گه‌ڕان

Shadow Shadow
سیاسه‌تی

وەزارەتی ناوخۆی زانیاریی نوێ لەبارەى هەوڵی تیرۆرکردنی کازمی ئاشکرا دەکات

2021.11.07 - 09:39
App store icon Play store icon Play store icon
وەزارەتی ناوخۆی زانیاریی نوێ لەبارەى هەوڵی تیرۆرکردنی کازمی ئاشکرا دەکات

ناس کورد-

وەزارەتی ناوخۆی عێراق ئاشکرای کرد، هەوڵی تیرۆرکردنی مستەفا کازمی، سەرۆکوەزیرانی عێراق لەڕێگەی سێ فڕۆکەی بێفڕۆکەوانەوە ئەنجام دراوە و ماڵەکەی کازمیان کردووەتە ئامانج.

کەناڵی ناس کورد لە تێلیگرام جۆین بکە   

 

 

وەزارەتەکە لە ڕوونکردنەوەیەکدا (7ی تشرینی دووەمی 2021) دەڵێت، "هێزە ئەمنییەکان توانیویانە دوو فڕۆکەی بێفڕۆکەوان تێکبشکێنن."

 

دەشڵێت، "ئەوەی ڕوویدا کارێکی ترسنۆکانە بووە و دەوڵەتی عێراقی و سەرجەم عێراقییەکانی کردووەتە ئامانج چونکە کازمی نوێنەرایەتی هەموو گەل دەکات، ئەوەی ڕوویدا بە تەواوی ڕەتکراوەتەوە."

 

دەشڵێت، "هێرشەکە بووەتەهۆی برینداربوونی چەند پاسەوانێک و لەئێستادا لەژێر چارەسەری تەندروستییدان."

 

باسی لەوەشکردووە، "لێکۆڵینەوەیەکی فراوان لە ڕووداوەکە دەستیپێکردووە و تیمێکی تایبەت و تەواو تەرخان کراوە بۆ گەیشتن بە تاوانباران و ئەو لایەنەی کە تێوەگلاوە لە ڕووداوەکە."

 

بەگوێرەی ڕاگەیەنراوی وەزارەتی ناوخۆ، بەرەبەیانی ئەمڕۆ (7ی تشرینی دووەمی 2021) شوێنی مانەوەی مستەفا كازمی سەرۆك وەزیرانی عێراق لە ناوچەی سەوزی بەغدا بە سێ فڕۆكەی بێفڕۆكەوان دووچاری هێرشی موشەكی بوویەوە، لە ئەنجامیشدا هەندێك لە پاسەوانەكانی بریندار بوون.

 

لەپاش هێرشەكە مستەفا كازمی لە پەیامێكی ڤیدیۆییدا دەركەوت و ڕایگەیاند، "ماڵەكەم دووچاری دوژمنكارییەكی ترسنۆكانە بووەتەوە، سوپاس بۆ خوا خۆم و ئەوانەی لەگەڵما كار دەكەن سەلامەتن".

 

هەروەها وتیشی، فڕۆكەی بێفرۆكەوان و موشەكی ترسنۆكانە وڵات بنیات نانێن، ئێمە لە ڕێگای دەزگاكانی دەوڵەتەوە خەریكی بنیاتنانی دەوڵەتی خۆمانین، داوا لە هەموو لایەنەكانیش دەكەن دیالۆگ بكەن لە پێناو عێراق و ئایندەی عێراق.

 

هەوڵی تیرۆركردنی كازمی پاش ڕۆژێك لە گرژییە ئەمنییەكانی بەردەم ناوچەی سەوز دێت كە تێیدا لایەنگرانی گروپە چەكدارەكانی نزیك لە ئێران و چەكدارە خۆپیشاندەرەكانیان دژی ئەنجامەكانی هەڵبژاردن، لەگەڵ هێزە ئەمنییەكان بەرەنگاربوونەوە و چەند كوژراو و بریندارێكی لێ كەوتەوە، بەدوایدا سەرانی گروپەكان هەڕەشەی توند و ڕاستەوخۆیان ئاراستەی مستەفا كازمی كرد.