گه‌ڕان

Shadow Shadow
سیاسه‌تی

لە سەرجەم زانکۆ و پەیمانگاکانی سلێمانی کرا بە پشوو

2021.11.23 - 16:05
App store icon Play store icon Play store icon
لە سەرجەم زانکۆ و پەیمانگاکانی سلێمانی کرا بە پشوو

ناس کورد-

لە سبەینێوە بۆ ماوەی دوو ڕۆژ لە سەرجەم زانكۆ و پەیمانگاكانی سنوری پارێزگای سلێمانی پشووە.

کەناڵی ناس کورد لە تێلیگرام جۆین بکە   

 

ئەنجومەنی زانکۆی سلێمانی کۆبوویەوە و لە ڕوونکردنەوەیەکی کورتدا (23ی تشرینی دووەمی 2021) دەڵێت، "بەپێی ئەو دەسەڵاتەی کە پێیدراوە بەپێی ماددەی سیانزەم/ بڕگەی یەکەم/ خاڵی 9 لە یاسای وەزارەتی خوێندنی باڵا و توێژینەوەی زانستی، لەبەر پاراستنی گیانی خوێندکاران و لەسەر داواکاری بەشێک لە کەسوکاری خوێندکاران، بڕیاریدا بە وەستانی خوێندنی خوێندکاران بۆ دوو ڕۆژ ( 24ی و 25ی تشرینی دووەمی 2021) لە سەرجەم کۆلێژەکانی زانکۆی سلێمانی و گەڕانەوەی خوێندکارانی بەشەناوخۆییەکان."

 

بۆ ڕۆژی سێیەم لەسەریەک خۆپیشاندانی خوێندکاران لە سلێمانی بۆ داواکردنی دەرماڵە بەردەوامە و خۆێندکاران لە زانکۆی سلێمانییەوە بەرەو بەردەرکی سەرای سلێمانی بەڕێکەوتن، بەڵام لە نزیک شەقامی سەهۆڵەکە لەلایەن هێزە ئەمنییەکانەوە ڕێگرییان لێ کرا، دواتر لە بەردەم مەڵبەندی یەکی ڕێکخستنی یەکێتیی نیشتمانیی کوردستان گرژی و ئاڵۆزی دروست بوو.   

  

  

خوێندکاران قسەیان بۆ پەیامنێری ناس کورد کرد و دەڵێن، ئەمڕۆ ئەوان شەقام ناگرن و بەشێوەیەکی هێمنانە داوای مافی خۆیان دەکەن و هیوادارن حکومەت بە دەم داواکەیانەوە بچێت.    

  

ماوەی سێ ڕۆژە خۆپیشاندانی خوێندکاران بۆ داواکردنی دەرماڵەکانیان دەستیپێکردووە و دوێنێ دووشەممە خۆپیشاندانەکە گرژی لێکەوتەوە و چەند خوێندکارێک برینداربوون.     

  

وەزارەتی دارایی و ئابوریی هەرێم لە ڕوونکردنەوەیەکدا (22ی تشرینی دووەمی 2021) دەڵێت، بە بڕیاری ئەنجومەنی وەزیرانی ژمارە (1018) لە بەرواری 11/2/2014 و بەهۆی قەیرانی داراییەوە خەرجكردنی دەرماڵەی خوێندكاران ڕاگیراوە.      

  

دەشڵێت، پێش 2014 و دوای په‌سه‌ندكردنی بودجه‌ له‌ په‌رله‌مانه‌وه‌ تخصيصات بۆ دەرماڵەی خوێندكاران دانراوه‌ و هه‌ر لە وەزارەتی خوێندنی باڵاوه‌ خه‌رجكراوه‌ و به‌ هیچ جۆرێك نه‌هاتۆته‌وه‌ بۆ وه‌زاره‌تی دارایی و په‌یوه‌ندی به‌ داراییه‌وه‌ نییه‌.