گه‌ڕان

Shadow Shadow
سیاسه‌تی

زانیاریی زیاتر

ڕۆژنامەنووسەكانی میدیای لاهور جەنگی یاداشتێكیان بڵاوكردەوە

2021.10.18 - 15:49
App store icon Play store icon Play store icon
ڕۆژنامەنووسەكانی میدیای لاهور جەنگی یاداشتێكیان بڵاوكردەوە

ناس کورد- 

ئەمڕۆ دووشەممە 18ی تشرینی یەکەمی 2021 میدیاكارەكانی میدیای لاهور جەنگی یاداشتێكیان بڵاوكردەوە و دەڵێن، ڕووداوەکانی 8ی تەموز  شۆكێكی گەورە بوو بۆ ئەوان و تووشی دڵەڕاوكێ و بێ ئومێدی بوون و  تا ئێستاش زۆربەی كارمەندانیان بێكارن.

کەناڵی ناس کورد لە تێلیگرام جۆین بکە   

 

دەقی یاداشتەكە كە ئاراستەی چەند لایەنێكی پەیوەندیار كراوە:

 

لە دوای رووداوەكانی ۸ی تەمووزی ئەمساڵەوە، بەهۆی كێشە ناوخۆییەكانی یەكێتیی نیشتمانیی كوردستانەوە، چەند دەزگایەكی میدیایی نزیك لە بەڕێز لاهور شێخ جەنگی هاوسەرۆكی یەكێتی، داخران، لەنێویاندا (تۆڕی هەواڵی ژیان) كە تۆڕێكی میدیایی دیجیتاڵی بەرفراوان بوو، بە زمانەكانی كوردی(سۆرانی-بادینی)، ئینگلیزی و عەرەبی وەشانی دەكرد. تا رۆژی داخستنی لە (14-7-2021) بە سەرجەم بەشەكانییەوە 74 كارمەند و رۆژنامەنووس لەم دەزگایەدا كاریان دەكرد، كە زۆرینەیان رۆژنامەنووسی ئەكادیمیی و پرۆفیشناڵی بە ئەزموون و ناسراوبوون.

 

لە سەرەتادا ئەو دۆخەی كە روویدا، شۆكێكی گەورە بوو بۆ ئێمەی كارمەندانی (تۆڕی هەواڵی ژیان)، تووشی دڵەڕاوكێ و بێ ئومێدی بووین، لەو كاتە دژوارەدا، بەڵێنێكی بەڕێز قوباد تاڵەبانی جێگری سەرۆكی حكومەتی هەرێم، كەمێك دڵنەوایی بە ستافەكەمان بەخشی، رۆژی 16-7-2021 تیمێك بە نوێنەرایەتیی سەندیكای رۆژنامەنووسان و سەنتەری میترۆ و رۆژنامەی هاوڵاتی، سەردانی ناوبراویان كرد، لەوێدا بەڕێز قوباد تاڵەبانی زۆر بە روون و رەوانی ئەم قسەی كرد كە لێرەدا وەك خۆی بڵاویدەكەینەوە كە وتی “لەسەر ئەو بنەمایەی هەندێك كەناڵ و پەیجی دیاریكراو داخراون، كارمەندەكانیان نە نانبڕاو دەبن و نە دووچاری دەركردن دەبن”، بەڵام وا دیاربوو دڵەڕاوكێ و بێ ئومێدییەكەی سەرەتامان لە شوێنی خۆیدا بوو، چونكە دەركەوت بەڵێنەكەی بەڕێز قوباد تاڵەبانی، تەنها دروشم بوو، چونكە لە راستییدا نەك هەر نانبڕاو كراین، بەڵكو میدیاكەمان داخرا، كە پێشێلكاریی زەقی یاسای رۆژنامەگەرییە كە بەگوێرەی ئەو یاسایە نابێ هیچ  دەزگایەكی میدیایی دابخرێت یان قەدەغە بكرێ، هەروەها چارەنووسی 74 رۆژنامەنووس خرایە مەترسییەوە، تا ئێستاش زۆربەی كارمەندانی ژیان بێكارن.

