ڤیدیۆ؛ کازمی پیاوە ئەشکەنجەدراوەکەی لەگەڵ ئەفسەری لێکۆڵینەوە ڕووبەڕووکردەوە

ڕۆژی پێنجشەممەی ڕابردوو، 23ی ئەیلولی 2021، وەزارەتی ناوخۆی عێراق بڵاویکردەوە، "عوسمان غانمی، وەزیری ناوخۆی عێراق فەرمانیدا لیژنەیەک پێکبهێندرێت بە سەرۆکایەتیی بەڕێوەبەری گشتیی بەرەنگاربوونەوەی تیرۆر بۆ لێکۆڵینەوە لە کەیسی هاووڵاتیی عەلی جبووری، کە بە ناڕەوایی بە کوشتنی هاوژینەکەی تۆمەتبارکرا، کەچی ئاشکرا بوو هێشتا لە ژیاندایە و لە پارێزگای بابلە".

هەروەها سەبارەت بە وردەکارییەکانی کەیسی تۆمەتبارکردنی ئەو هاووڵاتییە، وەزارەتی ناوخۆی عێراق ڕایگەیاند، "وردەکاریی دیارنەمانی هاوژینی ئەو هاووڵاتییە لە کاتی سەردانی هاووڵاتییەکە بۆ مەزارگەیەکی ئایینی دەستیپێکرد، دواتر هەر خۆی پۆلیسی ئاگادارکردەوە لە دیارنەمانی هاوژینەکەی، بەڵام گرتنەبەری رێکارەکان لە لایەن یەکێك لە ئەفسەرەکانی لێکۆڵینەوە ناپیشەیی بوو و ئەو رێکارانەش رێکاری دادوەرییان بەدوای خۆیاندا هێنا، بۆیە کەیسەکە بە ئاراستەیەکی نەخوازراودا چوو".