گه‌ڕان

Shadow Shadow
سیاسه‌تی

پرسیار و گومان

بنەماڵەى کارمەندەکەى دەزگاى زانیارى کە لەروبەڕووبونەوەکەى رانیە کوژرا رونکردنەوە دەدەن

2021.11.28 - 21:09
App store icon Play store icon Play store icon
بنەماڵەى کارمەندەکەى دەزگاى زانیارى کە لەروبەڕووبونەوەکەى رانیە کوژرا رونکردنەوە دەدەن

ناس کورد-

 

بنەماڵەى یەکێک لەو کەسانەى لەروبەڕوبوونەوەکەى رانیەدا کوژرا رایدەگەیەنن رووداوەکە کۆمەڵێک پرسیارو گومانی بەدوای خۆیدا هێناوە کە ناکرێ لێیان بێدەنگ بن، بەڵام دانیان بەخۆیاندا گرتووە و داوای ڕوونکردنەوە لەلایەنی پەیوەندیدار دەکەن.

 

کەناڵی ناس کورد لە تێلیگرام جۆین بکە   

 

بنەماڵەى (شامیل زرار وەرتی) لەرونکردنەوەیەکدا کە دەست "ناس کورد" کەوتووە ئاماژەیان بەوەکردووە، "بۆیە بۆ گەیشتن بە ڕاستیی ڕووداوەکە لە دانیشتنێکی ڕاستەوخۆدا داوای ڕوونکردنەوەی تەواومان لە دەزگا پەیوەندیدارەکان کردووە ئەوانیش بەڵێنی ڕوونکردنەوەیان داوە، هیوادارین لەزووترین کاتدا وەڵاممان بدەنەوە".



لە بنەماڵەی شەهید شامیل زرار وەرتی یەوە

 

(سوپاسنامەو ڕوونکردنەوە)

 

هەموو لایەک ئاگادارن ئێوارەی ڕۆژی پێنج شەممە 25/ 11/ 2021 ڕووداوێکی تەقەکردن لەناو شاری ڕانیە ڕوویدا کە بەداخەوە چەند کەسێک تێیدا بوونە قوربانی، دوابەدوای ڕووداوەکە ئاگادار کراین کوڕەکەی ئێمەش کە ماوەیەکی کەمە لە دەزگای زانیاری دەست بەکاربووە لە ڕووبەڕووبونەوەکەدا شەهید بووە، هەمان شەو تەرمەکان وەرگرتەوەو بەخاکمان سپارد.

 

لەگەڵ ئەوەی کۆی ڕووداوەکە بەگشتی و شەهیدبوونی ئەو کوڕەی ئێمە بەتایبەت کۆمەڵێک پرسیارو گومانی بەدوای خۆیدا هێنا کە ناکرێ لێیان بێدەنگ بین، بەڵام پێمان باشبوو دان بەخۆمان دا بگرین و داوای ڕوونکردنەوە لەلایەنی پەیوەندیدار بکەین.

 

بۆیە بۆ گەیشتن بە ڕاستیی ڕووداوەکە لە دانیشتنێکی ڕاستەوخۆدا داوای ڕوونکردنەوەی تەواومان لە دەزگا پەیوەندیدارەکان کردووە ئەوانیش بەڵێنی ڕوونکردنەوەیان داوە، هیوادارین لەزووترین کاتدا وەڵاممان بدەنەوە.

 

هەروەها وەک خاوەنی سێ شەهیدی سەنگەر داوا بەڕێز بافڵ تاڵەبانی هاوسەرۆکی یەکێتی نیشتمانی کوردستان دەکەین بەدواداچوون بۆ ڕاستی ڕووداوەکە بکات و نەهێڵێ خوێنی ئەو ڕۆڵەیەی ئێمە بە فێڕۆ بچێت.

 

هاوکات بەڕای گشتی و هەموو لایەکیشی ڕادەگەیەنین

ئێمە جگە لە شەهید شامیل، خاوەنی سێ شەهیدی سەنگەری ڕووبەڕووبونەوەی داعش و چەندان شەهید و برینداری داستانەکانی بەرگری نیشتمانین، هێشتا برینی لەدەستدانی شەهیدان (حەسەن سلێمان و لوقمان زرار و فەیسەڵ زرار)مان سارێژ نەبووە، بۆیە داوا لەهەموو لایەک دەکەین ڕێز لەخەبات و تێکۆشان و قوربانیمان بگرن و دۆسیەی ئێمە نەخەنە ناو ململانێی سیاسی، کێشەی شەخسی و بنەماڵەییشمان لەگەڵ کەسدا نیە.

 

لە کۆتاییدا:

سوپاسی بێ پایانمان ئاڕاستەی هەموو ئەو هاوڵاتی و کەسایەتیە بەڕێزانە دەکەین کە بەشداری بەخاک سپاردن و مەراسیمی پرسەکەمان بوون، سوپاسی هەموو ئەوانە دەکەین کە هاوخەمیان دەربڕیوە لە دوورو نزیک، ڕاستەوخۆ یان بە پەیوەندی تەلەفۆنی بەسەریان کردینەوە.

 

هەروەها بەناوی بنەماڵەکەمانەوە پرسەو هاوخەمی خۆمان ئاراستەی کەس و کاری سەرجەم قوربانیانی تری ئەو ڕووداوە کارەساتبارە دەکەین، خۆمان بە هاوخەمیان دەزانین، ئاواتەخوازبووین خوێنی ڕۆڵەکانمان بۆ بەرگری لە سنورەکانی کوردستان بڕژایە، لە خوای مەزن داواکارین سەبوری هەموو لایەک بدات و دوا ناخۆشی ئێمەو ئەوانیش بێت.

 

بنەماڵەی شەهید شامیل زرار وەرتی

 

28ی نۆڤەمبەری 2021