گه‌ڕان

Shadow Shadow
سیاسه‌تی

حزبەکان ئەنجامى دەنگ و ژمارەى کورسییەکانیان رادەگەیەنن

2021.10.10 - 22:31
App store icon Play store icon Play store icon
حزبەکان ئەنجامى دەنگ و ژمارەى کورسییەکانیان رادەگەیەنن

ناس کورد-

 

میدیاى فەرمى حزبەکان ئەنجامى بەرایی کورسییەکانیان رادەگەیەنن، پێش ئەوەى کۆمسیۆن بەفەرمى ئەنجامى هەڵبژاردن رابگەیەنێت.

کەناڵی ناس کورد لە تێلیگرام جۆین بکە   

 

بەپێی میدیاى فەرمى پارتى، ئەو حزبە ٣١-٣٢ کورسی بەدەستهێناوە و ئەنجامى بەشێک لە کورسییەکانى بەم شێوەیەیە، لەپارێزگاى هەولێر ١١ کورسی، دهۆک ٩ کورسی، کەرکوک دوو کورسی، سلێمانى یەک  کورسی، موسڵ ٨-٩ کورسی.

 

هەروەها میدیاى فەرمى یەکێتى دەڵێت هاوپەیمانی کوردستان لە سلێمانی و گەرمیان و کەرکوک یەکەمە و لە هەولێر دووەمە، بەبێ ئەوەى ئاماژە بەژمارەى کورسییە پێشبینیکراوەکان بکات.

 

ئاماژەى بەوەشکردووە، کورد لە کەرکوک شەش بۆ حەوت کورسی بەدەستھێناوە کە پێنجیان ھاوپەیمانی کوردستان مسۆگەری کردووە. هەروەها هاوپەیمانى سێ کورسی لە ھەولێر بردووەتەوە.

 

هاوکات بەرپرسانى نەوەى نوێ باس لە بردنەوەى ١٠ -١١ کورسی دەکەن لەسەر ئاستى پارێزگاکانى هەرێم و کەرکوک، بانگەشەى ئەوەشدەکەن کە دەنگەکانیان بەرزبوونەوەى "بەرچاوى" بەخۆوە بینیوە.

 

هەرچى بزوتنەوەى گۆڕانە کە لەگەڵ یەکێتیدا لەیەک هاوپەیمانێتیدا بوو تا ئێستا لەسەر ئاستى میدیاى فەرمى هیچ ئەنجامێکى لەبارەى دەنگى کاندیدەکانى بڵاونەکردووەتەوە.

 

هەروەها یەکگرتووى ئیسلامى کە کاندیدەکانى بەشێوەى سەربەخۆ بەشداریی دەنگدانیان کرد بانگەشەى ئەوە دەکات کە کورسییەکانى لەپەرلەمانى داهاتوو بۆ چوار کورسی زیاد دەکات.

 

بەپێی میدیاى فەرمى ئەو حزبە، یەکگرتوو چوار کورسی بەدەستهێناوە لە هەڵەبجەو دهۆك و زاخۆ و سلێمانى.

 

لاى خۆیەوە، میدیاى کۆمەڵى دادگەریی بڵاویکردووەتەوە کە له‌ بازنه‌كانی سێ و چواری هه‌ولێر ده‌نگی به‌رچاویان بەدەستهێناوە. هەروەها له‌ شارۆچكه‌ی سیروانی سه‌ر به‌پارێزگای هه‌ڵه‌بجه‌ له‌ بازنه‌ی سێی سلێمانی، كاندیدی كۆمه‌ڵی دادگه‌ری پله‌ی یه‌كه‌می به‌ده‌ستهێناوه‌، بەڵام هیچ ئاماژەیان بەژمارەى ئەو کورسییانە نەکردووە کە پێشبینى بەدەستهێنانى دەکەن.