گه‌ڕان

Shadow Shadow
سیاسه‌تی

پەیامێکى نوێ لەوەزارەتى پێشمەرگەوە لەبارەى هێرشەکانى داعش

2021.12.05 - 21:37
App store icon Play store icon Play store icon
پەیامێکى نوێ لەوەزارەتى پێشمەرگەوە لەبارەى هێرشەکانى داعش

ناس کورد-

 

وەزیرى پیشمەرگە رایگەیاند، بەزوویی تۆڵەی خوێنی تەواوی ئەو پێشمەرگانەى چەند رۆژی رابردوو دەکەنەوە کە بەهۆى هێرشەکانى داعشەوە گیانیان لەدەستدا.

 

کەناڵی ناس کورد لە تێلیگرام جۆین بکە   

 

بەپێی راگەیەنراوێکى وەزارەتى پێشمەرگە، شۆڕش ئیسماعیل وەزیرى پێشمەرگە بەشداری پرسە و هاوخەمی شەهیدانی پێشمەرگە و هاوڵاتیانی کرد و وتى "خەڵکی کوردستان دڵنیادەکەینەوە، تیرۆریستان ناتوانن بەو چالاکییە نەگریس و وەحشیگەرانەیان خەڵک و هێزی پێشمەرگە بترسێنن".

 

دەقى راگەیەنراوەکە:

 

لەمیانی بەشداریکردنی لە پرسەی شەهیدانی پێشمەرگەو هاوڵاتیانی بێ گوناح، لە پەلامارە وەحشیگەریانەکەی داعش لە رۆژی ۳ی ئەم مانگە و شەهیدبوونی ۱۳ پێشمەرگە و هاوڵاتی، وەزیری پێشمەرگە، لەنزیکەوە چاوی بە دایکه (بەیان) کەوت، ئەو دایکه جەرگ سووتاوەی، کە لەیەک کاتدا سێ ڕۆڵەی قارەمانی لەپێناو بەرگری لە کەرامەتی خۆیان و خاکی پیرۆزی کوردستان بەخشی.

 

ئەمڕۆ ٥ی ١٢ی ۲۰۲۱، شۆڕش ئیسماعیل، وەزیری پێشمەرگەی حکومەتی هەرێم، بەشداری پرسە و هاوخەمی شەهیدانی پێشمەرگە و هاوڵاتیانی کرد.

 

پاشان بەشـێوەیەکی مەیدانی سەنگەر و بارەگاکانی هێزی پێشمەرگەی لەمیحوەری مەخمور، سنوری لیواکانی ۱٤ و ۱٨ ی پیادەی وەزارەتی پێشمەرگەی لە زنجیرە چیای قەرەچووغ بەسەر کردەوە.

 

لەمیانی ئەو بەسەرکردنەوەیەدا، کە هەریەک لە لیوا قارەمان شێخ کەمال و لیوا روکن هۆشمەند حەیدەر، جێگرانی سەرۆکی ئەرکان بۆ ئۆپەراسیۆنەکان ـ ئیدارەو میرە، یاوەری بوون. وەزیری پێشمەرگه لەنزیکەوە هاوخەمی و سەرەخۆشی وەزارەتی گەیاندە ئەو پۆلە شەهیدو قارەمانەی بەدەستی تیرۆریستانی داعش شەهیدکران، بۆ ئەمەش وتی: لەناخەوە ئەو هەواڵە ئازاری داین، بەڵام ئێوەو خەڵکی کوردستان دڵنیادەکەینەوە، تیرۆریستان ناتوانن بەو چالاکییە نەگریس و وەحشیگەرانەیان خەڵک و هێزی پێشمەرگە بترسێنن، بەڵکو ئەوە زیاتر هانمان دەدات بۆ خەباتی بەردەواممان لەپێناو لەناوبردن و تێکشکاندنی تەواوەتی تیرۆریستانی داعش لەناوچەکەدا.

