گه‌ڕان

Shadow Shadow
سیاسه‌تی

سكاڵای یاسایی و رێكاری نوێ

كێشەی هاوسەرۆكانی یەكێتی؛ كۆتایی چارەسەرە چاوەڕوانكراوەكان

2021.11.03 - 12:13
App store icon Play store icon Play store icon
كێشەی هاوسەرۆكانی یەكێتی؛ كۆتایی چارەسەرە چاوەڕوانكراوەكان

ناس كورد-
پاش دەركردنی بڕیاری دوورخستنەوەی لاهور شێخ جەنگی و ژمارەیەك لە ئەندامی سەركردایەتی دەورووبەری، هەموو دەرگاكان لەسەر چارەسەری دوو لایەنەی كێشەكان داخران و پێشهاتی نوێ خستنەڕووی بەڵگە و گرتنەبەری هەنگاوی تاكلایەنەی زیاترە بۆ كۆتاییهێنان چاوەڕوانییەكانی گەڕانەوە بۆ دۆخی پێشووتر.

کەناڵی ناس کورد لە تێلیگرام جۆین بکە   

 

بەگوێرەی بەدواداچوونەكانی "ناس كورد" لە چەند سەرچاوەیەكی جیاجیاوە (3ی تشرینی یەكەمی 2021)، ئەگەرچی میدیا فەرمییەكانی یەكێتی بە ئەنقەست هەواڵی دوورخستنەوەی لاهور شێخ جەنگی و چوار ئەندامەكەی تری سەركردایەتییان بڵاو نەكردووەتەوە، بەڵام بەرپرسانی باڵای ئێستای یەكێتی سوورن لەسەر ئەو بڕیارەی لە كۆتاییدا بە ئیمزای بافڵ تاڵەبانی دەرچووە و پێشهاتەكان ڕاڕایی و ئەگەری پاشەكشەیان تێدا نییە.

 

هەر بەگوێرەی زانیارییەكان، لە هەڵبژاردنی 10ی تشرینی یەكەمی 2021 دا سەرپەرشتیارانی یەكێتی باوەرێكیان وەهایان لا دروستبووە كە ئەو كەسانەی لە دەوروبەری لاهور شێخ جەنگی ماون بەهەموو توانایان دژایەتی هەڵمەت و كاندیدانی یەكێتی دەكەن بۆ ئەوەی دواتر لە كاتی پاشەكشەكردنیدا وێنەیەكی وەها دروست ببێت پاشەكشەی یەكێتی بەهۆی بەشداری پێنەكردنی ئەوانەوە بووە. لە لای خۆشییەوە لاهور شێخ جەنگی لەكاتی هەڵمەت و لەپاش هەڵبژاردنیش بانگەشەی ئەوەی كردووە كە رێگەی بەشداریكردنی پێ نادرێت و ئەمەشی بە بەشێك لە درێژكراوەی ئەو پلانگێڕییە ناوبردووە كە ناوبەناو باسی دەكات.

 

هەر بەگوێرەی زانیارییەكان، ئەوەی گومانی بەرپرسانی یەكێتی زیاتر كردووە بەم دواییانە لە ستافی چواردەوری لاهور شێخ جەنگی، دوو پێشهاتی سەرەكی بوون، ئەوانیش: ئەنجامەكانی دەنگدانی تایبەت كە پوچەڵكردن و زیانگەیاندنی زۆری لە یەكێتی تێدابووە لە هەندێك یەكەی سەربازی بە ئەنقەست و شێوەیەكی رێكخراو و ئەمە بەكاری لاهوری شێخ جەنگی دەزانن، هەروەها بەم دواییانەش سەرهەڵدانەوەی دۆسییەی ژەهرخواردكردنی بەرپرسانی یەكێتی بەسەردا هاتووە كە پەنجەی تۆمەتی تێدا بۆ لاهور شێخ جەنگی درێژ دەكرێت، ئەوەش پرسیار و بارگرانی زۆری لەسەر چۆنییەتی بەرەنگاربوونەوەی دروستكردووە، بەتایبەت پاش ئەوەی سەدای گەیشتووە بە میدیای عێراقی و عەرەبی و بە كێشەیەكی ناوخۆیی نەماوەتەوە.

