گه‌ڕان

Shadow Shadow
سیاسه‌تی

نوێ

پەیامێکی نوێ لە لاهور شێخ جەنگییەوە لەبارەی کوژرانی موراد کانی کوردەیی

2021.12.03 - 20:27
App store icon Play store icon Play store icon
پەیامێکی نوێ لە لاهور شێخ جەنگییەوە لەبارەی کوژرانی موراد کانی کوردەیی

ناس کورد- 

لاهور شێخ جەنگی پەیامێکی نوێی لەسەر ڕووداوەکانی پاش 8ی تەموز و کوژرانی موراد کانی کوردەیی و پاسەوانەکانی بڵاوکردەوە و دەڵێت، کوشتنی موراد کانی کوردەیی لەلایەن کەسانی نێو یەکێتییەوە بڕیاری لێدراوە و بە دیاریکراویش چەند کەسێکی نابەرپرسی ئەمنیی یەکێتی ئەنجامیانداوە، دەشڵێت، "هەرگیز نابم بە بەشێک لەو (یەکێتییە نوێیە)ی کە ئێستا هەندێک وا ناوزەدیان کردووە."

کەناڵی ناس کورد لە تێلیگرام جۆین بکە   

 

ئەمڕۆ هەینی 3ی کانونی یەکەمی 2021، لاهور شێخ جەنگی، هاوسەرۆکی یەکێتیی نیشتمانیی کوردستان، سەردانی دەڤەری بتوێنی کرد و لە شارۆچکەی سەروچاوەی سەر بە ناحیەی بێتواتە سەردانی خێزان و کەسوکاری ( موراد کانی کوردەیی و هاوکار نازم)ی کرد، دواتر لە هەردوو شارۆچکەی شکارتە و گوندی مێرگەسەر سەردانی خێزان و کەسوکاری (خۆشناو وەیسی و سەرکار فاخیر)ی کرد کە ڕۆژی ٢٦26ی تشرینی دووەمی 2021، لە ڕووداوێکدا لە ڕانیە کوژران. 

 

بەگوێرەی ڕاگەیەنراوێکی نوسینگەکەی، لاهور شێخ جەنگی لە نزیکەوە خێزان و خانەوادەی سەربەرزی ئەو شەهیدانەی بەسەرکردەوە و پرسە و سەرەخۆشی و هاوخەمیی قووڵی خۆی پێ ڕاگەیاندن و وتی، " ئەوەی زیاتر ئێمە و ئێوەی نیگەران کردووە ئەوەیە کە ئەم تاوانە لە لایەن نەیار و دوژمنەکانمانەوە نەبووە، بەڵکو لەلایەن دۆست و هەڤاڵانی خۆمانەوە بڕیاری لێدراوە و بە دیاریکراویش چەند کەسێکی نابەرپرسی ئەمنیی حزبەکەی خۆمان بەرامبەر کەسێک ئەنجامیانداوە کە جگە لەوەی کادر و فەرماندەیەکی دڵسۆز و بە ئەمەک بووە بۆ حزبەکەی، خاوەن سێ برای شەهیدە، بنەماڵەی شەهیدەکانیش لە پێناو یەکێتیی و ئازادیی خاکی کوردستان دەیان شەهیدیان بەخشیوە." 

 

ئاماژەی بەوەشکردووە، "چۆن دەبێت ئاوا بێوەفابین بەرامبەر بە خوێنی شەهیدان و لە پێناو پلە و پۆست و ویستی شەخسی، دەست بدەینە ململانێیەکی سیاسیی ناشەریفانە و دەستمان سوور بێت بە خوێنی هاوڕێ و هەڤاڵەکانی خۆمان و هەرچی لەگەڵمان نەبوو یان بە دڵی ئێمە نەبوو، هەڵبکوتینە سەری و بە تۆمەتی بێبنەما و ناڕەوا دەستگیریان بکەین و کادری یەکێتیی لە ژێر ئازار و ئەشکەنجەدا تیرۆر بکەین." 

 

لاهور شێخ جەنگی ئەوەشی خستووەتەڕوو، " خۆم بە شەرمەزار دەزانم بەرامبەر کەسوکاری شەهیدان و هەموو یەکێتییەکی دڵسۆز بۆ ئەو ڕووداوە نەخوازراوانەی لەم چەند مانگەی ڕابردوودا لە ژێر ناوی (یەکێتیی نوێ) ڕوویانداوە، لێرەوە ڕایدەگەیەنم یەکێتییەکەی مام و حزبی شەهیدان ئەو یەکێتییەی ئێستا نییە و بەندەش هەرگیز نابێت بە بەشێک لەو (یەکێتییە نوێیە)ی کە ئێستا هەندێک وا ناوزەدیان کردووە." 

 

ئاماژەی بەوەشکردووە، " باشترین هەنگاو کە بنرێت بۆ ڕەواندنەوەی بەشێکی کەمی توڕەیی و خەم و ئازاری خێزان و بنەماڵەی ئەو شەهیدانە، ڕادەستکردنی ئەنجامدەرانی ئەو تاوانەیە و بە سزاگەیاندنیانە لە دادگایەکی عادیلانە." 

May be an image of 3 people, child, people sitting, people standing and indoor

May be an image of 6 people, people sitting and indoor

May be an image of 1 person, child and indoor

May be an image of 3 people, people standing and outdoors