 

وەزیری پێشمەرگە لەمیانی بەشداری پرسەی ئەو پێشمەرگه و هاوڵاتیە بێگوناحانەدا، چاوی کەوت بە دایکە (بەیان) ئەو دایکەی، کە لەبەرگریەکی قارەمانانەدا، سێ رۆڵەی قارەمانی لەدەستدا. تیایدا وەزیری پێشمەرگە رایگەیاند: بەبینینت هەست بە ئازارێکی قووڵ دەکەم، بەڵێنت پێدەدەین، رێگە نادەین خوێنی رۆڵە ئازاکانت بەفیرۆ بڕوات و بەزوویی تۆڵەی خوێنی ئەو شەهیدانە و تەواوی شەهیدانی چەند رۆژی رابردوو دەکەینەوە.

 

لەدوای بەشداریکردنی لە پرسەی تەواوی شەهیدانی چەند رۆژی رابردوو، وەزیری پێشمەرگه، لە سەردانێکی مەیدانیدا میحوەری مەخمور، سنوری هەردوو لیواکانی ١٤ و ١٨ پیادەی لەبەرزاییەکانی قەرەچووغ بەسەرکردەوە.

 

لەوێستگەی یەکەمی سەردانەکەیدا، وەزیری پێشمەرگە لە سنوری لیوای ۱٨ی پیادە، بارەگا و سەنگەرەکانی بەرگری ئەو لیوایەی بەسەرکردەوە، لەلایەن عەمید زریان ئیسماعیل خەلیفە، فەرماندەی لیوای ۱٨ی پیادە، رونکردنەوەی پێویستی لەسەر ئەرک و مەهامی لیواکە و سنووری ئەرک و ساز و ئامادەیان بۆ پاراستنی ناوچەکە خستەڕوو، هەروەک کەموکوڕی و پێویستیەکانی لیواکەی خستە بەر دیدی وەزیری پێشمەرگەو وەفدی یاوەری.

 

وەزیری پێشمەرگە، رایسپاردن سەنگەرەکان پتەوتر و سازتر بکەنەوەو هەمیشە ئامادە و گیان لەسەر دەستبن بۆ راوەدوونانی تیرۆریستان. وتیشی: هەوڵەکانی وەزارەتی پێشمەرگە چڕکراوەتەوەو کەم و کوڕی و پێداویستیەکانتان پڕدەکەینەوە.

 

لەوێستگەی دووەمی سەردانەکەیەدا بۆ لیوای ۱٤ی پیادە، وەزیری پێشمەرگە لەگەڵ عەمید روکن علمی مزووری، فەرماندەی لیوای ۱٤ی پیادە و ئەفسەرانی باڵای لیواکە کۆبۆوە.

 

لەکۆبوونەوەکەدا، بەوردی تاوتوێی ئەو میکانیزم و پلانانە کرا، کە ببێتە رێگر لە دووبارەبوونەوەی ئەو رووداوانەو رووداوی هاوشێوەی تر.

هاوکات وەزیری پێشمەرگه فەرمانی کرد، باشتر و چاکتر لەجاران ئەرکی خۆیان بەجێ بگەینن، وەک هەمیشە چاوکراوەترو ئازایانەتر تیرۆریستان راوبنێن و تێکیانبشکێنن.

 

فەرماندەی لیوای ۱٤ی پیادە و ئەفسەرانی لیواکە، راپۆرتێکی وردیان لەسەر ئەرک و واجباتی لیواکە و رۆڵبینیان لەو سنوورە، هاوکات لەلایەن وەزیری پێشمەرگەوە، ستایشی ئەرک و فەرمانیانکرا و داوای لێکردن، کە بەم روحییەتی نەبەردی و قارەمانیەوە، زیاتر پابەندی دیسپلینە سەربازییەکان و فەرمانەکانی سەرووی خۆیان بن.

 

جەختیشیکردەوە لەوەی بەپلان و تەکنیکی نوێی ورد روبەڕووی تیرۆریستان ببنەوەو رێگه نەدەن، جارێکی تر، بوێری ئەوەیان هەبێت، نزیکی سەنگەرەکانی پێشمەرگە و خەڵکی بێ تاوانی ئەو ناوچەیە ببنەوە.