 

لەدەرەوەی ئەم دوو هۆكارەش كوردستان لەبەردەم ئامادەكارییدا بۆ هەڵبژاردنی داهاتووی پەرلەمان و هێشتا سیستمی ئەو هەڵبژاردنەش رێژەیی و یەك لیستییە لەسەر ئاستی كوردستان، ئەم پێشهاتە چاوەڕوانكراوەش گوشارێكی ترە لەسەر یەكێتی بۆ ئەوەی لە ئێستاوە كێشەكانی بەلایەكدا بخات و خۆی بۆ ئەم وێستگەیە ئامادە بكات، ئەگەریش هەڵبژاردنەكەی نەكرێتە بازنەیی ئەوە پاشەكشەی دەنگەكانی یەكێتی بەزەقی لە كورسییەكانیشیدا ڕەنگ دەداتەوە، بە پێچەوانەی هەڵبژاردنی فرە بازنەی عێراقەوە.

 

پاش ئەوەی دوێنی (2ی تشرینی دووەم) بافڵ تاڵەبانی هاوسەرۆكی یەكێتی بڕیاری دەركردنی بۆ لاهور شێخ جەنگی و شادمان مەلا حەسەن و ژینۆ محەمەد دەركرد و بڕیاری هەڵپەساردنی بۆ ئاراس شێخ جەنگیشی دا. مقۆ مقۆو دەمەقاڵە لەنێوان هەردوو بەرەكە لەبارەی شەرعیەتی بڕیارەكانەوە دروست بووە.

 

دەقی بڕیارەكانی بافڵ تاڵەبانی پشت ئەبەستێت بە بڕیارێك كە هەڵگری ژمارە 311 یە لەگەڵ هەندێك بڕگەو خاڵی پەیڕەو، بڕیارەكەش لە سێ کۆبونەوەی جیاجیای بافڵ تاڵەبانیدا لەگەڵ سەرکردایەتییەكانی سلێمانی و هەولێر و كەركوكدا دراوە، تایبەتیشە بە لێكۆڵینەوە لە كێشەكانی ناوخۆی یەكێتی، بەسەرۆكایەتی بافڵ تاڵەبانی هاوسەرۆكی یەكێتی، هەروەها بە ئەندامێتی جەمسەرەكانی ئێستای ناو حیزبەكە كە هەریەك لە ڕەفعەت عەبدوڵای بەرپرسی دەستەی كارگێرییە لە باڵی كەركوكییەكان، شاڵاو عەلی عەسكەری بەرپرسی مەكتەبی رێكخستن و شاڵاو كۆسرەت ڕەسوڵە بە نوێنەرایەتی هەولێرییەكان، لەگەڵ ئەمین بابەشێخ ئەندامی مەكتەبی سیاسی و وتەبێژی یەكێتی.

 

ئەو بڕگانەی پەیڕەویش كە بافڵ تاڵەبانی پشتی پێ بەستووە، زیاتر تایبەتن بە كاركردن لەدژی بەرژەوەندی یەكێتی و پێشێلكردنی پرەنسیپە حیزبییەكان، هەندێك لە ئەندامانی سەركردایەتی لایەنگری بافڵ تاڵەبانیش باسیان لەوەكردووە بڕیارەكان دەچنە خانەی سزادانی حیزبییەوە بۆ ئەوانەی زیانیان بە یەكێتی گەیاندووە كە دوورخراوەكانن، لانیكەم هیچ كەمپین و بەشدارییەكیان نەبووە لە هەڵمەتی هەڵبژاردنی یەكێتی، قسەش زۆر لەناو یەكێتی هەیە كە هەندێكیان ژێربەژێر كاریان بۆ پەیجی هەندێك لیستی ڕكابەر كردبێت.

 

ئێستا بەرەی لاهور شێخ جەنگی لەهەوڵدان بیسەلمێنن كە بڕیاری دوورخستنەوەیان نا پەیڕەوەییە، بەو پێیەی هاوسەرۆك و ئەندامانی سەركردایەتی یەكێتی هەڵبژێردراوی كۆنگرەی یەكێتین، لابردنیشیان تەنها بە میكانیزمی حیزبی دەكرێت كە داواكاری 51 ئەندام و دەنگدانی 2/ 3 ی ئەندامانی ئەنجومەنی سەركردایەتییە، بەڵام میدیاكانی دەباشان و سەرچاوەكانی "ناس كورد" باس لەوە دەكەن لەپاش بڕیاری دووخستنەوە، لە ماوەیەکی نزیکدا بەڵگە و دانپێدانانی ئەو کەسانە بڵاودەکرێنەوە کە بە تۆمەتی سیخوڕی دەستگیرکراون و هەفتەی داهاتوو بە تۆمەتی ژەهرخواردکردنی سەرکردەکانی یەکێتی سکاڵای یاسایی دژی لاهور شێخ جەنگی تۆمار دەکرێت.