گه‌ڕان

Shadow Shadow
سیاسه‌تی

چوار بازنە

نەوەى نوێ داواى کەمکردنەوەى کورسییەکانى پەرلەمانى کوردستان دەکات

2021.11.16 - 17:21
App store icon Play store icon Play store icon
نەوەى نوێ داواى کەمکردنەوەى کورسییەکانى پەرلەمانى کوردستان دەکات

ناس کورد-

 

جوڵانەوەى نەوەى نوێ داواى کەمکردنەوەى کورسییەکانى پەرلەمانى کوردستان لە 111 کورسییەوە بۆ 107 کورسی دەکات و جەخت لە هەڵبژاردن لەوادەى خۆیدا دەکاتەوە.

کەناڵی ناس کورد لە تێلیگرام جۆین بکە   

 

جوڵانەوەکە  (16ی تشرینی دووەمی 2021) لە راگەیەنراوێکدا پێشنیازیکردووە هەرێمى کوردستان بکرێت بە چوار بازنەى هەڵبژاردن و هەر پارێزگایەک بازنەیەک بێت. ژمارەى کورسییەکانى پەرلەمانى کوردستان کەم بکرێتەوە بۆ ١٠٧ کورسى. ژمارەى کورسییەکانى پێکهاتەکان کەم بکرێتەوە بۆ ٧ کورسى.

 

دەقى راگەیەنراوەکە:

 

سەبارەت بە بابەتى هەڵبژاردنى پەرلەمانى کوردستان و کاراکردنەوەى کۆمسیۆنى سەربەخۆى هەڵبژاردن و راپرسى هەرێمى کوردستان، جوڵانەوەى نەوەى نوێ لەگەڵ ئەنجامدانى هەڵبژارداندایە لەوادەی خۆى و هاوکات لەگەڵ کۆمسیۆنێکى سەربەخۆ و بێلایەن و پیشەیین دور لە پشکپشکێنەی حیزبی، کە بتوانێت لەئاست ئەم قۆناغە و سەرپەرشتیکردنى هەڵبژاردنێکى پاک و بێگەرد بێت.

 

بۆ ئەو مەبەستەش، جوڵانەوەى نەوەى نوێ کۆمەڵێک پێشنیاز لەسەر یاساى هەڵبژاردنەکان و هاوکات کۆمسیۆنى هەڵبژاردنەکان دەخاتە روو، کە تەواوى ئەو پێشنیازانە لە بەرژەوەندى خەڵک و پرۆسەیەکى خاوێنى هەڵبژاردن و پەرلەمانێکى بەهێزە، کە لەخوارەوە بەکورتى تێبینییەکان دەخەینە بەرچاوى راى گشتیى.

 

“تێبینی جوڵانەوەی نەوەی نوێ تایبەت 

بە یاساى هەڵبژاردنەکانی پەرلەمانی هەرێمی کوردستان”

 

یەکەم: هەرێمى کوردستان بکرێت بە چوار بازنەى هەڵبژاردن و هەر پارێزگایەک بازنەیەک بێت.

دووەم: ژمارەى کورسییەکانى پەرلەمانى کوردستان کەم بکرێتەوە بۆ ١٠٧ کورسى.

سێیەم: ژمارەى کورسییەکانى پێکهاتەکان کەم بکرێتەوە بۆ ٧ کورسى، بەم شێوەیە:

سلێمانى :

یەک کورسى مەسیحى.

یەک کورسى تورکمان (گەرمیان(

هەولێر :

دوو کورسى مەسیحى.

دوو کورسى تورکمان.

دهۆک :

یەک کورسى مەسیحى.

چوارەم: پێکهاتەکان لیستی تایبەت بە خۆیانیان دەبێت و تەنها هاوڵاتییانی ئەو پێکهاتانە بۆیان هەبێت دەنگ بدەن بە لیستى خۆیان،وە تۆمارى دەنگدانى خۆیان جیاواز بێت و هاوڵاتی دەرەوەی پێکهاتەکان بۆیان نەبێت دەنگ بدەن بە لیستی پێکهاتەکان.