 

لەلایەكی ترەوە پێویستە ئاماژە بەوە بكەین لە سەرەتای مانگی ئاب، لە لایەن ئۆفیسی رۆژنامەوانی بەڕێز بافڵ تاڵەبانی هاوسەرۆكی یەكێتیی نیشتمانیی كوردستانەوە، پەیوەندی بە كارمەندانی تۆڕی هەواڵی ژیانەوە كرا و بەڵێنی ئەوەیان پێدرا كە دەزگاكە دەخەنەوە گەڕ و كارمەندەكان بە سیاسەت و ستراتیژی نوێوە دەگەڕێنەوە سەر كاری خۆیان، هەروەها بەڵێنی ئەوەیان دا كە موچەی دوو مانگیش خەرج دەكرێت (موچەی مانگی شەش كە مافێكی ئاسایی بوو، چونكە سەرجەم كارمەندەكان دەوامی خۆیان كردبوو، لەگەڵ موچەی مانگی حەوت كە بە هەمان شێوە بەردەوام بوون لە كاركردن بەڵام لە ماڵەوە) لەسەر بنەمای ئەو بەڵێنانە، كارمەندانی ژیان سەرجەم ئەو كەلوپەل و پێداویستیانەیانەی كە لایان بوو(بە هەزاران دۆلار دەخەمڵێنرا)، گەڕاندنیانە بۆ ئۆفیسی تۆڕی هەواڵی ژیان، بەڵام لێرەدا دەڵێین بە داخەوە ئەم بەڵێنەی ئۆفیسی رۆژنامەوانی بەڕێز بافڵ تاڵەبانی-یش وەك خۆی جێبەجێ نەكرا، لە جیاتی دوو موچە كە مافێكی ئاسایی و یاسایی ستافەكەمان بوو تەنها یەك موچەیان خەرج كرد، هەروەها بەڵێنی بەگەڕخستنەوە و گەڕانەوەی كارمەندەكانیشان بۆ سەر كار جێبەجێ نەكرد، لە جیاتی ئەوە هەستان ئۆفیسی (تۆڕی هەواڵی ژیان)یان بە بەرچاوی كارمەندەكانییەوە، بەخشی بە دەزگایەكی میدیایی نزیك لە خۆیان، ئەو ئۆفیسەی كە چەند مانگ لەمەوبەر ستافی تۆڕی هەواڵی ژیان بە شەونخوونی و ماندووبوونێكی زۆر توانیبوویان بۆ دەزگاكەی دروست بكەن.

 

بەڵام دەركەوت ئەوان هەر لە سەرەتاوە نیەتی باشیان نەبووە و تەنها ئامانجیان ئەوە بووە، دەستبگرن بەسەر كەلوپەل و پێداویستییەكان و ئۆفیسی تۆڕی هەواڵیی ژیان. هەروەها بەشێك لە كەلوپەل و ئامێرەكانی ئۆفیسەكە كە چەند مانگێك لەمەوبەر لە بازار كڕدرابوون و مانگانە بە قیست بڕێك لە پارەكەیان دەدرایەوە، ئێستا ئەو لایەنەی دەستی بەسەر كەلوپەلەكاندا گرتووە، ئامادەنییە مافی ئەو هاوڵاتیانەش بدات، یان كەلوپەلەكانیان بۆ بگەڕێنێتەوە، لەكاتێكدا بڕیار بوو لەم دۆخەدا هیچ هاوڵاتییەك زەرەرمەند نەبێت!.

 

لە كۆتاییدا دەڵێین، جگە لەوەی ئێمەی كارمەندانی تۆڕی هەواڵی ژیان، بووین بە قوربانی سەرەكی كێشە و ناكۆكییەكانی نێوان هەردوو هاوسەرۆكی یەكێتی، هەروەها ئەم دۆخە بە زیانێكی گەورە بۆ رەوشی رۆژنامەگەریی لە سنوری پارێزگای سلێمانی كۆتایی دێت، بەمجۆرە هەڵسوكەوت و رەفتاركردنە، وا دەكەن رۆژنامەنووسان لە پیشەكەیان دوور بكەونەوە كە ئەمەش دەبێتە زیانێكی گەورە بۆ كایەی رۆژنامەگەریی لەم سنورە، سەرەنجام لەسەر ئاستی رێكخراوە نێودەوڵەتییەكان و كۆمەڵگەی نێودەوڵەتیش، رەخنە و گلەییەكی زۆر دەهێننە سەر خۆتان و ئەزموونی حكومڕانی كوردی لە هەرێمی كوردستان.

 

بۆیە لە كۆتاییدا داوا دەكەین، قوباد تاڵەبانی ئەگەر بەراستی بڕوای بە ئازادی رۆژنامەنووسی هەیە و وەك خۆی دەڵێت بەرگریی لە مافی رۆژنامەنووسان دەكات، ئەوا با بەڵێنەكەی خۆی بباتە سەر.

 

هەروەها داواش لە كونسوڵخانە و نوێنەرایەتی وڵاتان لە هەرێم دەكەین بە جدی لەسەر مافی ئەو كۆمەڵە رۆژنامەنووسە بێنە دەنگ.

 

   ستافی تۆڕی هەواڵی ژیان