕە کۆمەڵایەتیەکان و کۆڕو کۆبوونەوە جەماوەرییەکاندا، هەڵمەتێکى توندو بێ ئامانیان لەبەرامبەر یەکتردا دەست پێ کردووە".

 

رونیشیکردووەتەوە "پارتیەکان (ی.ن.ک) بەوە تۆمەتبار دەکەن گوایە بەشێکى واریداتى گومرگى سنورەکان و باج و خەراجى ناوخۆى ناوچەى سەوز ناگەڕێتەوە گەنجینەى وەزارەتى حکومەتى هەرێم و کەس نازانێ بەرەو کوێ دەڕوات. (ى.ن.ک)یش دەڵێ تەنیا بەشێکى واریداتى پارەى نەوت و باج و خەراجى ناوچەى زەرد دەگەڕێتەوە گەنجینەى وەزارەتى دارایی و باقیەکەى نادیارە".

 

ئەرسەلان بایز دەڵێت "هەردوو حیزب ڕۆژانە کادیرو لایەنگرانى خۆیان بە گیانى دوژمنایەتى لەبەرامبەر یەکتر پەروەردە دەکەن و قسەى سوک و هەڵبەستراو بەیەکتر دەڵێن. ڕەفتارى هەردوو حیزب جەماوەریان بێزارو ناڕەحەت کردووە. متمانەیان لە نێوان هەردوو حیزب و حکومەت لەلایەک و لەلایەکى ترەوە لەگەڵ جەماوەر کزو لاواز کردووە".

 

"هەر بۆیەش هەردوو حیزب سەربارى زیادبوونى دەنگى سێ پشت لە هەڵبژاردندا زیاتر لە نیو ملیۆن دەنگیان کەمى کردووە. بەڵام بەداخەوە هەردوو حیزب هێندەى سەرقاڵى بردنەوەى کورسى و لاف گەزاف لێدانى ژمارەى کورسیەکانیانن، هێندەى خەمى لەیەکتر بردنەوەیانە، نیو هێندە خەمى کەمکردنەوەى دەنگى جەماوەرو نەمانى متمانەى جەماوەر بە حیزبەکان نین".

 

ئەرسەلان بایز باسى لەوەشکردووە، "هاوڵاتیانى کوردستان لە ئەنجامى ئەو هەڵمەتە ناڕەوایەى حیزبەکان لەسەر یەکتر گەیشتونەتە ئەو بڕوایەى کە هەردوو حیزب قسەکانیان لەسەر یەکتر ڕاستەو هەردوو لا واریداتەکان لە یەکتر دەشارنەوە، خەمى جەماوەریان نیە. هێندەى خەمى خۆیانە. خوایە کارەکە لە دەست ئێمە دەرچووە هاوار بۆ تۆ ئێمە هەردوو حیزبەکان بگەڕێنیتەوە سەر ڕێبازى ڕاست و خزمەتگوزارى میللەت و گێڕانەوەى متمانە لە نێوانماندا".