گه‌ڕان

Shadow Shadow
سیاسه‌تی

بەپەلە

دەوام لە زانکۆیەکى دیکە راگیرا

2021.11.23 - 17:13
App store icon Play store icon Play store icon
دەوام لە زانکۆیەکى دیکە راگیرا

 

ناس کورد-

زانکۆى راپەڕین راگرتنى دەوامى بۆ ماوەى چوار رۆژ راگەیاند، ئەوەش بەهۆى خۆپیشاندانى خوێندکارانەوە کە ماوەى سێ رۆژە بەردەوامە.

کەناڵی ناس کورد لە تێلیگرام جۆین بکە   

 

ئەنجومەنی زانکۆی راپەڕین لە راگەیەنراوێکدا (23ی تشرینی دووەمی 2021) رایگەیاند "دوای هەڵسەنگاندنی بارودۆخ و هەلومەرجی قۆناغەکە و ڕەچاوکردنی سەلامەتی گیانی خوێندکاران و بە هەندوەرگرتنی داواکاری کەسوکاری خوێندکارەکانمان، بڕیاریدا دەوامی خوێندنی زانکۆ تاوەکو ڕێکەوتی ٢٨-١١- ٢٠٢١ راگیرا".

 

پێشتر ئەنجومەنی زانکۆی سلێمانی کۆبوویەوە و لە ڕوونکردنەوەیەکی کورتدا (23ی تشرینی دووەمی 2021) رایگەیاندبوو "لەبەر پاراستنی گیانی خوێندکاران و لەسەر داواکاری بەشێک لە کەسوکاری خوێندکاران، بڕیاریدا بە وەستانی خوێندنی خوێندکاران بۆ دوو ڕۆژ ( 24ی و 25ی تشرینی دووەمی 2021) لە سەرجەم کۆلێژەکانی زانکۆی سلێمانی و گەڕانەوەی خوێندکارانی بەشەناوخۆییەکان."  

  

ئەمڕۆ بۆ ڕۆژی سێیەم لەسەریەک خۆپیشاندانی خوێندکاران لە سلێمانی بۆ داواکردنی دەرماڵە بەردەوام بوو، خۆێندکاران لە زانکۆی سلێمانییەوە بەرەو بەردەرکی سەرای سلێمانی بەڕێکەوتن، بەڵام لە نزیک شەقامی سەهۆڵەکە لەلایەن هێزە ئەمنییەکانەوە ڕێگرییان لێ کرا، دواتر لە بەردەم مەڵبەندی یەکی ڕێکخستنی یەکێتیی نیشتمانیی کوردستان گرژی و ئاڵۆزی دروست بوو.   

  

  

خوێندکاران قسەیان بۆ پەیامنێری ناس کورد کرد و دەڵێن، ئەمڕۆ ئەوان شەقام ناگرن و بەشێوەیەکی هێمنانە داوای مافی خۆیان دەکەن و هیوادارن حکومەت بە دەم داواکەیانەوە بچێت.      

  

ماوەی سێ ڕۆژە خۆپیشاندانی خوێندکاران بۆ داواکردنی دەرماڵەکانیان دەستیپێکردووە و دوێنێ دووشەممە خۆپیشاندانەکە گرژی لێکەوتەوە و چەند خوێندکارێک برینداربوون.       

  

وەزارەتی دارایی و ئابوریی هەرێم لە ڕوونکردنەوەیەکدا (22ی تشرینی دووەمی 2021) دەڵێت، بە بڕیاری ئەنجومەنی وەزیرانی ژمارە (1018) لە بەرواری 11/2/2014 و بەهۆی قەیرانی داراییەوە خەرجكردنی دەرماڵەی خوێندكاران ڕاگیراوە.        

  

دەشڵێت، پێش 2014 و دوای په‌سه‌ندكردنی بودجه‌ له‌ په‌رله‌مانه‌وه‌ تخصيصات بۆ دەرماڵەی خوێندكاران دانراوه‌ و هه‌ر لە وەزارەتی خوێندنی باڵاوه‌ خه‌رجكراوه‌ و به‌ هیچ جۆرێك نه‌هاتۆته‌وه‌ بۆ وه‌زاره‌تی دارایی و په‌یوه‌ندی به‌ داراییه‌وه‌ نییه‌.