پێنجەم: دەنگدان بەشێوەی ئەلیکترۆنى و بایۆمەترى دەبێت و، تەنها ئەوانە دەنگ دەدەن کە کارتى بایۆمەترییان هەیە.

 

شەش: بژاردنى دەنگەکان بەشێوەى ئەلکترۆنى دەبێت و دواتریش کاتى داخستنى سندوقەکان تەواوى سندوقەکانى دەنگدان بەدەست دەژمێردرێتەوەو، بەراورد دەکرێتەوە لەگەڵ ژمارەى دەنگە ئەلکترۆنىەکان.

 

حەوتەم: پێویستە لەماوەى ٢٤ کاتژمێردا ئەنجامى بەرایى هەڵبژاردنەکان رابگەیەندرێت.

 

هەشتەم: پێویستە لەماوەى دوو هەفتەدا ئەنجامى کۆتایى هەڵبژاردنەکان رابگەیەندرێت و هەروەها یەک بەیەکى فۆرمی دەنگدان بەراورد دەکرێتەوە بە پەنجە مۆر و هەموو دەنگە دووبارەکان رەت دەکرێنەوە.

 

نۆیەم: کاتژمێر ٦ى ئێوارە سندوقەکانی دەنگدان دادەخرێن و بەهیچ شێوەیەک کات درێژ ناکرێتەوە.

 

دەیەم: دەستەیەکی دادوەری تایبەت بە هەڵبژاردنەکان درووت دەکرێت لە پێنج دادوەرى بێ لایەن کە هیچ کارى حزبیان نەکردبێت و ئەنجامى کۆتایى لەلایەن ئەو دەستە دادوەرییەوە  پەسەند دەکرێت.

 

یانزەیەم: هەڵبژاردنى ئەو دادوەرانە لەپەرلەمانى کوردستان دەبێت و پێویستە بەڕێژەى ٢|٣ پەسەند بکرێت و دەنگیان لەسەر بدرێت.

 

دوانزەیەم: دەنگدانى تایبەت و گشتیى لەهەمان رۆژدا ئەنجام دەدرێت

 

سیانزەیەم: لە رێی کۆمسیۆنی عێراق و حکومەتی عێراقەوە داوا بکرێت کە هەڵبژاردن بە سەرپەرشتی نێودەوڵەتی و یونامی بێت.

 

چواردەیەم: سێ مانگ پێش ئەنجامدانی هەڵبژاردن، پێویستە تۆماری دەنگدەران لە ناوى دووبارە و کۆچکردووان پاککرابێتەوە.

————-

تێبینى جوڵانەوەی نەوەی نوێ لەسەر یاساى کۆمیسیۆنی سەربەخۆی  هەڵبژاردن و راپرسی لە هەرێم”

 

یەکەم: ژمارەى ئەندامان کۆمسیۆن ٩ ئەندام دەبن.

 

دووەم: دەنگدان لەناو کۆمیسیۆن و پەسەندکردنى ئەنجامەکان و هەموو بڕیارێکى تر بەڕێژەى ٢|٣ پەسەند دەکرێت (واتە پێویستی بە دەنگی ٦ ئەندام هەیە).

 

سێیەم: هەموو کۆمیسیارەکان دادوەر دەبن و دوور دەبن لە ئینتیماو پشک پشکێنەى حزبى.

 

چوارەم: تێپەڕاندنی ئەم یاسایە و هەموارکردنەوەی یاساکە پێویستى بەدەنگى ٢|٣ى رەهای پەرلەمانی کوردستان هەیە (واتە پێویستی بە دەنگی ٧٤ پەرلەمانتار هەیە).



جوڵانەوەى نەوەى نوێ 14/11/2021