گه‌ڕان

Shadow Shadow
سیاسه‌تی

زانیاریی زیاتر

ناوەڕۆکی ئەو پەیامەی کازمی ’’بە زمانێکی توند’’ گەیاندییە قائانی و میلیشیاکان

2021.11.09 - 13:55
App store icon Play store icon Play store icon
ناوەڕۆکی ئەو پەیامەی کازمی ’’بە زمانێکی توند’’ گەیاندییە قائانی و میلیشیاکان

ناس کورد-

مستەفا کازمی، سەرۆکوەزیرانی عێراق لە کۆبوونەوەکەیدا لەگەڵ ئیسماعیل قائانی، فەرماندەی فەیلەقی قودسی سەر بە سوپای پاسدارانی ئێران "بە زمانێکی زۆر توند قسەی کردووە و سور بووە لەسەر سزادانی ئەنجامدەرانی هەوڵی تیرۆرکردنی لە ڕێگای هێرشكردنە سەر ماڵەكەی لە ناوچەی سەوز."

کەناڵی ناس کورد لە تێلیگرام جۆین بکە   

 

بەگوێرەی ئەو زانیارییانەی میدیاكار و ڕۆژنامەنووس ئەحمەد مەلا تەڵاڵ، وتەبێژی پێشووی حكومەت، بڵاوی كردووەتەوە و "ناس كورد" بینیویەتی (9ی تشرینی دووەمی 2021)، کازمی زۆر توند قسەی لەگەڵ قائانی کردووە و پێی وتووە "حکومەت سورە لەسەر پاراستنی شکۆ و سەروەری دەوڵەت، دژی دیاردە و كاری نا دەوڵەتییە".

 

جگە لەوەش، بەپێی قسەکانی مەلا تەڵاڵ، کازمی لەڕێگەی قائانییەوە پەیامێکی گەیاندووەتە گروپە میلیشیا شیعییەکان کە "ئارامیمان تاقی مەکەنەوە."

 

باسی لەوەشکردووە  "کازمی جەختی کردووەتەوە، بکەرانی هەوڵی تیرۆرکردنی بە ناو دەناسێتەوە و دەیاندۆزێتەوە و دەیانداتە دادگا."

 

هاوکات ماڵپەڕی مودارای ئێرانی لە زاری سەرچاوەیەکەوە نوسیویەتی، "قائانی لەسەر داوای کازمی سەردانی بەغدای کردووە".

 

لە لایەکی ترەوە، ماڵپەڕی "العربي" لەندەنی لە ڕاپۆرتێکدا (9ی تشرینی دووەمی 2021) دەڵێت، سەردانەکەی قائانی قەیرانەکەى بەلایەكدا نەخستووە وەک ئەوەی زۆربەی چاودێران پێشبینییان دەکرد، بۆیە لەوانەیە ئێران لە دوو ڕۆژی داهاتوودا دەستێوەردانی بەهێزتر بکات.

 

دەشڵێت، کازمی سور بووە لەسەر گرنگیی ڕادەستکردنی ئەو کەسانەی تێوەگلاون لە بەئامانجگرتنی ماڵەکەی بە فڕۆکەی بێفڕۆکەوان و ناردنیان بۆ بەردەم دادگا، ئەو بابەتەش گفتوگۆیەکی زۆری لەسەر کراوە چونکە بەشێک لە ئامادەبووانی کۆبوونەوەی لایەنە شیعەكان ناڕازی بوون لەسەر ئەو داوایە.". لایەنە شیعەكان پێیان وایە ئەگەر بچنە ژێرباری داوای رادەستكردن، مانای وایە ئەوان لە پشت هەوڵی تیرۆركردنی سەرۆك وەزیرانەوەن. 

 

لەم میانەیەشدا موشریق عەباس، ڕاوێژکاری سیاسیی کازمی لە تویتێکیدا، بەڵێنی ڕادەستکردنی هێرشبەران دەدات بە دادگا.


موشریق عەباس نوسیویەتی، "هیچ کاتێک و لەژێر هیچ فشارێکدا سازش ناکەین لە ڕادەستکردنی ئەو تیرۆرستە بکوژانە بە دادگا کە هەوڵی تیرۆرکردنی سەرۆکی ئەنجومەنی وەزیرانیان دا".

 

دەشڵێت، "عێراق خۆی زۆر بە قووڵی بریندارە، هەر کەسێکیش هەوڵ بدات یاری بەو برینە بکات، وەڵام وەردەگرێت."

 

هەر دوای کۆبوونەوە کازمی و قائانی، درەنگانێکی شەو لایەنە شیعەكانی چوارچێوەی هەماهەنگی شیعە كە جگە لە ڕەوتی سەدر زۆربەی هێزە سیاسییەكان لەخۆدەگرێت لەگەڵ سەرۆكایەتییەكانی كۆمار و وەزیران و ئەنجومەنی دادوەری لەسەر چەند خاڵێك ڕێككەوتوون بۆ هێوركردنەوەی گرژییەكانی پاش هەڵبژاردنی پێشوەختە لەعێراق.

 

بەیاننامەیەكی كۆبوونەوەی شەوی ڕابردووی ئەم لایەنانە، كە وێنەی بەدەست "ناس كورد" گەیشتووە (9ی تشرینی دووەمی 2021) جەخت لە چەند خاڵێك دەكاتەوە لەوانە: ئیدانەكردنی هێرش بۆ سەر خۆپیشاندەرانی ناڕازی لە ئەنجامەكانی هەڵبژاردن و لێپێچینەوە لە تاوانباران، ئیدانەكردن و ڕەتكردنەوەی تاوانی هێرشكردنە سەر ماڵی سەرۆك وەزیران و ڕووبەڕووكردنەوەی ئەنجامدەرانی لەگەڵ یاسا.

 

بەیاننامەكە جەخت لەوەش دەكاتەوە گرژییەكان كەم بكرێنەوە، هەڵمەتی میدیایی رابگیرێت، خەڵك دڵنیا بكرێنەوە.

 

لەبارەی ئەنجامەكانی هەڵبژاردنیشەوە جەخت لەوە دەكاتەوە "چارەسەری یاسایی بۆ بدۆزرێتەوە كە متمانە بۆ پرۆسەكە بگێڕێتەوە". هەروەها جەخت لە پاراستنی ئاشتی كۆمەڵایەتی دەكاتەوە.